په‌كه‌كه تێكلییان دگه‌ل داگیركه‌رێن كوردستانێ ب لۆژیك دزانه
نڤیسین: كارۆ هه‌ورامان
به‌شا دوویه‌مین
هه‌ولێن پارتییا كاركه‌رێن كوردستانێ، ژ بۆ تێكدان و ژ ناڤ برنا دۆزا نه‌ته‌وه‌یی و ته‌ڤگه‌را رزگاریخواز یا رۆژهلاتا كوردستانێ، ئاراسته‌یه‌كه خه‌ته‌ر تر ب خوه‌ڤه دبینه و ل ڤان رۆژا ریكۆردا ده‌نگێ كه‌سه‌كی ب ناڤێ «سه‌عید ساعیدی» كو یه‌ك ژ به‌رپرسیارێن په‌كه‌كێ یه و ئه‌ندامێ كه‌نه‌كێ یه هاتییه پارڤه كرن، ئه‌و ئه‌شكه‌ره باس ل تێكلیێن په‌كه‌كێ دگه‌ل ده‌وله‌تا ئیرانێ و نوونه‌رێن رێڤه‌به‌رێن وێ پارتیێ ل ته‌هرانێ دكه.
ساعیدی دبێژه: «زوبێر ئایدار، به‌رپرسیارێ نوونه‌راتیێ بوو و رێڤه‌به‌رێن په‌كه‌كێ پر ب ڤێ ئۆفیسێ كێف خوه‌ش بوون، ساعیدی ناڤه‌شێره كو په‌كه‌كه ل باژارێ ئورمیێ یێ رۆژهلاتا كوردستانێ، بنگه‌هه‌كه ته‌ندروستیێ هه‌بوو و بریندارێن خوه تێده ته‌داوی دكرن، هه‌موه‌خت ئه‌ڤ تێكلیێن د گه‌ل داگیركه‌ران ده ب لۆژیك دزانه و هه‌ول دده سه‌رجه‌م وان ره‌خنه‌یێن ل تێكلیێن په‌كه‌كێ و داگیركه‌رێن كوردستانێ تێن گرتن، ب نه‌لۆژیك بده نیشان دان.
سه‌عید ساعیدی یه‌ك ژ كادرۆیێن هه‌ری دیار یێن پارتییا كاركه‌رێن كوردستانێ یه، خه‌لكێ رۆژهلاتا كوردستانێ یه و نها ل ولاتێ ئه‌لمانیایێ یه، ناڤبووری یه‌ك بوو ژ وان كه‌سێن كو دهات گۆتن ئه‌و وێ ژ ئالیێ په‌كه‌كێ ڤه ژ بۆ سه‌رۆكتییا پژاكێ وه‌ره هلبژارتن، لێ به‌لێ پاش ڤێ یه‌كێ سیامه‌ند موعینی وه‌كه سه‌رۆكێ پژاكێ هات ده‌ست نیشان كرن، ساعیدی ل به‌شا راگهاندنێ و تێكلیێن په‌كه‌كێ ل ئه‌لمانیایێ درێژیێ دده چالاكیێن خوه.
ساعیدی د هه‌ڤپه‌یڤینه‌كه رادیۆیێ ده، به‌شه‌ك ژ گۆتنێن خوه ژ بۆ تێكلیێن په‌كه‌كێ و ئیرانێ ته‌رخان دكه و نه‌ته‌نێ ئه‌شكه‌ره دان ب هه‌بوونا وان تێكلییان دكه، به‌لكو ب لۆژیكی ژی دزانه، ساعیدی دبێژه: «زوبێر ئایدار به‌رپرسیارێ ئۆفیسا نوونه‌راتییا په‌كه‌كێ بوو ل ته‌هرانێ».
كوردێن دلسۆز د نه‌رینا په‌كه‌كێ ده نه‌زان و پاشكه‌تی نه
پشتره دبێژه: «وه‌ختا كو باس ل داخستنا نوونه‌راتییا په‌كه‌كێ ل ته‌هرانێ هاتییه كرن، موراد كارایلان پر دلگران بوو كو ئێدی په‌كه‌كه نوونه‌راتی ل ته‌هرانێ نامینه! سه‌عید ساعیدی د درێژییا داخوه‌یانییا خوه ده، هه‌بوونا تێكلییان ل گه‌ل داگیركه‌رێن كوردستانێ ب لۆژیك دزانه و ب قه‌ده‌ر سه‌فسته‌بازیێ وه‌كه میتۆدا هه‌رده‌می یا په‌كه‌كێ، دخوازه نه‌ته‌نێ هێنجه‌تان ژ بۆ نێزیكبوونا حیزبا خوه ل گه‌ل ره‌ژیما ته‌هرانێ و دوژمنێن دن یێن گه‌لێ كورد بگره، به‌لكو ئه‌وێن پاك و دلسۆز ژی كوردایه‌تیێ دكن ب كه‌سێن نه‌زان و پاشكه‌تی بده نیشان دان و دبێژه نابه ئه‌م د یه‌ك گراڤێ ده پێكڤه بژین.
پشتره و ب مفا وه‌رگرتن ژ هنه‌ك ئیدیه‌مێن تایبه‌ت یێن په‌كه‌كێ، دخوازه ئالیكاریێن ناڤبه‌را په‌كه‌كێ و ته‌هرانێ ده ب به‌شه‌ك ژ خه‌باتا كوردان بده نیشان دان و دبێژه: «ئه‌و وه‌ختا كو په‌كه‌كێ بنگه‌ها ته‌ندورستیێ یا تایبه‌ت ب خوه ڤه ل ئۆرمیێ هه‌یی، ل هه‌مان ده‌مێ په‌كه‌كێ و پاسداران ل چیایان شه‌ر دكر و شه‌هید هه‌بوون، ل داویێ ژی ئه‌ڤ به‌رپرسێ په‌كه‌كێ دبێژه: لۆژیكا تێكلیێن په‌كه‌كێ، لۆژیكه‌كه تایبه‌ته، لۆژیكه‌كه نوو یه».
هه‌گه‌ر گه‌له‌ك ب كورتی ل داخوه‌یانیێن ڤی به‌رپرسێ په‌كه‌كێ مێزه بكین، وێ ژ بۆ مه ئه‌شكه‌ره به كو ب راستی لۆژیكا تێكلیێن په‌كه‌كێ نوویه و ل گه‌ل چ عه‌قل و مه‌نتقه‌كی نا گونجه، ئالییه‌ك بخوازه به‌شه‌كا خاكا ولاته‌كێ دن جودا بكه و د ره‌وشا شه‌ر ده بن و د هه‌مان ده‌مێ ده تێكلیێن نێز ل گه‌ل هه‌ڤ هه‌بن، بریندارێن وان ته‌داوی بكن و ئالیكاری و دۆستایه‌تییا وان بگه‌هه ئاسته‌كی كو نوونه‌راتییه‌كه ئه‌شكه‌ره هه‌به و یه‌ك ژ رێبه‌رێن وێ وه‌كه نوونه‌ر ل پایته‌ختا ولاتێ دوژمن سه‌ربه‌ست ته‌ڤ بگه‌ره، ب راستی ئه‌ڤ لۆژیكێ نوو ته‌نێ هه‌گه‌ر د په‌كه‌كێ ده هه‌به.
دیاره ئه‌وا كو باس ل داخستنا ئۆفیسا تێكلیێن په‌كه‌كێ ل ته‌هرانێ تێ كرن، تو راستییه‌ك ژ بۆ نینه، به‌لكو راستی ئه‌ڤه كو ژ به‌ر زه‌ختا جادده‌یا كوردی و ئیرانی و ل سه‌ر پێشنیازا حكوومه‌تا ته‌هرانێ ئه‌ڤ نوونه‌راتییا كو جاران یا ئه‌شكه‌ره بوو، د نها ده ب نهێنی كارێن خوه دكه، ژ بۆ ڤێ مه‌به‌ستێ ژی، سیناریۆ ل سه‌ر داخستنا نوونه‌راتییا په‌كه‌كێ و دلگرانبوونا موراد كارایلان و رێڤه‌به‌رێن دن یێن په‌كه‌كێ هاتنه دانان و جی ب جی كرن، راستی ئه‌ڤه كو بنگه‌هێن په‌كه‌كێ نه ته‌نێ ل ته‌هرانێ به‌لكو ل هنه‌ك جیێن دن ب نهێنی هه‌نه، هه‌موه‌خت دابین كرنا پێدڤیێن په‌كه‌كێ ژ ده‌رمانان د نها ده ته‌نێ ب ئۆرمیێ نه‌هاتنه سینۆر دار كرن، به‌لكو ل باژارێن دن ب نهێنی بنگه‌هێن ته‌ندروستیێ ژ بۆ په‌كه‌كێ هاتنه ته‌رخان كرن.
چما تێكلیێن په‌كه‌كێ ل گه‌ل ره‌ژیما ته‌هرانێ نه‌لۆژیكی نه؟
بێ گومان ره‌وشا وێ ئه‌ردنیگارییا كو كوردستان تێده‌یه كو ل سه‌ر چار په‌رچه‌یان هاتییه دابه‌ش كرن، یان هه‌گه‌ر باشتر بێژین ژ ئالیێ چار دوژمنان ڤه هاتییه دۆرپێچ كرن، وه‌كرییه كو رێخستنێن هه‌ر په‌رچه‌یه‌كا كوردستانێ ژ بۆ ده‌وام كرنا چالاكیین خوه پێویستی ب هه‌بوونا تێكلییان ل گه‌ل ره‌ژیمێن داگیركه‌رێن په‌رچه‌یێن دن یێن كوردستانێ هه‌به، میناك به‌را سه‌رهلدانا گه‌لێ كورد یێ باشوورێ كوردستانێ و ئاڤاكرنا ستاتۆیا سیاسی یا هه‌رێما باشوورێ كوردستانێ، پارتیێن خه‌باتكار یێن رۆژهلاتا كوردستانێ ب ناچاری تێكلی ل گه‌ل حكوومه‌تا به‌غدایێ هه‌بوون، یان ژی پارتیێن رزگاریخواز یێن باشوورێ كوردستانێ ژ به‌را سه‌ربه‌ست كرنا وێ په‌رچه‌یا كوردستانێ، ناچار بوون كو تێكلییان ل گه‌ل ده‌وله‌تا ئیرانێ ئاڤا بكن، لێ به‌لێ جوداهییه‌كه گه‌وهه‌ری هه‌یه و نابه ل چ ده‌مه‌كێ ئه‌م پشت گوهـ باڤێژن، ئه‌و ژی ئه‌ڤه كو نه پارتیێن رۆژهلات خوه ب رزگاركارێن باشوور دانه ناس كرن و نه‌ژی پارتیێن باشوور د به‌رنامه‌یێن خوه دا باس ل رزگار كرنا رۆژهلاتا كوردستانێ كر، لێ به‌لێ پارتییا كاركه‌رێن كوردستانێ په‌كه‌كه خوه ب رزگاركه‌را هه‌ر چار په‌رچه‌یێن كوردستانێ دده ناس كرن، ئانكو ب سلۆگانان دخوازه نه‌خشه‌یا 4 ولاتان ب گوهه‌رینه، له‌وما تێكلی ل گه‌ل هه‌ر چار ده‌وله‌تێن دوژمن هه‌نه!!.
هه‌گه‌ر ب ئاوایه‌كی دن باس بكین، وه‌ختا كو باس ل رزگار كرنا ب یه‌كجار یا هه‌موو كوردستانێ دكه‌ین ب وێ واتایێ تێ كو ئه‌ڤ ده‌وله‌تێن كوردستان داگیر كری وێ به‌شه‌كا خاكا خوه ژ ده‌ست بدن، ئانكو كوردستان وێ بگه‌هه سه‌ربه‌ستیێ، تركیه وێ خاكا باكورێ كوردستانێ ژ ده‌ست بده، رۆژهلاتا وێ ژ ئیرانێ هێته ستاندن، هه‌روها رۆژئاڤا، د ره‌وشه‌ك وها ده كه‌سه‌كی هه‌گه‌ر كێمترین لۆژیك و تێگه‌هشتن هه‌به، وێ ب ئاسانی وێ پرسێ ژ سه‌رێ خوه ده‌ربخه كو هه‌گه‌ر پارتییه‌ك ب سلۆگانا سه‌ربه‌ست كرنا كوردستانێ تێكلی د گه‌ل داگیركه‌رێن كوردستانێ هه‌بن، ته‌نێ وێ د دو حاله‌تان ده به، یان ئه‌ڤه كو ئه‌ڤ ده‌وله‌ت و ته‌ڤاهییا جڤاكا ناڤنه‌ته‌وه‌یی ده‌به‌نگ، نه‌زان و نه‌لۆژیكن، یان ژی ئه‌ڤ پارتی و رێخستنه نه‌ته‌نێ هه‌ر ژ بۆ سه‌ربه‌ست كرنا كوردان ته‌ڤ ناگه‌ره به‌لكو ب به‌شه‌ك ژ پرۆژه‌یا داگیركه‌ران یێ ژ ناڤ برنا بزاڤا رزگاریخوازا نه‌ته‌وه‌یی یا گه‌لێ كورد تێ حه‌ساب كرن.
دیاره بێ گومان جڤاكا ناڤنه‌ته‌وه‌یی ده‌به‌نگ نینه و داگیركه‌رێن كوردستانێ ژی هه‌ر چه‌ند د واره‌كی ده لاواز ژی بن، لێ به‌لێ وان سه‌لماندییه كو ئه‌و د داگیركرنا كوردستانێ ده و د ده‌وام كرنا وێ داگیركه‌ریێ ده، قه‌د ده‌به‌نگ نه‌بوونه.
ژ بۆ كو ته‌ڤگه‌ر و پارتیێن نه‌ته‌وه‌یی یێن كورد بهێن ژ ناڤ برن، پێویسته هێزه‌كه هه‌ڤشێوه‌یی وان وه‌ره ئاڤا كرن
د یه‌ك ژ وان دۆكیۆمه‌نتێن كو د یادێن چالاكیێن سیاسی یێن ئیرانێ ده هاتنه پارڤه‌كرن، ئاماژه ب خاله‌كه هه‌ری كرینگ هاتییه كرن، محه‌مه‌د عه‌لی ره‌جایی كو ل ده‌مه‌كێ سه‌رۆك وه‌زیرێن ئیرانێ بوو و پشتره بوویه سه‌رۆك كۆمار و د ئه‌نجامێ ده د ته‌قینه‌كێ ده هات كوشتن، ئه‌و ب یه‌ك ژ ته‌ئۆریسیه‌نێن ره‌ژیما كۆمارا ئیسلامیی ل ده‌ستپێكا سه‌ركه‌تنا شۆرشا ئیرانێ ل سالا 1979ان تێ حه‌ساب كرن.
ره‌جایی وه‌ختا كو سه‌رۆك وه‌زیر، دخوه‌ست رێیه‌كێ ژ بۆ بێده‌نگ كرنا بزاڤا رزگاریخوازا گه‌لێ كورد ب تایبه‌ت ل رۆژهلاتا ولات ببینه، له‌وما راوێژ ل گه‌ل گه‌لێ بسپۆر كر و یه‌ك ژ وان كه‌سێن كو ره‌جایی راوێژ پێ كری، مه‌لایه‌كێ باژارێ قومێ بوو كو ل سه‌رده‌مێ ره‌ژیما شاهی ب سه‌ده‌ما چالاكیێن وی یێن سیاسی ژ بۆ كوردستانێ هاتبوو نه‌فی كرن و ژ بۆ ده‌مه‌كێ ل ور ژیا بوو.
ئه‌ڤ مه‌لایه ب ره‌جایی ره دبێژه: «دیاره كورد ملله‌ته‌كێ ب ره‌حمه، دلێ وان پاكه، لێ ژ بۆ كو ته‌ڤگه‌ر و پارتیێن نه‌ته‌وه‌یی ژناڤ ببه‌ی، پێویسته هێزه‌كه وه‌كه وان ئاڤا بكه‌ی»، پشتره شانده‌كێ حكوومه‌تا ته‌هرانێ ب سه‌رپه‌رشتییا مه‌هدی بازرگان و ئه‌ندامه‌تییا چه‌مران سه‌ردانا سووریێ دكن و داخوازێ ژ حافز ئه‌سه‌دی دكن كو ژ بۆ ئاڤاكرنا هێزه‌كێ بۆ ژناڤ برنا خه‌باتا رزگاریخوازا گه‌لێ كورد ئالیكاریێ بكه، حافز ئه‌سه‌د د به‌رسڤێ ده دبێژه: «پێویستی ب هێزه‌كه نوو نینه، هێزه‌كا وها وه‌كه هوون دخوازن هه‌یه، وه‌ختا كو شاندا ئیرانێ دپرسه كیژان هێزه؟ ئه‌سه‌د دبێژه په‌كه‌كه‌یه! ».
په‌كه‌كه دخوازه ل ژێر ناڤێ «په‌یوه‌ندیێن ده‌مۆكراتیك» خزمه‌ت كرنا دوژمنێن كوردان مه‌شرووع بكه
سه‌عید و كادرۆیێن دن یێ په‌كه‌كێ پێویسته ل شوونا ب ده‌بنگ زانینا گه‌ل، د وێ راستیێ بگه‌هن كو ئیستدلالا وان ژ بۆ ئالیكاریێن په‌كه‌كێ و ته‌هرانێ هنده ساویلكه كو ب هه‌زاران سه‌فسه‌ته‌یێن به‌تال یێن دن ژی نكارن كراسێ لۆژیكێ ل به‌ردا بكن.
د به‌شه‌كا گۆتنێن ڤی كادرۆیێ په‌كه‌كێ ده، سه‌رجه‌م حیزب و ئالیێن نه‌ته‌وه‌یی و رزگاریخواز ب په‌راوێز خستی و بێ ئاگه‌هـ ژ ره‌وشا سیاسی یا جیهانێ تێن ناڤ كرن و باس ل وێ یه‌كێ دكه كو نابه د گراڤه‌كێ ده بژین، ل ده‌ستپێكێ پێویسته ئه‌ڤێ بێژم، هه‌ر چ كه‌سێ باس ل گراڤێ بكه بلا بكه، لێ به‌لێ په‌كه‌كه و كادرۆ و ئالیگرێن وێ نابه باس لێ بكن، ژ به‌ر كو فه‌لسه‌فه و ستراته‌ژی و سه‌رجه‌م بریارێن چاره‌نڤیساز یێن په‌كه‌كێ ژ گراڤه‌كێ تێن كو ب «ئیمرالی» تێ ناڤ كرن و رێبه‌ر ئاپۆ ل ڤێ گراڤێ ب ئالیكاری و راوێژا دگه‌ل مه‌زنه رایه‌دارێن ده‌وله‌تا تركیێ، په‌كه‌كێ و خه‌باتا كوردان ب هیدایه‌ت دكه.
ئانكو به‌ره‌ڤاژی داخوه‌یانیێن سه‌عید ساعیدی، ئالیكارییا دگه‌ل داگیركه‌ران نه‌ته‌نێ نیشانا جیهانیبوونێ و چاڤ ڤه‌كرنێ نینه، به‌لكو به‌رهه‌مێ بریاردانێ یه ژ گراڤێ!.
ساعیدی د به‌شه‌كا دن یا گۆتنێ، خوه ده ب پێكڤه به‌ستنا ئیدیه‌ما ده‌مۆكراتیك، وه‌كه سه‌رجه‌م سه‌فسه‌ته و ئیدیه‌مێن دارتاشكری یێن دن یێن ئیمرالیێ و په‌كه‌كێ، دخوازه ل ژێر ناڤێ «په‌یوه‌ندیێن ده‌مۆكراتیك» خزمه‌ت كرنا دوژمنێن كوردان مه‌شرووع بكه، له‌وما هه‌گه‌ر ب ڤێ فه‌لسه‌فه و لۆژیكا نوو و تایبه‌تا په‌كه‌كێ به، دوور نینه رۆژه‌كێ په‌كه‌كه ئه‌شكه‌ره باس ل «خیانه‌تا ده‌مۆكراتیك» بكه و ب لۆژیك و عه‌قلانه وه‌سف بكه.
بێرێزییا ڤی كادرۆیێ په‌كه‌كێ ب هه‌ستا گه‌لێ كورد د وێ ده‌مێ ده دگه‌هه گۆپیتكا خوه وه‌ختا كو دبێژه په‌كه‌كه ب هایدارییا ره‌ژیما ئیرانی ل باژارێ ئۆرمیێ بنگه‌ها ته‌ندروستیێ یێ تایبه‌ت ب خوه‌ڤه هه‌یه و هه‌موه‌خت ل چیایێن ئۆرمیێ، سه‌لماسێ و ماكۆ یێن رۆژهلات دگه‌ل پاسدارێن ئیرانێ د شه‌ر ده نه.
په‌كه‌كه و پاسدار شه‌ر دكه‌ن، لێ وه‌ختا گه‌ریلایه‌ك بریندار دبه، ب ئامبۆلانسا پاسداران ژ بۆ ئۆرمیێ تێ ڤه‌گوهاستن ژ بۆ كو وه‌ره ته‌داوی كرن و پشتره جاره‌كه دن چه‌كی ل دژی پاسداران ب ته‌قینه!!
واته په‌كه‌كه ل چیا دگه‌ل پاسدارێن ئیرانێ ده شه‌ری دكه و وه‌ختا كو گه‌ریلایه‌ك بریندار دبه، ب ئامبۆلانسا سپایێ پاسداران ژ بۆ ته‌داویكرنێ ژ بۆ ورمێ تێ ڤه‌گوهاستن ژ بۆ كو وه‌ره چارسه‌ره كرن داكو جاره‌كه دن چه‌كی ل دژی پاسدارێن ئیرانێ هه‌لبگریت! واته په‌كه‌كه و رێبه‌رێن وێ هنده ب روو قایمی گه‌لێ كورد ب خشیم و نه‌زان وێنه دكه كو ئه‌م ب ته‌نێ دكارین بێژین هوون بخوه خشیمن كو هێژان هه‌وه ئاستا هۆشیاری، لۆژیك و مه‌نتقێ كوردان فێهم نه‌كرنه.
خاله‌كه دن یا گرینگ د داخوه‌یانییا ڤی كادرۆیێ مه‌زنێ په‌كه‌كێ ده زه‌لال دبه، ئه‌ڤه كو تێكلیێن په‌كه‌كێ ل گه‌ل ره‌ژیما ته‌هرانێ په‌یوه‌ندییه‌كه سیسته‌ماتیك و ستراته‌ژی یه.
خالەکە دن تێكلی ب وان سلۆگانان هەیە کو پارتییا کارکەرێن کوردستانێ ل سەر کۆنگرەیا نەتەوه‌یی بلند دکە، ب تەنێ ئەڤ بەسە کو بزانین کۆنگرەیەکە نەتەوه‌یی کو نوونەرێ پەکەکێ ل تەهرانێ سەرکرداتییا وێ بکە و کەسەک وەکە سەعیدی ساعیدی ئەنداما وێ بە کو تەکۆشینێ دکە جوداهییا د ناڤبەرا باش و جاشان ده نەهێلە و ئیخانەت کرن ب کوردان ب لۆژیکی بکە، وێ بکارە چ دەستکەفتەکی ژ بۆ کوردان و خەباتا وان یا حەق هەبە؟
د بەشا سسێیان دە وێ باس ل رەڤاندنا زارۆکان و ب کوشت دانا وان ژ بال پەکەکێ ڤە بکین، وێ ب هۆرگلی باس ل زارۆکا 13 سالان یا سەردەشتێ بکین کو ژ بال پەکەکێ ڤە هات رەڤاندن و پشترە ب کوشتن دا، دایکا زارۆکێ د گرتەیەک ڤیدیۆیی دە باس ل بوویەرێن ژ دەست دایینا کەزەبا خوە و سەرەدەرییا نە ئینسانی یا پەکەکێ دکە.
ل بەندا مە بن
