په‌كه‌كه دێ هنه‌ك ناڤچه‌یێن دن راده‌ستی ده‌وله‌تا داگیركه‌ر بكه
ئارته‌شا ده‌وله‌تا داگیركه‌را ترك ده‌رباسی باشوورێ كوردستانێ بوو و ل حه‌فته‌نینێ دربێن گران ل په‌كه‌كێ خستن، ئارته‌شا ترگیێ ئه‌ڤ ئۆپه‌راسیۆن ب ناڤێ «په‌نجا پلنگ» ده‌ست پێ كرنه.
ل گۆر چاڤكانیێن پێگه‌ها «داركا مازی» ل باشوورێ كوردستانێ ل شه‌ڤا ده‌رباسبوویی 16 سه‌ر 17/6/2020ان، هێزێن كۆماندۆ یێن ئارته‌شا تركیێ، ده‌رباسی ناڤچه‌یا حه‌فته‌نینێ بوون كو په‌كه‌كه ب هه‌رێمێن پاراستنا میدیا ب ناڤ دكه و ب رێیا هه‌وایی و به‌ژاهی ب دژواری بۆمبه كر.
ل ڤێ ده‌ربارێ ده، وه‌زاره‌تا پاراستنا نه‌ته‌وه‌یی یا تركیێ راگهاند، له‌شكرێن وان ده‌رباس بوونه و ئۆپه‌راسیۆنه‌كه به‌رفره‌هـ ب ناڤێ «په‌نجا پلنگ» ده‌ست پێ كرنه.
ل گۆر داخویانیێ، ل شه‌ڤا ده‌رباسبوویی 151 ئامانجێن په‌كه‌كێ هاتن هه‌ده‌ف كرن، لێ به‌لێ زرارێن جانی نه‌خوه‌یانه.
ئه‌ڤ ناڤچه ل حه‌فته‌نینێ هاتن هه‌ده‌ف گرتن
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كرن، باله‌فرێن جه‌نگ، گوندێن: «دشێش، حه‌فته‌نین، رێسێ، پیربلا، گه‌كی پاساغا، نزدوور» ل سینۆرێ زاخۆ بۆمبه كرنه.
ئارته‌شا تركیێ، ل 15 ڤێ مه‌هێ ئۆپه‌راسیۆنه‌كه مه‌زن ل باشوورێ كوردستانێ ده‌ستپێكر، د یه‌كه‌م جار ده، 81 پێگه‌هێن په‌كه‌كێ، ل «شه‌نگالێ، زاپێ، ئاڤاشین و قه‌ندیلێ» ئامانج كرن.
ل سالا رابووری په‌كه‌كی چه‌ندین ناڤچه‌یێن باشوورێ ولات كو ناڤێ هه‌رێمێن پاراستنا مه‌دیا لێ دكه، بێ كو تو شه‌ره‌كی بكه، راده‌ستی ئارته‌شا تركیێ كرن، وه‌كه خواكوركی و چیایێ شه‌كیف، په‌كه‌كه ب ده‌هان سالان د چیایێ شه‌كیف ده جی دگرت، لێ به‌لێ د چه‌ند ده‌مژمێران ده راده‌ست كر و نكاری تو به‌رگریێ ژێ بكه، د ڤێ ئۆپه‌راسیۆنا تركیێ ژی ده، هه‌مان سیناریۆیا خواكورك و چیایێ شه‌كیف وێ دوباره ببه و په‌كه‌كێ وێ هنه‌ك ناڤچه‌یێن دن بێ شه‌ر ته‌سلیمی تركان بكه.
په‌كه‌كێ ژ بۆ گه‌لێ باشوورێ كوردستانێ سه‌لماند كو ئامانجا وێ تێكدانا ئه‌زموونا ڤێ په‌رچه‌یا كوردستانێ یه، ژ به‌ر كو ئێدی ئه‌و ته‌نێ به‌هانه‌یان دده ده‌ستێ ئارته‌شا داگیركه‌ر ژ بۆ كو وه‌ره باشوور.
