زارۆك و سنێله‌ هێشتا سۆته‌مه‌نییا شه‌رێ په‌كه‌كێ نه‌

زارۆ و سنێله‌ سۆته‌مه‌نییا شه‌رێ په‌كه‌كێ نه‌

ناڤه‌ندا راگه‌هاندن و چاپه‌مه‌نیێ یا هه‌په‌گێ، ئیرۆ ناسنامه‌یا دوو گه‌ریلایێن كو ل ڤێ مه‌هێ جانێ خوه‌ ژ ده‌ست داینه‌ ئاشكرا كر، یه‌ك ژ وان كچه‌كا بچووكه‌ كو پێدڤییه‌ ل شوونا تڤه‌نگێ، بووكه‌كا «باربی» د ده‌ست دا با.

هه‌په‌گێ د داخویانییا خۆ دا ئاشكرا كرییه‌ كو هه‌ردوو گه‌ریلایێن وان یێن ب ناڤێ «محه‌مه‌د سه‌دیق و هاجه‌ر مووسا» د ئێریشه‌كا ده‌وله‌تا تركیێ دا ل چیایێ گابارێ یێ پارێزگه‌ها شرنه‌خێ ل باكورێ كوردستانێ جانێ خوه‌ داینه‌.

هاجه‌ر مووسا وه‌ك‌ هه‌په‌گێ وێنه‌یێ وێ به‌لاڤ كری، كچه‌كا بچووكه‌ كو مرۆڤ دشێت ببێژیت هێژان د ژیێ سنێله‌یێ دایه‌ و د ڤی ته‌مه‌نی دا د سیسته‌م و ئه‌خلاقێ چ كۆمێن مرۆڤان، ولات و پارتیێن چه‌كدار دا نینه‌ بهێنه‌ چه‌كدار كرن، یان د شه‌ران دا بهێنه‌ بكارئینان.

هه‌په‌گێ ته‌نێ گۆتییه‌ كو ئه‌ڤ گه‌ریلا ل چیایێ گابارێ شه‌هید بوویه‌ و ده‌م و جهێ شه‌هاده‌تێ ل گه‌ل هنده‌ك وێنه‌یێن وێ به‌لاڤ كرینه‌ و چ ئاماژه‌ ب ته‌مه‌نێ وێ كچێ یان مێژوویا ژ دایكبوونا وێ نه‌دایه‌.

هاجه‌ر مووسا، وه‌ك هه‌په‌گێ به‌لاڤ كری خه‌لكا باژارۆكێ تربه‌سپیێ یێ رۆژئاڤا كوردستانێ یه‌ و د ناڤا رێزێن په‌كه‌كێ دا ب كۆد ناڤێ وارشین عه‌گید د هات ناس كرن.

پارتییا كاركه‌رێن كوردستانێ و ب تایبه‌ت پاش كو ل سالێن دوماهیێ هه‌ژماره‌كا زۆر یا گه‌ریلایێن وێ ب ئه‌گه‌را سیاسه‌تا شاش یا وێ پارتیێ ده‌ست ژ رێزێن وێ به‌ردای، په‌نا بۆ ره‌ڤاندنا زارۆیان برییه‌، پێگه‌ها داركا مازی ل رۆژێن 9 و 10/8/2020ێ مژارا بكارئینانا په‌كه‌كێ بۆ زارۆیان ب به‌رفره‌هی ل ژێر ناڤێ «گەرەنتییا بەرداوامییا پەکەکێ: شەرڤانێن زارۆک» و «تایما کورد شەرڤانێن زارۆک یێن پەکەکێ نیقاشکر» به‌لاڤ كربوو و تێدا به‌حسا وێ یه‌كێ كربوو كانێ په‌كه‌كه‌ ب چ ئاوایی زارۆكێن كوردستانێ دكه‌ته‌ سۆته‌مه‌نییا شه‌رێ خۆ.