پارتیا كاركه‌رێن كوردستانێ پشتی سالا 1991ان، هه‌موو هه‌ول بۆ ژناڤبرنا ده‌ستكه‌تیێن هه‌رێما باشوورێ كوردستانێ بكارئانین، ژ دامه‌زراندنا كۆمارا ب ناڤێ زاپێ و فرۆشتنا شه‌رێ ب په‌ده‌كێ ره‌، هه‌موه‌خت هاتنا وێ یا بێ به‌هانه‌ ژ بۆ باشوور كو ب وێ رێ شه‌رعیه‌ت ژ بۆ تركێن داگیركار چێكر كو له‌شكركێشیێ ژ بۆ باشوور بكه‌.

دچارچووڤێ وێ پیلانگیرییا پاش سالا 1991ان دە، ئانکو پاش سەرهلدانا گەل ل باشوورێ کوردستانێ و پشتره‌ درستکرنا هکوومەت و پارلمەنتۆیا کوردستانێ، ل سالا 1995ان پەکەکێ پاش کو شیانێن شەرکرنێ ب دەوله‌تا ترکیێ رە نەمان، پیلانێن وێ ژ بۆ راکێشانا لەشکرێ ترکیێ بۆ ناڤا خاکا باشوورێ ولات دەستپێکر، یا راست مەبەستا سەرەکە ئەڤ بوو کو پەکەکە بکارە هەم خوە ل باشوورێ کوردستانێ ئاسێ بکە و هەم ژی بەهانەیەکێ بدە دەست دەولەتا داگیرکار یا ترکیێ ژ بۆ ئێریشکرنا ل سەر باشوورێ کوردستانێ و ژناڤبرنا وێ ستاتۆیا پاش سالا 1991ان ل باشوور هاتییە ئاڤاکرن، ئەڤ ژ ئالییەکێ، ژ ئالییەکه‌ دن ل سالا 1994ان دە ده‌وله‌تا ترکیێ دربەکە کوژەک ل پەکەکێ دابوو ب رێیا تانک و تۆپ و بالەفران و پرانییا گوندێن سەر سینۆر هاتبوون ڤالا کرن و پەکەکە نەدکاری خوارنێ و پێویستیێن خوە یێن رۆژانە دابین بکە، ژبەر ڤێ یەکێ وێ روو كره‌ باشوورێ کوردستانێ.

پەکەکێ ب تو ئاوایەکی ئێدێ شیانێن شەرکرنێ ل باکورێ کوردستانێ نه‌مابوو، ژ بەر ڤێ یەکێ بریار دا کو شه‌ری ب پارتیا ده‌مۆكرات یا كوردستانێ په‌ده‌كێ رە بکەت، هەلبەت وەکە بەری نها مە ئاماژە پێ کری، ل دەستپێکێ پەکەکێ زەمینەیا وێ یەکێ ژ خوە و ئالیگرێن خوە رە درست کر، ئەو ژی ب رێیا ڤەکرنا کەنالەکێ ئاسیمانی ب ناڤێ «مەد تی ڤی»، ئەڤ کەنالە بەرا ئێریشا پەکەکێ ل سەر پەدەکێ، دەست ب وەشانا خوە کر و زەمینەیا سپیکرنا کارێن رەش یێن پەکەکێ فەراهەم کر، ب رێیا ڤی کەنالێ ئاسیمانی پەکەکێ هەم ئەڤ یەک بەلاڤ دکر کو پەدەکەیە شەری ب وێ رە د فرۆشیت، هەم ژی ئەڤ یەک ژ گەلێ جیهانێ رە ئەشکەرە دکر کو ئەو د ناڤا کووراتییا هەرێما باشوورێ کوردستانێ دە جی دگرە و ب ڤێ یەکێ بەهانە د دا دەوله‌تا ترکیێ کو باشوور داگیر بکەت.

په‌كه‌كێ كادرێن خوه‌ وها په‌روه‌رده‌ كرن كو شه‌رێ ل دژی په‌ده‌كێ ژ شه‌رێ ل دژی ده‌وله‌تا تركیێ ب روومه‌ت تره‌

ل 15/8/1984ان دە پەکەکێ یەکەم چالاکییا خوە یا چەکداری ل باکورێ کوردستانێ دەست پێ کر ل مه‌ها 8 یا سالا 1995ان شەر ب پەدەکێ رە ئەنجام دا، پەکەکێ ل 26/8/1995ان ل دژی هەموو سەنگەرێن پێشمەرگە ل باشوورێ کوردستانێ شەر دەستپێکر، پەکەکێ ژ بۆ شەرێ ب پەدەکێ رە، هنەک یەکینە ب ناڤێ (یەکینەیێن برۆسک) پێک دئینە و وان دشینە ناڤچەیا به‌هدینان، ئێدی ژ ڤێ رۆژێ پێدە پەکەکە ب رێیا مەدیایا خوە کەتن قۆناغەکە نوو و قادرۆ و ئالیگرێن خوە وها پەروەردە کرن كو شه‌رێ ب پەدەکێ رە زوور ب روومەت ترە ژ شەرێ ب ترکیێ رە، لێ بەلێ دیسان پەکەکێ د ڤی شەری دە ئەو ئەنجامێن وێ دخوەستن ب دەست نەخستن.

پاش ڤێ یەکێ پەکەکێ ب رێیا مەدیایا خوە هەول دا ژ گەلێ کورد رە وها بدە زانین کو ئەڤ پەدەکە بوو شەر ب پەکەکێ رە کری، لێ بەلێ هەر کەس دزانە مەیدانا پەکەکێ كوده‌رێ یه‌ و چما هاتیە باشوور و شەر ب پەدەکێ رە کر، پەکەکێ تو جاران نەخوه‌ستییە ل باکور بەردەوام شەری ل دژی ترکیێ بکە، ئەوان دخوەست ئەو دەسکەتیێن ل باشوور پەدەکێ ژ بۆ گەلێ کورد زامن كرین، ژ بۆ خوه‌ هه‌ساب بكه‌ت و ب وان ده‌ستكه‌تییان دیرۆکێ ژ خوە رە درست بکەت و ل باشوور ببە دەستهلادار و ب ڤێ یەکێ ده‌وله‌تا ترك كو ئه‌نداما ناتۆیێ یه‌، بکشینە باشوور و باشوور بکەڤە دەست ترکیێ ده‌.