په‌كه‌كه‌ ئێریشێن تركیێ نێزی گوند و باژاران دكه‌

ئێریشێن ده‌وله‌تا داگیركه‌را تركیێ ل باشوورێ كوردستانێ ده‌وام دكن، د ته‌عقیبا حه‌ره‌كه‌تێن په‌كه‌كێ ده‌، 9 جیێن دن ل سینۆرێ باژارێ زاخۆ هاتن بۆمبه‌ كرن، ل ڤر راستییه‌ك پر زه‌لال ژ بۆ مرۆڤ خوه‌یا دبه‌، راستی ئه‌ڤه‌ كو په‌كه‌كێ ده‌ست ب بجی كرنا پیلانا خوه‌ یا كێشانا ئارته‌شا تركیێ ژ بۆ نێزی گوند و باژارێن باشوورێ ولات كرییه‌.

چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره‌ كرن، ژ شه‌ڤا ده‌رباسبوویی ڤه‌، باله‌فرێن تركیێ هه‌ژماره‌كه‌ گوندێن سینۆرێ باژارێ زاخۆ بۆمبه‌ كرنه‌ كو حه‌ره‌كه‌تا گه‌ریلایێن په‌كه‌كێ تێده‌ بوو و هه‌ر چه‌ند كو زرارێن جانی نه‌هاتنه‌ ده‌ست نیشان كرن، لێ به‌لێ ئاگر و دۆمانه‌كه‌ مه‌زن ژ سه‌ده‌ما ئێریشان ب ئاقارێ گوندان كه‌تن.

ل گۆر ئاگاهیێن ده‌ستێ مه‌، ل شه‌ڤا ده‌رباسبوویی، چیایێ «خامتیری، سینۆرێ كۆمه‌لگه‌ها بێرسڤێ، گوندێن بۆسه‌لێ و بانكێن ژێر و ژوور» كه‌تن به‌ر ئێریشێن باله‌فران و زرار ب ئاقارێ وان گوند و ناڤچه‌یان كه‌تنه‌.

پێگه‌ها «داركا مازی» ژ ده‌ستپێكا وه‌شانا خوه‌ ب ده‌هان مژار د به‌شا «نهێنی» ده‌ ل سه‌ر پیلانێن په‌كه‌كێ یێن خزمه‌تا ده‌وله‌تا داگیركه‌را ترك ل باشوورێ كوردستانێ پارڤه‌كرنه‌ و كانێ ب تو ئاوا په‌كه‌كه‌ دخوازه‌ مه‌یدانا جه‌نگێ ژ خه‌تا سینۆر قۆناغ ب قۆناغ ده‌رباسی گوند و باژارێن باشوور بكه‌، میناك مژارا «کۆمارا زاپێ و ده‌ستپێكا هه‌ولێن په‌كه‌كێ بۆ ژناڤبرنا باشوورێ كوردستانێ».

هه‌ر وها مژارا «په‌كه‌كه‌ پرا ده‌رباسبوونا تركیێ بۆ باشوورێ كوردستانێ»، د ئێریشا ڤێ داویێ ده‌ ژی راستییا وان مژاران پێتر زه‌لال دبه‌.

ده‌وله‌تا داگیركه‌را ترك ل 15/6/2020ان، ئێریشا سه‌ر باشوورێ كوردستانێ هه‌وایی و به‌ژاهی ده‌ست پێ كر، ئیرۆ 6 رۆژ ده‌رباس دبن، د ڤێ ده‌مێ ده‌، 5 هه‌مولاتیێن سڤیل ل باشوورێ ولات شه‌هید كه‌تن، گه‌لێ باشوور ژی دخوازه‌ په‌كه‌كه‌ ژ گوندێن وان دوور بكه‌ڤه‌ و جه‌نگا خوه‌ یا ل گه‌ل تركیێ ده‌رباسی باكور بكن.