مه‌زلووم عه‌بدی ژ كوڕێ خۆشتڤی یێ ئۆجالانی به‌ر ب تاوانبارییا جه‌میل باییكی
پاش ده‌ربازبوونا عه‌بدوللا ئۆجالان، سه‌رۆكێ زیندانكری یێ په‌كه‌كێ بۆ سووریێ و مانا وی ل باژارێ كۆبانێ ل مالا بابێ مه‌زلووم عه‌بدی ل ڤی باژاری، ل وی ده‌می مه‌زلووم عه‌بدی سنێله بوو، لێ ب ئه‌گه‌را خزمه‌تكرن و نێزیكبوونا وی ژ ئۆجالانی، ده‌ما ئۆجالان ژ كۆبانێ ده‌ركه‌تی ژ بابێ مه‌زلوومی خواست كو مه‌زلوومی ل گه‌ل خۆ ببه‌ت و وه‌ك كوڕێ خۆ بدانیت، له‌وما مه‌زلووم دگه‌ل ئۆجالان ژ كۆبانێ ده‌ركه‌ت، ئه‌و به‌رده‌وام دگه‌ل ئۆجالانی بوو و ب كۆڕێ خۆشتڤی یێ ئۆجالانی ل ناڤ په‌كه‌كێ هاته ناس كرن.
پاش ئۆجالانی مه‌زلووم عه‌بدی هنارته چیایێن باشوورێ كوردستانێ و پشتی به‌شداریكرنێ د چه‌ندین خولێن چه‌كداری و هه‌والگیری دا، ل سه‌ر فه‌رمانا ئۆجالان مه‌زلووم عه‌بدی د ناڤ هێزێن تایبه‌ت دا ده‌ست ب كار بوو و پاش و هه‌ر ژبه‌ر نێزیكبوونا وی ژ ئۆجالانی، بله‌ز پله پێ هاتنه دان هه‌تا كو بوویه به‌رپرسێ هێزێن تایبه‌ت.
هه‌ر ل سه‌ر فه‌رمانا عه‌بدوللا ئۆجالان، پاش سه‌رهلدانا قه‌یرانا سووریێ، مه‌زلووم عه‌بدی بۆ رۆژئاڤایێ كوردستانێ هاته هنارتن و وه‌ك فه‌رماندارێ هێزێن تایبه‌ت یێن په‌كه‌كێ ده‌ست ب كار بوو، د ده‌ما كاركرنا وی دا ل سالێن بووری، ب تایبه‌ت پاش سه‌رهلدانا شه‌رێ داعشێ و ده‌ربازبوونا هه‌ڤپه‌یمانییا ناڤنه‌ته‌وه‌یی یا ل دژی داعشێ بۆ سووریێ و پشتگریكرنا هه‌ڤپه‌یمانان ل مه‌زلووم عه‌بدی ژ بۆ دامه‌زراندنا هێزێن سووریایا ده‌مۆكراتیك ژ پێكهاته‌یێن كورد، ئه‌ره‌ب و سریانی ژ بۆ شه‌رێ دژی داعشێ، ل وی ده‌می جه‌میل باییك، هه‌ڤسه‌رۆكێ كه‌جه‌كێ كه‌ته د بزاڤێن دژاتیكرنا مه‌زلووم عه‌بدی دا و ئه‌و ب كاركرنێ ل گه‌ل ئه‌مه‌ریكایێ ل دژی په‌كه‌كێ تاوانبار كر، له‌وما هه‌ر ژ ده‌ستپێكێ جه‌میل باییكی بزاڤا گوهۆرین و ڤه‌گه‌راندنا مه‌زلووم عه‌بدی بۆ قه‌ندیلی كرن، لێ ئه‌مه‌ریكییان رێ نه‌دا مه‌زلووم بهێته گوهه‌رین و ژ رۆژئاڤایێ كوردستانێ ده‌ربكه‌ڤیت.
پاش جه‌میل باییك ب رێكا كه‌سێن نێزیكی رۆژئاڤایێ كوردستانێ، هه‌ولا ژناڤبرنا مه‌زلووم عه‌بدی دا و چه‌ندین جاران ب رێكێن جودا هه‌ولا تیرۆركرنا وی كر، لێ ژ به‌ر كو مه‌زلووم ژ ئالیێ ئه‌مه‌ریكییان ڤه دهاته پاراستن و زێره‌ڤانی كرن و ل بنگه‌هه‌كێ ئه‌مه‌ریكایێ ل نێزیكی باژارێ حه‌سه‌كێ نیشته‌جێ دبوو و ب ئۆتۆمبێلێن گوللـه نه‌بر د هات و د چوو، مه‌زلووم ژ هه‌موو هه‌ولێن تیرۆركرنێ رزگار بوو.
له‌وما پاش سه‌رنه‌كه‌فتنا بزاڤێن تیرۆر كرنا مه‌زلووم عه‌بدی، جه‌میل باییكی په‌نا بۆ هنده‌ك رێكێن دی یێن ژناڤبرنا مه‌زلوومی برن، ئه‌و ژی ب رێكا نه‌شرینكرن و تاوانبار كرنا مه‌زلووم عه‌بدی د ناڤ رێخستنا په‌كه‌كێ دا، ب ئاوایه‌كی كو دگۆتن مه‌زلووم عه‌بدی ل گه‌ل ئه‌مه‌ریكایێ كاری بۆ لاواز كرنا په‌كه‌كێ و ده‌ركرنا وێ ژ رۆژئاڤایێ كوردستانێ دكه‌ت، له‌وما هه‌ر گاڤه‌ك و سه‌ركه‌فتنه‌كا مه‌زلووم عه‌بدی دبوو جهێ دلگرانیێ بۆ جه‌میل باییكی وتاقما وی ل ناڤا په‌كه‌كێ كو دوماهی گاڤا جه‌میل باییكی ل دژی مه‌زلوومی جوداتر بوو ژ جاران و ڤێ جارێ باییكی ب رێكا كه‌نالێ په‌كه‌كێ ل دژی رێككه‌فتنا مه‌زلووم عه‌بدی ل گه‌ل كۆمپانیایه‌كا په‌ترۆلێ یا ئه‌مه‌ریكی ل رۆژئاڤا كوردستانێ ده‌ركه‌ت.
ئه‌ڤ گاڤا جه‌میل باییكی ل دژی مه‌زلووم عه‌بدی ب وێ رامانێ دهێت كو مه‌زلووم عه‌بدی ئێدێ كادرێ په‌كه‌كێ نینه و بایك ژی ده‌ستهلات ل سه‌ر نه‌مایه و ئێدی كوڕێ خۆشتڤیێ ئۆجالانی بوویه تاوانبارێ پله ئێكێ سه‌ركرداتییا په‌كه‌كێ و باییكی.
