ل گۆر لهه‌ڤهاتنه‌كه ل نێڤبه‌را هه‌ڤسه‌رۆكێ یه‌كێتییا نشتیمانی یا كوردستانێ و پارێزگه‌رێ فه‌رز كری یێ كه‌ركووكێ، هه‌ژماره‌كه ته‌رۆریستێن داعشێ هاتنه ئازاد كرن، ئه‌ڤ ته‌رۆریست ژ ناڤچه‌یێن حه‌ویجه و ده‌ردوورا كه‌ركووكێ نه كو ده‌ستێ وان ب شه‌هید كرنا پێشمه‌رگه‌یێن باشوورێ ولات سۆر بوونه.
ئه‌ڤ دو رۆژه ل باشوورێ ولات باس ل ئیخانه‌ته‌كه دن با مالباتا شێخ جه‌نگی تێ كرن، ئه‌ڤ خیانه‌ت یا ئازاد كرنا 150 ته‌رۆریستێن داعشێ یه ل گۆر لهه‌ڤهاتنه‌كه ل نێڤبه‌را لاهۆر جه‌نگی هه‌ڤسه‌رۆكێ یه‌نه‌كێ و پارێزگه‌رێ فه‌رز كری یێ كه‌ركووكێ راكان جبووری.
چاڤكانیێن پێگه‌ها «داركا مازی» ل باشوورێ كوردستانێ ته‌عقیبا ڤێ مژارێ كرنه و ئه‌ڤ پێزانین ب ده‌ست خستنه.
ل سالا رابووری 2019ان و ب ئامانجا ئاسایی كرنا ره‌وشا ل نێڤبه‌را رێڤه‌برییا فه‌رز كری یا كه‌ركووكێ و یه‌كێتییا نشتیمانی یا كوردستانێ، لهه‌ڤهاتنه‌ك چێبوو، لاهۆر جه‌نگی و برایێ وی ئاراس جه‌نگی ب نوونه‌راتییا یه‌نه‌كێ و راكان جبووری وه‌ك برێڤه‌برێ یه‌كه‌مێ كه‌ركووكێ، ئه‌ڤ لهه‌ڤهاتن ئیمزه كرن.
یه‌ك ژ خالێن لهه‌ڤهاتنێ ئه‌ڤ بوو كو پێویسته یه‌نه‌كه وان ته‌رۆریستێن داعشێ یێن د زیندانێن سلێمانیێ ده راده‌ستی برێڤه‌برییا كه‌ركووكێ بكه، ژ بۆ كو ل ور جاركه‌كه دن لێپرسین ل گه‌ل وه‌ره ئه‌نجام دایین.
ل رۆژێن رابووری لاهۆر جه‌نگی ئه‌ڤ خالا لهه‌ڤهاتنێ ب جی كر و نێزی 150 ته‌رۆریستێن داعشێ راده‌ستی رێڤه‌برییا كه‌ركووكێ كرنه.
ل ده‌ربارا لهه‌ڤهاتنا ب یه‌نه‌كێ ره، راكان جبووری پارێزگه‌رێ فه‌رز كری یێ كه‌ركووكێ د كۆنفه‌ره‌نسه‌كی مه‌دیایی ده كو ل رۆژا 9 شوباتا سالا 2019ان هاتبوو ل دارخستن ئه‌ڤ یه‌ك گۆتبوو: «ئه‌نجوومه‌نا عه‌ره‌بی یا كه‌ركووكێ ل گه‌ل یه‌نه‌كێ لهه‌ڤ كرییه، له‌وما ئاساییشا یه‌نه‌كێ وێ وان ته‌رۆریستێن داعشێ راده‌ست بكه ژ بۆ كو ل كه‌ركووكێ لێپرسین ل گه‌ل بێ كرن، هه‌گه‌ر ئه‌شكه‌ره بوو كو ئه‌ڤ ته‌رۆریستن وێ ل گۆر یاسایێ بێن سزادایین و هه‌گه‌ر بێ تاوان بن وێ وه‌ره‌ن ئازاد كرن».
چاڤكانیێن پێگه‌ها «داركا مازی» ده‌ست نیشان كرن كو ئه‌ڤ لهه‌ڤهاتنه د نه‌رینا گه‌لێ باشوورێ كوردستانێ ده، درێژه پێدانه ب ئیخانه‌تێ، ژ به‌ر كو ئه‌ڤ ته‌رۆریستێن ژ ئالیێ لاهۆر و ئاراس جه‌نگی ڤه هاتنه ئازاد كرن، ده‌ست د شه‌هید كرنا پێشمه‌رگه‌یان ده هه‌یه ل سالێن شه‌رێ داعشێ، ب تایبه‌ت پاش كو هاتییه زانین كو ئه‌ڤ ته‌رۆریست یێن حه‌ویجه نه، ژ به‌ر كو گه‌لێ باشوور تو جاران وان دیمه‌نێن دل شه‌وات یێن دیلێن خوه پێشمه‌رگه ژبیر ناكه، وه‌ختا كو ل مه‌ها شوباتا 2015ان ته‌رۆریستێن داعشێ د قه‌فه‌سان ده ل پاشیێن ئه‌ره‌به‌یان د ناڤا حه‌ویجه ده ده‌رباس كرین كو هێژان چاره‌نڤیسا وان نه‌زه‌لاله.
