كۆمێن چه‌كدارێن گرێدای سوپایێ تركیێ، ل سه‌ر هه‌وێن خوه یێن ب سه‌ر داگرتنا مالێن وه‌لاتیێن رۆژئاڤایێ كوردستانێ ب تایبه‌ت ل باژارێن ژێر كۆنترۆلا وان دا به‌رده‌وامن، 10 كه‌س ل شێراوا هاتنه ده‌سته‌سه‌ر كرن، ژن و كاله‌مێر د ناڤ دا هه‌نه.
ل گۆر نه‌رینگه‌ها سووری یا مافێن مرۆڤان، رۆژا پێنجشه‌می 27/8/2020ێ، كۆمێن چه‌كدارێن گرێدای تركیێ، ل گوندێ كۆرزلیێ یێ سینۆرێ ناڤچه‌یا شێراوا گرێدای هه‌رێما عه‌فرینێ، ب سه‌ر مالێن هه‌ژماره‌كا وه‌لاتییان دا گرتنه و 10 كه‌س ده‌سته‌سه‌ر كرنه و هه‌یا ئیرۆ چاره‌نڤیسا وان نه‌دیاره.
هه‌روه‌ها ده‌ست نیشان كر، كه‌سێن ده‌سته‌سه‌ر كری 5 ژێ ژن بوون و 2 كاله‌مێر، 6 ژ وان سه‌ربه‌ست به‌ردان و 4 ل گه‌ل خوه بۆ جهه‌كێ نه‌دیار برنه.
نه‌رینگه‌ها سووری ئه‌شكه‌ره كر كو چ ئه‌گه‌ر و جینایه‌ته‌كا ده‌ست نیشان كری ژ بۆ ده‌سته‌سه‌ر كرن و هه‌وێن ب سه‌ر دا گرتنا مالان ل هه‌رێما عه‌فرینێ نینه.
تێ زانی ئه‌ڤ ده‌ما پێتری مه‌هه‌كێ یه، هه‌وێن ب سه‌ر داگرتنا مالا ل هه‌رێما عه‌فرینێ و ناڤچه‌یێن وێ ژ بال میلیشیایێن گرێدای تركیێ دژوار بوونه، ب وێ سه‌ده‌مێ ب ده‌هان وه‌لاتی هاتنه ره‌ڤاندن و ب گۆتنا وه‌لاتیێن عه‌فرینێ میلیشیا فدیێ ژ بۆ ئازاد كرنا گرتییان دخوازن و هه‌ری كێم ژ بۆ سه‌ربه‌ست به‌ردانا هه‌ر كه‌سه‌كی، پێدڤییه 6 هه‌زار دۆلار ب وان بهێنه دان.
