رێ ناهێت دایین په‌كه‌كه و هه‌ڤپه‌یمانێن وێ پێشه‌رۆژا رۆژهلاتا كوردستانێ ژ ناڤ ببن و وه‌كه كۆریایا باكور لێ بكن و فه‌رهه‌نگا هاورده‌كری یا یه‌كده‌ستیێ ب سه‌ر ده ب سه‌پینن.
هه‌ركو دچه كریارێن ب گومان و ترس یێن پارتییا كاركه‌رێن كوردستانێ ل رۆژهلاتا ولات، پێتر ئه‌شكه‌ره دبن، بسپۆرێن سیاسی یێن كورد ژی ب باوه‌رن كو ئایدۆلۆژییا په‌كه‌كێ یا ب ناڤ «مۆدێرنیتا ده‌مۆكراتیك» خستییه رۆژه‌ڤێ و خه‌باتێ ژ بۆ دكه، رێ ژ بۆ شه‌رێ ناڤخوه و مالوێرانیێ ل وێ به‌شا كوردستانێ خوه‌ش دكه.
په‌كه‌كه د ناڤا هه‌ولێن تونه كرنا فكرا نه‌ته‌وه‌یی و رزگاریخواز یا رۆژهلاتا كوردستانێ ده یه
ده‌مه‌كه په‌كه‌كه و باسكێن وێ ل رۆژهلات «پژاك»، سیاسه‌تا دژه گه‌ل كێمتر د په‌چنه و ئێدی ئه‌شكه‌ره هنه‌ك ئیدیه‌مان ب كار تینه كو بسپۆرێن زانستی، جڤاكی و سیاسی ب خه‌ته‌ره‌كه مه‌زن ل سه‌ر پێشه‌رۆژا رۆژهلات مێزه دكن، په‌كه‌كه ل رۆژهلات ته‌نێ ب ژ ناڤ برنا فكرا رزگاریخواز نه‌راوه‌ستایه، به‌لكو ده‌ست ئاڤێتییه ته‌سفییه كرنا ره‌خنه گران و كه‌سێن كو وه‌كه وان نه‌فكرن، گولله‌باران دكن، دبه كوشتنا «سۆران ئه‌خته‌ر سه‌مه‌ر و سامان دانیشوه‌ر» ژ ئالیێ په‌كه‌كێ ڤه ب دوو میناكێن ڤێ سیاسه‌تا دژه گه‌ل ناڤ بكین.
د. مه‌سعوود رۆسته‌می خوه‌دی دكتۆرایه ب زانستا سیاسی، ئه‌و ل پێگه‌ها خوه یا فێسبووكێ، باس ل 5 خالێن هه‌ری خه‌ته‌ر دكه كو سیاسه‌ت و ئایدۆلۆژییا په‌كه‌كێ ژ بۆ پێشه‌رۆژا رۆژهلاتا كوردستانێ چێكرنه، ئه‌و پێشه‌رۆژا كو ژ ناڤ چوونا ره‌ژیما ئیرانێ و رزگاربوونا گه‌لێ كورد تێده ژ هه‌ر وه‌خته‌كه دن زه‌لال تره خوه‌یا دكه.
په‌كه‌كه ره‌خنه‌گران ب ئالیكاری كرنا په‌ده‌كی سووچبار دكه
د. مه‌سعوود د خالا یه‌كه‌م ده ب كورتی باس ل ڤه‌هاندنا «سه‌فستاییا» په‌كه‌كێ دكه ل همبه‌ر وان تاكێن رۆژهلات كو سیاسه‌تا په‌كه‌كێ ره‌خنه دكن و بێ كو تو دوكیۆمه‌نته‌ك هه‌به، راسته‌راست سووچا كار كرنێ ب په‌ده‌كێ ره تێخن پال و دنڤیسه: «نه‌درسته هه‌ر كه‌سێ په‌كه‌كه ره‌خنه كر، هه‌ر راست بێخن سه‌ر په‌ده‌كێ».
تێ زانین په‌كه‌كه ژ بۆ په‌چنینا شاشێتیێن خوه و ته‌سفییه كرنا ره‌خنه‌گران، هه‌رده‌م وان كه‌سێن باس ل كێماسیێن وێ دكن، ب ئالیكارییا په‌ده‌كێ و هكوومه‌تا ئه‌نقه‌رێ سووچبار دكه.
په‌كه‌كێ ئه‌ڤ ئیدیه‌مێن بێ بها نه ته‌نێ ژ بۆ تاكان، به‌لكو ژ بۆ وان پارتیێن رۆژهلات ژی ب كار تینه كو پێتری 80 سالێن خه‌بات و ته‌كۆشینێ هه‌نه و یه‌كه‌م كۆمارا ده‌مۆكراتیك یا كوردستانێ ئاڤا كرنه، بێ گۆمان به‌شه‌كا ڤێ ژ بۆ رێخستنا په‌كه‌كێ ب خوه ڤه‌دگه‌ره كو ئه‌ڤ رێخستن نه‌خوه‌دی خوه‌سه‌رییا بریار دایینێ یه و ب رێخستنه‌كه دووڤه‌لانك یا داگیركه‌رێن كوردستانێ تێ حه‌ساب كرن.
ژ به‌ر ڤی سه‌ده‌مێ، د نه‌رینا په‌كه‌كێ ده، كه‌سێ كو ره‌خنێ لێ دگره، خه‌باتێ ژ بۆ په‌ده‌كێ دكه و ئه‌و ل گه‌ل په‌ده‌كێ ب هه‌ڤره خه‌باتێ ژ بۆ تركیێ دكن، لێ به‌لێ سه‌ده‌مه‌كه دن ژی هه‌یه كو په‌كه‌كه ژ بۆ وێ دره‌وان تێخه پال ره‌خنه‌گرێن خوه، ئه‌و ژی په‌كه‌كه دخوازه ته‌ڤ خیانه‌تێن خوه یێن ل دژی دۆزا نه‌ته‌وه‌ییا كوردستانێ پێ ب په‌چنه.
رۆسته‌م د خالا ددویان ده دنڤیسه: «كه‌سێن ل رۆژهلات سه‌ر ب په‌كه‌كێ ڤه‌نه ئه‌شكه‌ره نه، چونكه ئه‌و ئه‌شكه‌ره ئالیگرێن په‌كه‌كێ نه و خوه ب په‌كه‌كه‌یی ددن ناس كرن، لێ به‌لێ ته‌نێ ل سه‌ر ئه‌ساسا گۆمانێ هنه‌ك كه‌س ب ئالێ په‌ده‌كێ ره تێن خستن».
تشتێ ئه‌جێب هه‌ر وه‌كه د. مه‌سعوود باس لێ دكه، ئالیگرێن په‌كه‌كێ ئه‌شكه‌ره ل ئیرانێ ل ژێر كۆنترۆلا ره‌ژیما ئیسلامییا ئیرانێ چالاكی هه‌نه، چوون و هاتن هه‌یه و تو ئالییه‌كی كار ب وان ره نینه، ته‌نێ گه‌ریلا سه‌ربه‌ست ل ناڤچه‌یێن رۆژهلاتا كوردستانێ تێن و دچن، هه‌مولاتییان د ئێشینن و جوانێن رۆژهلات د كوژن، لێ ره‌ژیمێ قه‌د رێ ل وان نه‌گرتییه، ته‌نێ ل ده‌مێن پێویست نه‌به ئه‌و ژی ژ بۆ ڤه‌شارتنا تێكلییا ره‌ژیمێ و په‌كه‌كێ، هه‌گه‌ر هنه‌ك گه‌ریلایان ژ بۆ خاپاندنا گه‌ل بكن قوربانی و ب ده‌ستێ پاسداران ب كوشتن بدن، لێ به‌لێ ل هه‌موو ده‌مێن دن ئه‌و سه‌ربه‌ست ل رۆژهلات دگه‌رن.
پرس ل ڤر ئه‌ڤه، رێخستنه‌ك كو بخوازه كوردستانێ رزگار بكه، ب تو ئاوا حكوومه‌ته‌كه دژه كورد و داگیركه‌ر، ئازادانه رێ ب چالاكیێن وێ بده و ئالیكاریێ ژێره بكه؟
په‌كه‌كه جڤاكا كوردستانێ دابشه دكه
ئه‌ڤ بسپۆرێ زانستێ سیاسی د خالا سسێیان ده، به‌حسا خه‌ته‌ره‌كه دن دكه كو ژ ئه‌وێن ژوور پێتر مرۆڤ پێ دلگران دبه و تێخه فكرا شه‌رێ ناڤخوه یێ كوردان و د نڤیسه: «په‌كه‌كه كو خوه ب هه‌لگرا ئالایا مۆدێرنیتا ده‌مۆكراتیك دزانه و دژبه‌رێن خوه تێخه د كاته‌گۆرییا مۆدێرنیتا كاپیتالیزمێ ده، د ئه‌ساس ده هه‌ر ئه‌ڤ بوو سه‌ده‌م كو ل سه‌رده‌مه‌كی شه‌رێ كریكاران ل دژی برجوازان ژێ درستبووی».
تشتا كو ئه‌ڤ بسپۆر ب زه‌لالی ئاماژێ ژ بۆ دكه، پارتییا كاركه‌رێن كوردستانێ ب چێكرنا چه‌مكه‌كێ سیاسی یێ ئه‌جێب، دخوازه جڤاكا كوردستانێ په‌رچه بكه، ئه‌ڤه ژ بلی داگیركه‌رێن كوردستانێ د به‌رژه‌وه‌ندییا تو كه‌سی ده نابه، په‌رچه‌كرنا كوردستانێ ژ ئالییه‌كی دربه‌كی ل ستراكچه‌را خه‌باتا رزگاریخوازا گه‌لێ كورد دده، ژ به‌ر كو د دیرۆكێ ده نه‌بوویه نه‌ته‌وه‌ییه‌ك نه‌یه‌كگرتی گهیشتبه سه‌ربه‌ستیێ، خیانه‌تا 16 ئۆكتۆبه‌رێ ل باشوورێ كوردستانێ و فرۆشتنا خاكا كه‌ركووكێ ب داگیركه‌ران، ژ ئالیێ لاهۆر شێخ جه‌نگی و گرۆپا كالفامێن ناڤا یه‌نه‌كێ باشترینه میناكه ژ بۆ ڤێ گۆتنا مه.
هه‌موه‌خت ب په‌رچه كرنا جڤاكا كوردی، رێیه‌كه خه‌ته‌ر ژ بۆ سه‌رهلدانا شه‌رێ ناڤخوه ل رۆژهلات خوه‌ش دبه و وێ ببه سه‌ده‌م كو كابووسا شه‌رێ براكوژیێ یان ب گۆتنه‌كه دن خۆكوژییێ، پرسا كوردی بۆ چه‌ندین سالان پاش بێخه.
په‌كه‌كه‌ییان گۆتییه ره‌خنێ بكن ئه‌مێ هه‌وه بكوژین
د. مه‌سعوود رۆسته‌می د خالا چاره‌م یا نڤیسا خوه ده زێده‌باری ته‌كه‌ز كرنێ ل سه‌ر خه‌ته‌را په‌رچه‌بوونا جڤاكا كوردی ب سه‌ر ئه‌نییا مۆدێرنیتا ده‌مۆكراتیك و ئه‌نییا مۆدێرنیتا كاپیتالیزمێ، به‌حسا ئه‌زموونه‌كی خوه دكه و دبێژه: «وه‌ختا كو من ره‌خنه ل تێزا كۆنفیدرالیزما ده‌مۆكراتیك گرتی، ولاتپارێزێن!!!په‌كه‌كه‌یی ل ده‌مژمێر یه‌كێ نیڤا شه‌ڤێ تێله‌فوون ژ بۆ من كر و گۆتن هه‌گه‌ر دوباره بكی ئه‌مێ ته بكوژن».
په‌كه‌كه هێزه‌كه تۆتالتێر و كه‌ڤنه شۆپه، ژ به‌ر ڤێ سه‌ده‌مێ ئایدۆلۆژییا وێ به‌رسڤه‌كه مه‌نتقی ژ بۆ ره‌خنه و پێشهاتیێن سیاسی، جڤاكی، ئابووری و كولتووری نینه و ته‌نێ رێیا كوشتنێ و ته‌سفییا جه‌سه‌دی یا ره‌خنه‌گران دزانه، له‌وما هه‌ر كه‌سی ره‌خنه‌یه‌كه بچووك ژی لێ بگره، راسته‌راست فكر ل كوشتنا وی تێ كرن و هه‌ر وه‌ختا ده‌رفه‌ت چێدبه د ژیانێ ده ناهێلن.
د خالا داویێ یا نڤیسێ ده، د. مه‌سعوود رۆسته‌می د نڤیسه: «هێژان كورد ژ ئالیێ جڤاكناسیێ ڤه ل جیهانا سیاسه‌تێ د نه‌رن، كوردان هێژان زرارێن ڤێ جۆره سیاسه‌تێ نه زانینه و ل داویێ دبێژه: گومان نینه كو په‌كه‌كه و په‌كه‌كه‌یی گه‌له‌ك باش ژ ڤێ زرارا په‌رچه كرنێ فێم دكن».
په‌كه‌كه به‌رده‌وام فكرا ناسیۆنالیست و رزگاریخوازا كورد فه‌دایێ هنه‌ك ئیدیه‌مێن ئالۆز وه‌كه براتییا گه‌لان و …كرییه كو ته‌نێ خزمه‌تێ ب داگیركه‌رێن كوردستانێ دكن، ژ بۆ كو داگیركاری ب دۆمه، لێ به‌لێ گه‌لێ كورد ل رۆژهلاتا كوردستانێ ژ وێ یه‌كێ ژیر تره كو كۆلاڤێ ڤان ئیدیه‌مێن ئالۆز یێن په‌كه‌كێ ل سه‌رێ خوه بكن.
كولتوورێ سیاسی ل رۆژهلات نه‌ته‌وه‌یی یه و ئایدۆلۆژیایا پاوانخوازییا په‌كه‌كێ ره‌د دكه
هه‌ر وه‌كه به‌شه‌كی رۆشنبیرێن رۆژهلات باس لێ دكن، ته‌ڤگه‌را سیاسی و كولتووری ل رۆژهلاتا كوردستانێ د سه‌ر كێماسی، ئه‌ڤرازی و نشیڤییان ره، خوه‌دی ژێرخانه‌یه‌كی نه‌ته‌وه‌یی، رزگاریخوازی، ده‌مۆكراتیك و ئازادیخوازه، ئه‌ڤ كولتوور تاك ده‌نگیێ، هه‌ژموونا پاوانخوازیێ و خوه‌سه‌پاندنێ ره‌د دكه و تو ئایدۆلۆژیایێن ده‌ست كرد و هاورده نكاره ل همبه‌ر ڤی كولتوورێ نه‌ته‌وه‌یی و ده‌مۆكراتیك خوه بگره.
هه‌ر چه‌ند كو هێژان ئه‌و هێزا كو وێ جڤاكا رۆژهلات ل ژێر داگیركه‌رییا ئیرانی ده‌ربخه نه‌ته‌قییه، لێ به‌لێ پێشه‌رۆژا رۆژهلات زه‌لاله و ئه‌ڤ په‌رچه‌یا نشتیمان به‌ر ب ره‌وشه‌كی وها هه‌نگاڤان د هاڤێژه كو ده‌رفه‌تا ته‌قینا وێ هێزێ د ناخێ جڤاكی ده به‌رده‌ست دكه و ل وێ ده‌مێ ئه‌ڤ هه‌موو پیلانێن «شوئم» وێ به‌تال ببن كو په‌كه‌كه ب ئالیكارییا دژمنێ كورد ژ بۆ پێشه‌رۆژا رۆژهلاتییان دارێشتنه.
گه‌لێ كورد ل رۆژهلاتا ولات رێ ناده پارتییا كاركه‌رێن كوردستانێ و هه‌ڤپه‌یمانێن وێ ب زه‌برا هێزێ و چه‌كان پێشه‌رۆژا رۆژهلات ژ ناڤ ببن و بكه‌نه كوریایا باكور و فه‌رهه‌نگا یه‌كده‌ست یا هاورده‌كری و ئازادی كوژ ب سه‌ر ده ب سه‌پینن.
