تەڤی ترکیێ، ئیرانێ ژی ئێریشی هەرێما کوردستانێ کر

تەڤی ترکیێ، ئیرانێ ژی ئێریشی هەرێما کوردستانێ کر

ئیرانێ ب دژواری بنکە و بارەگەھێن پرتیێن رۆژھلاتێ کوردستانێ و چەند گوندێن ناڤچەیا سیدەکانێ ل باشوورێ کوردستانێ تۆپباران کرن.

ل گۆر ئاگاھیان، ئیرۆ ساعەت 10:30 بەری نڤرۆژێ بالافرێن بێ پیلۆتێن سوپایێ پاسداران چەند بارەگەھێن پێشمەرگەیێن پارتیێن رۆژھلاتێ کوردستانێ ل ناڤچەیێن سینۆریی یێن باشوورێ کوردستانێ هەدەف کرن.

بەرپرسێ دەزگەھا فەرمانداریا ھێزا پێشمەرگە یا کوردستانێ یا سەر ب پەدەک-ئیران، کاوە بەھرامی راگھاند، فرۆکەیێن بێ فرۆکەڤان بنکەیێن وان کرنە ئارمانج لێ ت زیانەکە جانی نەبوویە.

کاوە بەھرامی گۆت: “پشتی بۆمبەبارانا بالافرێن بێ پیلۆت، دەمژمێر 11:00 ژی تۆپبارانکرنا ناڤچەیا بەربزینێ ژ ئالیێ ئیرانێ ڤە دەست پێ کر، لێ ت زیانەکە جانی نەبوویە و پێشمەرگەیێن مە سلامەتن.”

ژ سالا ٢٠١٦ان ڤە بەشەک ژ پارتیێن رۆژھلاتێ کوردستانێ، ل ناڤچەیێن سینۆرییێن سەر سینۆرێ رۆژھلاتێ کوردستانێ چەند بنکە و بارەگەھێن خوە دانینە. نھا حزبا دەمۆکراتا کوردستانا ئیرانێ (حەدەکا ئان پەدەکێ)، حزبا دەمۆکراتا کوردستانێ (حەدەک)، کۆمەلەیا شۆرەشگێرا زەحمەتکێشێن کوردستانا ئیرانێ و کۆملەیا زەحمەتکێشان ل ناڤچەیێن سینۆرییێن سەر سینۆرێ پیرانشار و شنۆیێ بارەگەھێن خوە دانینە.

ژ دەما کو وان پارتیان بنکەیێن خوە ل وان ناڤچەیان دانینە، ئیرانێ ھەتا نھا چەند جاران ناڤچەیێن سینۆرییێن باشوورێ کوردستانێ تۆپباران کریە کو زرارەکە مەزن گھاندیە خەلکێ گوندێن سینۆریی و ھەژمارەک گوند ژی ژ بەر وان تۆپبارانان ھاتنە ڤالاکرن.

پوستێن ھەمان بەش