ئێک ژ ئەفسەرێن بەرێ یێن CIA پشتی کو دانپێدان ب سیخوری یا دو ئالی کری ب تاوانا فرۆتنا نهێنی یێن ئەمریکایێ بۆ چینێ ھاتە گرتن.
ل گۆرەی نووچەیا بی بی سی نیۆز، ئەلکساندەر یاک چینگما، ئەفسەرێ ٦٧-سالی یێ ئاژانسا ئیستیخباراتی یا ئەمریکایێ CIA کو د ناڤبەرا سالا ١٩٦٧ و ١٩٨٩-ێ دا ژ بۆ ڤێ ئاژانسێ کار کریە، بەشەک ژ خزمەتا خوە ل ناڤچەیا ئاسیایا رۆژهەلات و دەریایا ئارام ئەنجام دایە.
لەکۆلینڤان دبێژن چینگما، 12 سالان پشتی بجیهێلانا ئاژانسێ، ب کێمی ڤە دگەل پێنج ئەفسەرێن وەزارەتا ئیستیخباراتا ولاتێ چینێ هەڤدیتن ئەنجامدانە. هەڤدیتن ل ئۆتێلەکەکا ل ھۆنگ کۆنگێ پێک ھاتنە کو د ڤان هەڤدیتنان دا وی “رێژەیەک بەرچاڤ ژ زانیاریێن بەرگری یێن پڕ نەهێنی یێن ئەمریکایێ” دایینە دەست کاربدەستێن چینێ.
ئەڤ زانیاریە پێک تێن ژ هۆرگلییێن ئاژانسا ئستخباراتا ئامەریکایێ CIA، پێناسا ئەفسەرێن CIA و سیخورێن وان، هەر وەها شێوازێن ڤێ ئاژانسێ ژ بۆ پەیوەندیێن نەهێنی.
چینگما پشتی بجیهێلانا CIA وەکو زمان ناسێ چینی ل ئۆفیسا هۆنۆلۆ یا FBI دەست ب کار بوو. ناڤبووری تاوانبارە کو د دەما ئەنجامدانا کارێن خوە ل ڤێ ئۆفیسێ دا، ژ کارێ خوە مفا وەرگرتیە بۆ کۆپی کرنا سەنەد و وێنەیێن سیستەمێن مۆشەکی و زانیاریێن دی یێن FBI.
FBI پشتی هایدار بوون ژ کارێن ڤی ئەفسەری کارمەندەکێ خوە یێ نەهینی وەکە هنارتیەکی دەولەتا چینێ شاندە جەم چینگما و هەڤدیتنێ دگەل ئەنجام ددە. ئەڤ یەکە ژ بۆ وێ چەندێ بوو کو بزانن “چینگما چەند پارە ژ چینێ وەرگرتینە”. د ڤیدیۆیەکی دە کو FBI تۆمارکرییە چینگما د دەمەکی دا دهێتە دیتن کو ئەو مژوولی هژمارتنا وان پارەیا یە کو کارمەندێ نهێنی یێ FBI رادەستی وی کرینە، ئەو پارە 2 هەزار دۆلار بوون. کارمەندێ نەهینێ راگهاندیە ئەو پارە ژ بۆ ڤێ یەکێ بوون کو ئیسبات بکەت ئەو ژ لایێ چێنێ ڤە هاتیە شاندن.
هەر وەها یەک ژ خزمێن چینگما، زلامەک 85 سالی کو پێش نها ژ بۆ CIA کار دکر، ژ بۆ چینێ سیخوری کریە، لێ بەلێ ژ بەر ژیێ وی و «بێهێزبوونا هزری» نەهاتیە بنچاڤکرن.
