هه‌په‌گه‌ چالاكیێن باشوور و باكور ب ئاوایه‌كی نه‌راست نیشان دده‌

هه‌په‌گه‌ چالاكیێن باشوور و باكور ب ئاوایه‌كی نه‌راست نیشان دده‌

هێزێن پاراستنا گه‌ل هه‌په‌گێ، بالێ له‌شكریێ په‌كه‌كێ، ل ده‌ربارا چالاكیێن دوو رۆژێن رابووری داخویانی دا و ل گۆر وێ، پێتر ژ 10 له‌شكرێن ده‌وله‌تا داگیركه‌ر هاتن كوشتن، هه‌موه‌خت 4 گه‌ریلا.

ناڤه‌ندا مه‌دیایی یا هه‌په‌گێ، د داخۆیانیێ ده‌ ده‌ست نیشان كر كو ل رۆژێن 9-10/6/2020ان، گه‌ریلایان ل ناڤچه‌یا حه‌فته‌نینێ ل باشوورێ كوردستانێ، هه‌ر وها ل ناڤچه‌یێن چه‌لێ، دێرسمێ و سێرتێ ل باكورێ كوردستانێ هه‌ژماره‌كه‌ چالاكیێن پارتیزانی ئه‌نجام دانه‌ و تێده‌ كوشتنا 12 له‌شكران پشت راست كرییه‌.

هه‌په‌گه‌ د داخۆیانیێ ده‌ دبێژه‌: «ته‌ڤی له‌شكرێن كو مرنا وان هاتییه‌ پشت راست كرن، د چالاكییان ده‌ هه‌ژماره‌كه‌ دن یا له‌شكرێن ترك هاتنه‌ كوشتن، لێ به‌لێ هه‌ژمارا وان ته‌سبیت نه‌بوویه‌».

ل ده‌ربارا گه‌ریلایێن كو جانێ خوه‌ ژ ده‌ست دا نه‌، هه‌په‌گێ دیار كر، 3 گه‌ریلا د چالاكییا ل سێرتێ و یه‌كێ دن ل دێرسمێ، جانێ خوه‌ ژ ده‌ست دانه‌.

ئه‌ڤ داخویانییا هه‌په‌گێ هه‌موه‌ختا به‌لاڤبوونا راپۆرا سازییا ACLED یا ئه‌مه‌ریكایێ تێ كو دوهـ ده‌ست نیشان كربوو 77% ژ په‌ڤچوونێن تركیێ و په‌كه‌كێ ل سه‌ر خاكا باشوورێ كوردستانێ د قه‌ومن، په‌كه‌كه‌ ژ بۆ كو ڤێ راپۆرا ئه‌مه‌ریكایێ ره‌د بكه‌، د داخویانییا خوه‌ دا وها دده‌ نیشان دان كو چالاكیێن وێ پێتر ل باكورێ كوردستانێ د قه‌ومن.

هه‌ر ل ڤێ ده‌ربارێ ده‌، ئارته‌شا تركیێ ژ ئێكی ڤێ مه‌هێ ڤه‌ هه‌ژماره‌كا ئێریشان ل باشوورێ كوردستانێ ل سه‌ر پێگه‌هێن په‌كه‌كێ ل دارخستنه‌ و تێده‌ پێتر ژ 21 گه‌ریلایان جانێ خوه‌ ژ ده‌ست دا نه یه‌ك ژ وان فه‌رمانداره‌كی به‌رز بوو‌، لێ به‌لێ هه‌په‌گێ تو ئاگاهییه‌ك ل ده‌ربارا وان ئێریشێن هه‌وایی یێن ده‌وله‌تا تركیێ ل باشوورێ كوردستانێ پێك تینه‌ نه‌دانه، میناك ئێریشا دوهـ رۆژا چارشه‌میێ كو ل زاپێ و حه‌فته‌نینێ پێكهاتبوو و 8 گه‌ریلا تێده‌ جانێ خوه‌ ژ ده‌ست دان‌.