ل ڤێره، گۆتارا نوو یا عه‌بدوللا ئۆجا‌لان بۆ مێشكێ ئه‌منى یێ توركیا بوو خودان گرنگییه‌كا ستراتیجى یا مه‌زن. ئه‌و كه‌سێ رۆژه‌كێ ب زمانێ رزگارییا نه‌ته‌وه‌یى و شۆره‌شا كوردى دئاخفت، ئه‌ڤرۆ ب زمانێ (نه‌ته‌وه‌یا دیمۆكراتیك، براینییا هه‌ڤپشك و مۆدێرنیته‌یا جڤاكى) دئاخفیت.
ئه‌ڤه تێگه‌هێن به‌رفره‌هـ و نه‌رمونۆلن كو رێكێ دده‌ن سنۆرێن نه‌ته‌وه‌یى د ناڤ گوتاره‌كا فه‌لسه‌فى یا جیهانى دا بهێنه حه‌لاندن. ئه‌ڤ گوهۆرینا د گوتارێ دا، نه ته‌نێ بۆ ناڤخۆیا توركیا یه، به‌لكو بزاڤه‌كه بۆ سه‌پاندنا مۆدیله‌كا نوو یا كوردبوونێ ل سه‌ر ته‌ڤایا ناوچێ، دا كو هه‌مى پارچه د چارچۆڤه‌یێ فه‌لسه‌فه‌یه‌كا بێ سنۆر دا بهێنه حه‌لاندن.
ل ڤێره، د ناڤ جاده‌یا كوردى دا ئێك ژ ئالۆزترین قەیرانێن هزرى د دیرۆكا نوو یا دۆزا كوردى دا په‌یدا بوو. چونكى گه‌له‌ك ژ گه‌نجێن كورد هه‌ست دكه‌ن ئه‌ڤ گوتاره نه وه‌ك وى خه‌ونێ یه یا كو ب نه‌ته‌وه ل پێناڤ وێ هاتینه شه‌هید كرن. كورد نه‌چووینه د زیندانان دا، گوندێن وان نه‌هاتینه سۆتن و ب ده‌هان سالان ئاواره نه‌بووینه دا كو ل دوماهیێ دۆزا وان ببیته دانوستاندنێن فه‌لسه‌فى یێن ڤه‌كرى ل دۆر «براینییا مرۆڤایه‌تى» د ناڤ وێ ده‌وله‌تێ دا یا كو ژ بنه‌ره‌ت دا هه‌بوونا وان ئینكار دكه‌ت.
ژ به‌ر هندێ، پرسیاره‌كا گران ب بێده‌نگی د ناڤ هشیارییا نوو یا كوردى دا سه‌رهه‌لدایه:
ئه‌رێ ئه‌و تشێ روو دده‌ت پێشكه‌فتنه‌كا فكرى یا سروشتى یه… یان ژى ئه‌ندازیارییه‌كا نوو یا دۆزا كوردى یه ل ژێر چاڤدێرییا مێشكێ ئه‌منى یێ توركیا؟
ئه‌ڤ پرسیاره ژ نه‌بوونێ نه‌هاتیه. دیرۆكا رۆژهه‌لاتا ناڤین ته‌ژییه ژ كه‌سایه‌تیێن كو ب پرۆژه‌یێن شۆره‌شگێرى یێن نه‌ته‌وه‌یى یێن توند چووینه زیندانێ، پاشى یان ل وێرێ گوهۆرین ب سه‌ر دا هات یان ژى ده‌ركه‌فتن و بوونه كه‌سایه‌تیێن گه‌لپارێزى و نوقمى ناڤ فه‌لسه‌فێن روویت و تێگه‌هێن سه‌ر ب نه‌ته‌وان بوون. چونكى زیندانا درێژ ب ته‌نێ جه‌سته‌ى ناشكێنیت، به‌لكو په‌یوه‌ندییا مرۆڤى و دۆزا وى ژ نوو ڤه ئاڤا دكه‌ته ڤه.
ئه‌رێ ئه‌و تشێ روو دده‌ت پێشكه‌فتنه‌كا فكرى یا سروشتى یه… یان ژى ئه‌ندازیارییه‌كا نوو یا دۆزا كوردى یه ل ژێر چاڤدێرییا مێشكێ ئه‌منى یێ توركیا؟
ل ڤێره ژیرییا ستراتیجییا نوو یا توركیا دیار دبیت. ئه‌نقه‌ره ئێدى نه وه‌ك ده‌هیێن بۆرى بزاڤێ دكه‌ت ناسنامه‌یا كوردى ب ئێكجارى بكوژیت، چونكى وێ رێكێ شكه‌ستنا خۆ سه‌لماند، به‌لكو بزاڤێ دكه‌ت وێ ناسنامێ بكه‌ته «ناسنامه‌یه‌كا فۆلكلۆرى» یا كو چ پرۆژه‌یێن سیاسى ل پشت نه‌بن.
