دەرکەت ھۆلێ کو کۆلبەرێ ب ناڤێ کەلەش ئارسانێ ژ ماکوویێ دەرباسی وانێ بووبوو ژ ١٩ تیرمەھێ ڤە ئاگاھی ژێ نەدھات زانین و ئەو ل قەرەقۆلێ ھاتیە راگرتن. ئارسان گۆت ئیشکەنجە لێ ھاتیە کرن و لەشکەران ب ئاموورێن گران ل وان دانە.
ژ باژارێ ماکوویا رۆژھلاتێ کوردستانێ کۆلبەرێ ب ناڤێ کەلەش ئارسان و ٤ ھەڤالێن خوە کۆلبەر شەڤا ١٨ێ تیرمەھێ د سینۆر دە دەرباسی ناڤچەیا ئەبەخێ یا وانێ بووبوون. ئەڤ ٤ رۆژ بوون ئاگاھی ژ ئارسان نەدھات زانین. دەرکەت ھۆلێ کو ئارسان ل قەرەقۆلا ل سەر سینۆر د بن چاڤان دە بوویە.
ئارسان ژ ئاژانسێن نووجەیان رە ئاخڤی و راگهاند: ” دەما مە خواستی سینۆر دەرباس بکین ئەسکەران گولە بەردانە مە و٤ ھەڤالێن من رەڤیان. ژ بەر ئەز بەتلی بووم نەکاریم برەڤم و ھاتم دەستەسەرکرن. ئەز برم قەرەقۆلێ. ل ور ١٩ پەنابەر ھەبوون. من نە گۆت ئەز ژ ئیرانێ مە من گۆت ئەز ژ ئافغانیستانێ مە. ئەز برم قەرەقۆلەک دن. ل وێ قەرەقۆلێ فەرماندارەک و ٦ ئەسکەران ب دار، چاکووچ و ھەسنان ل من دان. ھەر جارێ یەکێ ھلدادان ناڤا خوە و ب ھۆڤیتی لێ ددان. ئەرد ژ خوینێ سۆر دبوون. سێ رۆژان ئیشکەنجە ل مە کرن. مل، لنگ و سەرێ گەلەکان شکەستن.”
ئارسان ئانی زمان کو بێیی دەربارێ وی دە تو موئامەلەیەک وەرە کرن وی ب ١٩ پەنابەران رە دانینە بەر سینۆرێ ئیرانێ و گۆت: “دەما مە خوەست ئەم دەرباسی ئیرانێ ژی ببن ئەسکەرێن ئیرانێ گولە بەردان مە. ئەم رەڤیان و مە خوە وسا رزگار کر.”
ئارسان د بەردەوامیا ئاخافتنا خوە دە، دا زانین کو ئەو ژ نەچاری کۆلبەریێ دکن و وھا گۆت: “ئەم کۆلبەریێ ژی نەکن ئەمێ ژ برچیبوونێ بمرن. ل ئیرانێ تو کارەک نینە. دەما ئەز گرتی، ژخوە من گۆت وێ من بکوژن. خوەدی ئەز خلاس کرم. ل گوندێ ئەز لێ ھاتم گرتن د ٢ سالان دە ٨ جوان ژ ئالیێ ئەسکەرێن ئیرانێ و ترکیێ ڤە ھاتینە قەتلکرن.”
