د وێ دەربارێ دە ئەندامێ نڤیسگەھا یاسایی یا ئەنەکەسێ مافناس ردوان سیدۆ راگھاند، ئەڤ یاسایا نوو یا رێڤەبەریا خوەسەر نە رەوایە و یاسایەکە پاشکەتییە. پێویست بوو ڤێ یاسایێ مەرجێن کۆچبەران یێن د پلەیا سێیەم و چارەم ژی ل خوە بگرتا، یان ژی کەسێ نەدیار (کۆچبەر) بکارە ب ریا وەکیلەکی مال و ملکێن خوە بپارێزە و ئیدارە بکە.
دیار کر، ئەڤ یاسا ل دژی پەرەنسیپێن ھەڤپەیمانێن ناڤدەولەتی و مافێن مرۆڤانە. ھەروھا ئەڤ یاسا ل دژی گرێبەستا جڤاکییا رێڤەبەریا خوەسەر و بەلگەنامەیا ھەڤتێگھیشتنا د ناڤبەرا پێکھاتەیێن ھەرەمێ دەیە. د ڤێ حالێ دە، ھەر بریار یان یاسایەک ل دژی گرێبەستا جڤاکی دەرکەڤە، تێ ھلوەشاندن. لێ د ڤێ یاسایا نوو دە ھاتیە کو ئەڤ یاسا ھەر یاسایەکە پێشتر د ڤێ واری دە دەرکەتبە ھلدوەشینە، ئەڤ ژی بەرووڤاژی دەستوورا (گرێبەستا جڤاکی) رێڤەبەریا خوەسەر ب خوەیە.
مافناس ردوان سیدۆ گۆت: ئەم وەک ئەنەکەسە دبینن کو ئەڤ یاسا وەک گەلەک یاسایێن دن یێن رێڤەبەریا خوەسەر، ل دژی بەرژەوەندیێن گەلێ مەیە. دڤێ رێڤەبەریا خوەسەر ڤێ یاسایێ ھلوەشینە، یان سەرەراست بکە.
دا زانین: نھا دانووستاندن د ناڤبەرا ئەنەکسێ و پارتیێن رێڤەبەریا خوەسەر دە ھەنە، ھەر بریارەک ل دژی بەرژەوەندیێن گەلێ مە بە، د وان دانووستاندنان دە تێ گوفتووگۆکرن. ھەروھا د دانووستاندنان دە ژی لێڤەگەر و پێداچوون ژ ھەموو بریار و یاسایێن گرێبەستا جڤاکی رە تێ کرن، ژ بۆ بێنە سەرەراستکرن و بکەڤن بەرژەوەندیێن گەل.
ئەندامێ نڤیسگەھا یاسایییا ئەنەکەسێ دیار کر ژی: ڤێ یاسایێ رۆلا دادگەھان د چارەسەرکرنا پرسگرێکان دە نەھیشت. بەرووڤاژی ڤێ یاسایێ، دڤێ یاسایەک ھەبا کو کەسێ دەستێ خوە دەینە سەر مال و سامانێن کۆچبەران، بێ سزادان.
