رێڤەبەریا خوەسەر و ھەسەدێ میکانیزمەکا سکالاکرنێ ل دژی بچەککرنا زارۆکان دیارکر

رێڤەبەریا خوەسەر و ھەسەدێ میکانیزمەکا سکالاکرنێ ل دژی بچەککرنا زارۆکان دیارکر

پشتی کو بچەککرنا زارۆکان د ناڤا هەسەدێ دا کارڤەدانێن ناڤخۆیی و دەرەکی ل دووڤ خۆ ئینای و گەلێ کورد و جڤاکا ناڤنەتەوەیی کارڤەدان ل دژی ڤێ چەندێ دیار کری و نەرازیبوونا خۆ دیار کری، رێڤەبەریا خوەسەر دگەل هێزێن سووریا دیمۆکراتیک (ھەسەدێ) ژ بۆ رێگرتن ل بچەککرنا زارۆکان، میکامیزمەک ژ بۆ سکالایێن هەموەلاتیان دیار کر.

رێڤەبەریا خوەسەر و ھەسەدێ د داخویانیەکا ھەڤبەش دا راگەھاند، وان میکانیزمەک دانایە، ژ بۆ وەلاتی، خێزان و لایەن و رێخستنێن مرۆڤی بشێن سکالایێ ل دژی ھەر پرۆسەیەکا بچەککرنا زارۆکان ژ لایێ ھەسەدێ و ھێزێن د ناڤا وێ دا تۆمار بکەن.

د جێ داخویانیا هەڤبەش دا ھاتیە، ل گۆر پلانا کارا د ناڤبەرا ھەسەدێ و نەتەوێن یەکگرتی دا کو د ٢٩ێ خزیرانا ٢٠١٩ێ دا ھاتیە ئیمزاکرن و ژ بۆ رێگرتن ل بچەککرنا زارۆکان و جوانێن د بن ١٨ سالیێ دا، ئەڤ میکانیزمە ھاتیە دانان.

د داخویانیێ دا ھاتیە تەکەزکرن، رێڤەبەریا خوەسەر و ھەسەدێ پابەندی ھەموو پیڤان و یاسایێن ناڤدەولەتی یێن تایبەت ب پاراستن و مافێن زارۆکان دبن.

د دەما دوماهیێ دا گەلەک گلی و گازن ژ ئالیێ خەلکێ رۆژاڤایێ کوردستانێ و رێخستنێن مرۆڤی دا ھاتن کرن کو ھەسەدە و ھێزێن د ناڤا وێ دا، ھەژمارەک زارۆک و جوانێن د بن ١٨ سالیێ دا برنە و ژ بۆ چالاکیێن چەکداری ب کار تینن.

شرۆڤەکارێن سیاسی ڤێ داخویانیا هەڤبەش ب دانپێدانەک ئاشکرا دزانن ژ لایێ رەڤەبەرییا خوەسەر و هەسەدێ ڤە کو زارۆکان چەکدار دکەن، هەرچەند کو پێش نها رێڤەبەرییا خوەسەر و هەسەدێ چەندین جاران راگهاندبوو کو ئەو زارۆکان چەکدار ناکەن و ئەڤ کارە ب پرۆپاگەندێن دوژمنان ددا زانین، لێ ب گۆتنا ڤان شرۆڤەکاران دەرکرنا داخویانیەک ب ڤی رەنگی دانپیدانەک ئاشکرا و زەلالە ب چەکدارکرنا زارۆکان ژ لایێ هەسەدێ و ئەڤ کارە د یاسایێن ناڤدەولەتی دا ژی قەدەغەیە، ژبەرکو ل دژی مافێن زارۆکانە.

پوستێن ھەمان بەش