پەکەکە: شۆرەشگێرێن کورد بێ شەرەفن

"پەکەکە:"شۆرەشگێرێن کورد بێ شەرەفن
  • نڤێسین: كارۆ هه‌ورامان

  • به‌شێ یه‌كێ

پەکەکێ د رۆپەلا خوە ئا فەرمی دە خەباتکارێن کورد ب بێ شەرەف ناڤ دکە و هەڤدەم پێوەندییا دگەل داگیرکاران ب کارەک لۆژیکی دزانە

خەباتێن پارتیا کارکەرێن کوردستانێ ژ بۆ تێکدان و شوولی کرنا پرسا نەتەوی و بزاڤا رزگاریخوازانە ئا رۆژهلاتێ کوردستانێ ئاراستەیەک خەتەر ب خوە ڤە دگرە و د داوی هەلوەستێن ڤێ پارتیێ دە ل همبەر رەوشا رۆژهەلاتێ کوردستانێ، هەموو شۆرەشگێرێن ڤێ پارچەیا کوردستانێ و پێشمەرگەیێن رۆژهەلاتێ کوردستانێ ب “بێ شەرەف” ناڤ دکن و هەڤدەم دگەل دانپێدانکرن ب هەبوونا پێوەندیان دگەل رەژێما ئیرانێ و هەبوونا نەخوەشخانەیێن تایبەت ب پەکەکێ ل باژارێ ئۆرمیێ، ڤان پێوەندییان دگەل ئیرانێ ب کارەک لۆژیکی دزانن و دخوازن ببێژن ئەو رەخەیێن ل پێوەندیێن دناڤبەرا پەکەکێ و دوژمنێن کوردستانێ دە تێن گرتن هەموو نە لۆژیکی نە.

"پەکەکە:"شۆرەشگێرێن کورد بێ شەرەفن

هەر وەک پێش نها ل پێگەها “دارکا مازی” دە هاتیە پارڤەکرن، رێخستنا ژینگەپارێزی “ژیوای” ئا باژارێ “پاوە” ل رۆژهلاتێ کوردستانێ راگهاندیە رۆژا یەکشەمی 28/6/2020ان، سێ چالاکڤانێة ژینگەپارێزیێ یێن ئەندامێن ڤێ رێخستنێ، ب ناڤێن “موختار خەندانی، بیلال ئەمینی و یاسین کەریمی” ژ ئەنجاما کۆنترۆلکرنا وان ئاگرێن کو رەژیما ئیرانێ ل دارستانێن رۆژهلاتێ کوردستانێ بەردای، د دەمەکی دە کو ئەڤ کەسانە مژوولی ڤەمراندنا ئاگری بوون و جانێ خوە قوربانی کوردستانێ کری. پارتیا دەمۆکراتا کوردستانێ-ئیران د داخوەیانیەکە فەرمی دە راگهاند کو دو کەس ژ وان شەهیدێن ژینگەپارێزیێ (موختار خەندانی شێنیێ نەوسوود و یاسین کەریمی شێنیێ باژارۆکێ شمشێر ل هەورامان) ئەندامێن ریخستنێن نهێنی یێن وێ پارتیێ بوون و چەندین بەلگە ژی ل سەر ڤێ مژارێ پارڤەکرن. پارتیا دەمۆکرات هەڤدەم سوپایێ پاسداران ب کوشتنا وان سێ چالاکڤانێن ژینگەپارێزیێ سووچبار دکە.

پەکەکە: “موختار خەندانی هەورامیەک ب شەرف بوو ژبەر ڤێ یەکێ تو جاران نەبوو ئەندام د پارتیا  دەمۆکرات ئا کوردستانێ-ئیران “

رۆژا دوشەمی 30/6/2020ان، پەکەکێ د رۆپەلا خوە یا فەرمی دە “فورات نیۆز” وێنەیەکی “موختار خەندانی” پارڤە کر و رستەیەک ل بن وێنە نڤیساند کو وێنەیەک تەمام ژ فکرا پیلانگێری یا پەکەکێ ل همبەر رۆژهلاتێ کوردستانێ د وێ رستێ دە نیشان ددە. پەکەکێ ل بن وێنەیێ موختار خەندانی نڤیساندیە: “موختار خەندانی هەورامیەک ب شەرف بوو ژبەر ڤێ یەکێ تو جاران نەبوو ئەندام د پارتیا دەمۆکرات ئا کوردستانێ-ئیران دە. هەرچەند پشتی چەند دەمژمێران ئەڤ وێنە ل “فۆرات نیۆز” هات ژێبرن، لێ بەلێ ئەڤ وێنە ب ئاوایەک بەرفرەهـ د سۆسیال مەدیایێ دە هات پارڤەکرن.

"پەکەکە:"شۆرەشگێرێن کورد بێ شەرەفن

گەر ب کورتی شیرۆڤەیەکی ژ بۆ ڤی وێنە و وێ رستەیا پەکەکێ ل بن وێنە نڤیساندی  بکین وێ ب زەلالی ببینین کو دژاتیکرنا خەباتا رزگاریخوازانەیا رۆژهلاتێ کوردستانێ ژ بال پەکەکێ ڤە ئاراستەیەک خەتەر ب خوەڤە دیتیە، هەر ژ بەر ڤێ یەکێ یە ژی کو دبینین ڤێ هەلوەستا پەکەکێ پێلەکە مەزن ئا نەرازیبوونا رەوشەنبیر و کەسێن نەتەوی ل رۆژهلاتا کوردستانێ ل پەی خوە ئانین. د فۆرات نیۆزێ دە پەکەکێ وێنەیەک ژ موختار خەندانی دانایە کو شالەک “چەفیەک” ل سەر ملێن وی یە کو ل رۆژهلاتێ کوردستانێ ب نیشانەیا خەباتا رۆژئاڤا کوردستانێ ل سەر ملێن خوە دانیە. ب تایبەتی پشتی ئێریشا تەرۆریستێن داعشێ ژ بۆ سەر کۆبانێ ل رۆژئاڤا کوردستانێ، ب سەدان خۆرتێن رۆژهلاتا کوردستانێ بێکو بچووکترین باوەری ژی ب هزر و بیرێن پەکەکێ هەبن ژ بۆ پاراستنا وی باژارێ کوردستانێ دەست ئاڤێت چەک و جیێ داخێ یە هەژمارەک ژ وان د رێکا بەرەڤانیکرن ژ کوردستانێ دە جانێ خوە کر قوربانی و شەهید کەتن. یا راست تشتێ کو نەهیشتی کۆبانێ بکەڤە هێزا پێشمەرگەیێن باشوورێ کوردستانێ و خەباتکارێن پارچەیێن دن ئێن کوردستانێ و پشتەڤانییا هێزێن هەڤپەیمانییا ناڤدەولەتی بوو گەر نا پەکەکێ چ قاس بەرەڤانی ژ عەفرینێ، سەرێکانیێ، جاسووسان و چیایێ شەکیف خواکورک و… کر هەر هند ژی دا برەڤانیێ ل کۆبانێ کت و پارێزیت. ل وێ دەمێ هەیا نها ئەو شالا کو شەرڤانان ل رۆژئاڤا کوردستانێ ل سەر ملێن خوە ددانا یانژی ل سەر سەرێ خوە ددانا وەکە سەمبۆلا بەرەڤانیێ ژ رۆژئاڤا کوردستانێ هاتیە ناسین و هەر کوردەک ب هەر هزرەک سیاسی و جودا، ب مەرەما پشتگیریکرن ژ رۆژئاڤا کوردستانێ و خەباتا باکورێ کوردستانێ ئەڤ شالە بکارئانیە.

رۆژهلاتێ کوردستانێ نیشان دایە کو مژارا نەتەوی و سەرخوەبوون و رزگاریا کوردستانێ ژ بۆ وان ئەساسە

د ڤێ دەربارێ دە بەلگە پڕ زیدەنە، یەک ژ وان کەسێن کو ئەو ب خوە نیشتەجی یێ ناڤچەیا هەورامانە و یەکە ژ چالاکڤانێن رۆژهلاتا کوردستانێ و هەرتم رەخنەیان ل پەکەکێ دگرە، وێنەیەک ژ خوە و هەڤژینا خوە پارڤەکریە کو ئەڤ شالە ل سەر ملێن وی خوەیا دکە و لسەر ڤی وێنە نڤیساندیە: “ئەم ئەندامێن پارتیا دەمۆکراتین لێ ژ بۆ پشتەڤانیکرنا خەباتا گەلێ کورد ل بەشێن دن ئێن کوردستانێ ئەڤ کارە مە ئەنجام دایە نە ژ بۆ ئەرێ کرنا سیاسەتێن پەکەکێ.”

"پەکەکە:"شۆرەشگێرێن کورد بێ شەرەفن

رۆژهلاتێ کوردستانێ نیشان دایە کو مژارا نەتەوی و سەرخوەبوون و رزگاریا کوردستانێ ژ بۆ وان ئەساسە، مە باش دیت ل دەما ب رێڤەچوونا رەفەراندۆما سەرخوەبوونێ ل باشوورێ کوردستانێ ب مەلیۆنان خەلکێ رۆژهلاتێ کوردستانێ هاتن ناڤا جاددەیان دە و ئاهەنگ گێران. د ئەنجام دە ب سەدان کەس هاتن دەستەسەرکرن و جیێ داخێ یە هەژمارەک ژ وان ل ژێر ئیشکەنجەیێ دە شەهید کەتن و هەژمارەک دن ژی هێژان د زیندانێن تاری یێن رەژێما ئیرانێ دانە. لێ بەلێ مە دیت تو یەک ژ پارتیێن باشوور و ئالیگرێن رەفەراندۆمێ نەگۆت ئەو کەسێن هاتیە سەر جاددەیان ئالیگر و ئەندامێن مەنە و ب هەست کرن ب بەرپرساتی و پرەنسیبێن کارێن رێخستنی ڤە گۆت ئەو ژ بۆ پشتەڤانیکرنا کوردستانێ هاتینە و ناڤێ رەفەراندۆما رۆژهلات ل سەر دانا.

پەکەکە دخوازە هەر کەسەکی ئەو شالە ل سەر ملێن وی بە ب ئەندامێ خوە بزانە

لێ بەلێ پەکەکێ ب پارڤەکرنا ڤی وێنەیێ موختار خەندانی کو ب یەک ژ شالێن تایبەت ب خەباتا رۆژئاڤا ڤە ئەڤ وێنە کشاندیە و دەما وێنەگرتنێ ژی دیار دکە ئەو دەم بوو کو رۆژئاڤا ل بن ئێریشا مەزن ئا تەرۆریستان دە، ب ڤی کاری موختاری خواستیە پشتەڤانییا خوە ژ بۆ ڤێ پارچەیا کوردستانێ دیار بکە لێ پەکەکە دبێژە ئەو ئەندامێ مە بوو. پەکەکە دخوازە هەر کەسەکی ئەو شالە ل سەر ملێن وی بە ب ئەندامێ خوە بزانە و ببێژە هەر کەسێ کو پشتەڤانی ل رۆژئاڤا و کوردێن باکور کربە ئالێگرێ پەکەکێ یە، ئەڤ بۆچوونا وان ژی ب ئاوایەک ئەشکەرە خەتەرەیەک مەزن ژ بۆ یەکرێزیا کوردان دروست کریە، پەکەکە ب ڤی ئاوا دخوازە ب گەلێ کورد رە وەها بدە زانین کو هەر کەسەکی ل هەر پارچەیەکی کوردستانێ پشتەڤانیا باکور و رۆژئاڤا کر و شال ل سەر ملێن وی بە ئەو ئەندامەکی پەکەکێ یە. ئەڤ کارێ پەکەکێ ژی وێ ببە سەدەما دەرکەتنا ڤالاهیەک مەزن دناڤبەرا کوردێن پاڕچەیێن کوردستانێ دە کو ب تەنێ وێ دوژمنێن کوردان سوودێ ژ ڤی یەکێ ببینن، ئەڤ کار وەکە ژەهرەک پڕ خەتەر ژ بۆ خەباتا رزگاریخوازانە یا کوردان تێ هژمارتن.

پەکەکە، دخوازە کوردان زیدەتر پارچە پارجە بکە و “هەورامی”یان وەکە نەتەوەیەک جودا ژ کوردان دیار بکە

د بەشەکی ژ نڤیسینا پەکەکێ دە هاتیە: “هەورامیەک ب شەرەف بوو”. د ڤان سێ پەیڤان دە ل دەستپێکێ خەباتەک کو ئەڤ چەندین سالن کار بۆ تێ کرن ئەشکەرە دکە و دخوازە کوردان زیدەتر پارچە پارجە بکە و “هەورامی”یان وەکە نەتەوەیەک جودا ژ کوردان دیار بکە. خەباتەک هەیە کو ئەڤ چەندین سالن دوژمن کار بۆ دکن لێ هێژان سەرکەتن نەئانیە. ل بیرا مەیە ل باشوورێ کوردستانێ ژی رێخستنەک ب ڤی ناڤی هات ئاڤاکرن کو هەورامی ب نەتەوەیەک جودا دزانی و داخوازا فەدرالیەتێ ژ بۆ وان دکر، پاشان ئەشکەرە بوو کو دەستێ ئیرانێ و پەکەکێ ل پشت ڤێ رێخستنێ بوو، ڤێ رێخستنێ سەرکەفتن نەئانی ژبەر ڤێ یەکێ هات هەلوەشاندن.

پەکەکە دخوازە ل رۆژهلاتێ کوردستانێ دیرۆکا ب خوین ئا خەباتا رزگاریخوازانە یا کوردان ب بێ شەرەفی وێنە بکە

لێ بەلێ بێرێزیکرنا پەکەکێ ب خەباتا رزگاریخوازانە یا کوردان دەمەکی دگەهە داوی ئاستا خوە یا بلند کو دبێژە: “ب شەرەف بوو ژبەر ڤێ یەکێ قەت نەبوو ئەندامێ پارتیا دەمۆکراتا کوردستانێ-ئیران.” پەکەکە د دەمەکی دە ئەندامێن پارتا دەمۆکرات ب “بێ شەرەف” ناڤ دکە کو بەشەکی پرشەنگدار ژ دەستکەفتێن کوردان د دیرۆکا سەردەم دا ل بن سیبەرا خەبات و تەکۆشینا ڤێ پارتیێ هاتینە تەسبیت کرن. بۆ میناک کۆمارا کوردستانێ ل باژارێ مەهاباد، ئالا پیرۆزا کوردستانێ، ناڤێ پیرۆزێ پێشمەرگە و… بەشەک ژ دەستکەفتێن نەتەوی یێن ڤێ پارتیێ نە. ئەڤ رستەیا ژ بال پەکەکێ ڤە هاتیە نڤیساندن ب وێ واتەیێ تێ کو پێشەوایێ کوردان و یەکەم سەرۆک کۆمارێ کوردستانێ “بێ شەرەف” بوویە، د دیتنا پەکەکێ دە ئەو ب هەزاران شەهیدێن رۆژهلاتێ کوردستانێ کو وەکە پێشمەرگەیێن کوردستانێ د ناڤا رەفێن پارتیا دەمۆکرات و کۆمەلێ دە شەهید کەتینە “بێ شەرەفن”. ب کورتی پەکەکە دخوازە ل رۆژهلاتێ کوردستانێ دیرۆکا ب خوین ئا خەباتا رزگاریخوازانە یا کوردان ب بێ شەرەفی وێنە بکە و رەواتیێ ب وێ کوشتن و جینایەت و ئاسمیلە کرنا کوردان بدە کو رەژیمێن داگیرکار ل همبەر کوردان ئەنجام دایینە. بۆ میناک پەکەکە دخوازە ببێژە ب دارڤەکرنا پێشەوا قازی محەمەد تاوان نەبوو بەلکو ب دارڤەکرنا کەسەکی بوو کو پەکەکە وی ب “بێ شەرەف” دزانە. هەڤدەم دخوازە پاکانەیێ ژ بۆ وان هەموو خەباتێن تەرۆرکرنێ بکە کو کۆمارا ئیسلامی یا ئیرانێ ل دژی رێبەر و شۆرەشگەرێن رۆژهلاتێ کوردستانێ ئەنجام دانە.

لێ ب راستی بێ شەرەف کییە؟

بەشەکی زیدە ژ چالاکڤان و رەوشەنبیرێن رۆژهلاتێ کوردستانێ بەرسڤا ڤێ بێ رێزی کرنا پەکەکێ دایە و نڤیساندیە:

بێ شەرەف ئەو کەسە کو سەرسام و مەندەهۆشێ ئەتاتورکە و دبێژە گەر دەولەتا ترک د گەل حکوومەتا باشوورێ کوردستانێ پێوەندی هەبن ئەڤ کار ئیخانەتە ب ئەتاتورک! بێ شەرەف ئەو کەسە کە دبێژە باشوورێ کوردستانێ وێ ببە ئیسرائیلا دویەمین و پێویستە هەیا کو ب‌ هێز نەبووی وەرە ژناڤبرن. بێ شەرەف ئەو کەسە کو داخوازا لێبۆرینێ ژ داییکێن لەشکەرێن کوشتی یێن ترکا دکە و تو ئێماژەیان ب گەریلایێن شەهید و مالباتێن وان ناکە. بێ شەرەف ئەون یێن کو بوویە کارکەرێن شەری ژ بۆ ولاتێن دوژمن و ئەو دەولەت پەرەیان پێ ددن و ل هەر جیەکێ ئەو بخوازن شە ب وان ددن کرن. بێ شەرەف ئەون کو ب ئەنقەست بەشەکی زێدە ژ خاکا رۆژئاڤا کوردستانێ دایە دەست دەولەتا ترکیێ و ئەو دەلیڤەیا ژ بۆ وێ پارچەیێ دروست بووی ژناڤ بری. بێ شەرەف ئەو کەسن کو شەرێ خوە ئانیە باشوورێ کوردستانی و پێنگاڤ ب پێنگاڤ بەشەک ژ ستراتەژی ترین ناڤچەیێن باشوورێ وەلات دایە دەست رەژێما ترکیێ. بێ شەرەف ئەون کو د چەند هەفتەیێن رابووری دە هەورامی ل سەر نەدانا باجێ گوولە باران کری و نها باس ل شەرەفێ دکن. بێ شەرەف ئەون کو زمانێ خوە یێ دایکێ نزانن و ب زمانێ دوژمنان دئاخڤن. بێ شەرەف ئەو لایەنە یە کو هەموو هێزا خوە ژ بۆ دژاتیکرنا پارتیێن نەتەوی یێن کوردستانێ بکار خستی. بێ شەرەف ئەو لایەنە یە کو دگەل هەموو داگیرکارێن کوردستسنێ پێوەندیێن موکم هەی و هەڤدەم دگەل هەموو پارتیێن کوردی دە شەر ئەنجام دایە. بێ شەرەف ئەو لایەنە کو ب باس کرن ل براتیا گەلان دخوازە هەیا داویێ کوردستانێ ل بن چەنگێن داگیرکارانا بهێلە.. ڤان رەوشەنبیران د درێژاهیا نڤیسا خوە دە نڤیساندیە گەر بریار بە باس ل بێ شەرەفیا پەکەکێ وەرە کرن ب پەرتووکەک 1000 سەحیفە ژی ب داوی نابە.

"پەکەکە:"شۆرەشگێرێن کورد بێ شەرەفن

ل رۆژهلاتێ کوردستانێ رەکۆردەک دەنگی ئا یەک ژ سەرکردەیێن پەکەکێ پارڤەبوویە کو ب ئەشکەرە باس ل پێوەندیێن پارتیا کارکەرێن کوردستانێ و ئۆفیسا نوونەراتیا ڤێ پارتیێ ل باژارێ تەهرانێ دکە

د راستی دە پەکەکە دخوازە ب بێشەرەف ناڤ کرنا شۆرەشگێرێن کورد، خۆرتێن کورد ژ خەباتکرن بۆ رزگاریا نەتەوی خەمسار بکە، لێ بەلێ بێ گۆمان کارەک کو رەژیما ئیرانێ ب درێژاهیا زێدەتر ژ سەد سالان نەکاریە ئەنجام بدە  و هەر ژ شۆرەشا نەمر، سمکۆیێ شکاک، هەیا نها بەردەوام خەباتا رزگاریخوازانە یا رۆژهلاتێ کوردستانێ نە سەکنییە، پەکەکە ب ئاخافتنێن کرێت و بێ حورمەتیێ قەت نکارە ئەنجام بدە.

هەڤدەم ل رۆژهلاتێ کوردستانێ رەکۆردەک دەنگی ئا یەک ژ سەرکردەیێن پەکەکێ پارڤەبوویە کو ب ئەشکەرە باس ل پێوەندیێن پارتیا کارکەرێن کوردستانێ و ئۆفیسا نوونەراتیا ڤێ پارتیێ ل باژارێ تەهرانێ دکە کو “زوبەیر ئایدار” بەرپرسێ وێ بوویە. ڤێ یەکێ ژی نا ڤەشێرە کو پەکەکە ل باژارێ ئۆرمیێ بنکەیەک تەندروستی هەبوویە و بریندارێن خوە تێدە تەداوی دکرن، و ئەڤ کارە ژی ب کارەک لۆژیکی ب ناڤ کریە. د بەشەک دن دە ئەمی ڤێ رەکۆردا دەنگی پارڤە بکین و د گۆتارەکی دە ئەمێ زێدەتر شیرۆڤەیان ل سەر بکین.