راوه‌سته مه‌زلووم هه‌تا ڤێره و به‌س
ژ دامه‌زراندنا پارتییا كاركه‌رێن كوردستانێ ل سالا 1978ێ، هه‌تا نها ب فه‌رمانا سه‌ركرداتییا ڤێ پارتیێ، ب سه‌دان كادر د پله و پۆستێن جودا دا و هه‌تا دگه‌هیته ئاستاێ سه‌ركرداتیێ هاتنه ژناڤ برن، ئه‌گه‌رێن ژ ناڤ برنا وان گه‌له‌ك د ساده بوون ب ئاوایه‌كی كو ل سه‌ر هزر و بیرێن جودا ژ هزرێن سه‌ركرداتییا په‌كه‌كێ، زیره‌كی و هه‌ستا نه‌ته‌وه‌یی یا كو بوویه ئه‌گه‌ر كو خۆشتڤی ببن د ناڤ رێخستنێن په‌كه‌كێ و جادده‌یا كوردی دا و گه‌هشته ئاسته‌كی كو ژ سه‌ركرده‌یێن په‌كه‌كێ مه‌قبوولتر ببن، كادر د هاتنه ژ ناڤ برن.
مه‌زلووم عه‌بدی وه‌كه كادره‌كێ پێشكه‌فتی یێ په‌كه‌كێ، باش د سیاسه‌تا سه‌ركرداتییا ڤێ پارتیێ دگه‌هیت و باش دزانیت كو گاڤێن وی بووینه جهێ دلگرانییا جه‌میل باییكی و تاقما وی، چونكه جه‌میل باییك و تاقما وی ل رۆژئاڤا كوردستانێ ب تا‌یبه‌ت ئالدار خه‌لیل، نه‌شێن وێ راستیێ قه‌بوول بكه‌ن كو كه‌سه‌كی وه‌ك مه‌زلووم عه‌بدی ببیته جهێ بالكێشانا ئه‌مه‌ریكایێ و ب جه‌نه‌رال بهێته ناڤ كرن و ئه‌و هه‌تا نها وه‌كه هه‌ڤال بمینن، هه‌روه‌ها باییك و ئالدار قه‌بوول ناكه‌ن مه‌زلووم عه‌بدی ل ئاستا رێخستنێن په‌كه‌كێ و جادده‌یا كوردی دا ژ وان مه‌قبوولتر بیت و كار ژ بۆی یه‌كرێزییا مالا كوردی ل رۆژئاڤا بكه‌ت و ب ره‌فتارێن خۆ بێژیته رێڤه‌به‌رییا په‌كه‌كێ ده‌ست ژ رۆژئاڤا كوردستانێ به‌رده، مه دڤێت وه‌ك كوردێن رۆژئاڤا پێكڤه دوور ژ سیاسه‌ت و سیسته‌ما شاش یا په‌كه‌كێ كار بكه‌ین.
ژ به‌ر ڤان ئه‌گه‌ران، نها مه‌زلووم عه‌بدی بوویه پرسگرێكا سه‌ره‌كی یا باییك و ئالدار ل رۆژئاڤا كوردستانێ، وان ب چه‌ندین رێك و ئاوایێن جودا هه‌ول دان خۆ ژ وی رزگار بكه‌ن، ژ وان هه‌ولان: ڤه‌گه‌راندن ژ بۆ قه‌ندیلی، گه‌ف كرن ب ته‌سفییه‌كرنێ، هه‌ولا تیرۆر كرن و تا‌وانبار كرنا وی ب كار كرنێ ل گه‌ل ئه‌مه‌ریكایێ ژ بۆ لاواز كرنا په‌كه‌كێ ل رۆژئاڤا، لێ ب ئه‌گه‌را پشتگرییا ئه‌مه‌ریكایێ ل مه‌زلووم عه‌بدی، هه‌موو هه‌ولێن باییك و ئالدار سه‌رنه‌كه‌فتن.
ب رێككه‌فتنا داویێ یا مه‌زلووم دگه‌ل كۆمپانیایا په‌ترۆلێ یا ئه‌مه‌ریكی ل رۆژئاڤا كوردستانێ، ئاغایێن باییك و ئالدار یێن ل ئیران و دیمه‌شقێ گه‌له‌ك دلگران بوون، ژبه‌ر كو ئه‌ڤ گاڤا مه‌زلوومی ب خه‌ته‌ر ل سه‌ر پاشه‌رۆژا خوه دزانن، له‌وما ئیران و دیمه‌شقێ فشار ل باییك و ئالدار كر كو ژ رێككه‌فتنا په‌ترۆلێ پاشڤه بزڤرن، لێ مه‌زلووم ژ بریارا خوه لێڤه نه‌بوو و باییك نه‌چار ما ب ئاوایه‌كی راسته‌وخۆ د میدیایێ دا دژاتییا خوه بۆ ئه‌نجام دانا رێككه‌فتنێ و مه‌زلووم رابگه‌هینیت، ب ڤی ئاوایی قۆناغه‌كا دی یا پری پرسگرێك ل نێڤبه‌را باییك و ئالداری ل گه‌ل مه‌زلووم دا ده‌ست پێ بكر و دوریشما (راوه‌سته مه‌زلووم هه‌تا ڤێره و به‌س) ل دژی وی بلند كرن.
