جڤینا ماكرۆن و نێچیرڤان بارزانی دێ ئه‌ڤ مژاره بن
سه‌رۆكێ هه‌رێما باشوورێ كوردستانێ، ئیرۆ سه‌رۆكاتییا شانده‌كی ژ بۆ به‌غدایێ كر، ئه‌ڤ سه‌ردان ژ بۆ جڤینا ل گه‌ل سه‌رۆكێ فره‌نسایێ هاتییه ئه‌نجام دان كو ئیرۆ گه‌هشتییه به‌غدایێ.
ئیمانوێل ماكرۆن سه‌رۆكێ فره‌نسایێ ئیرۆ گه‌هشته به‌غدایێ، ماكرۆن دێ دگه‌ل سێ سه‌رۆكاتیێن ئیراقێ و هه‌روه‌ها سه‌رۆكێ هه‌رێما باشوورێ كوردستانێ، جڤینان پێك ئینیت.
ژ بۆ ڤێ جڤینێ كو دێ پاش نیڤرۆ هێته ئه‌نجام دان، نێچیرڤان بارزانی ئیرۆ گه‌هشته به‌غدایێ و دگه‌ل مسته‌فا كازمی سه‌رۆك وه‌زیرێ ئیراقێ جڤییا، نێچیرڤان بارزانی دێ دگه‌ل به‌رهه‌م سالح سه‌رۆك كۆمار و محه‌مه‌د حه‌لبووسی سه‌رۆكێ پارلمه‌نا ئیراقێ ژی بجڤیت.
جڤینا سه‌رۆكێ باشوورێ كوردستانێ و سه‌رۆكێ فره‌نسایێ، ل سەر داخوازا ماكرۆن بوویە و ئیرۆ پشتی نیڤرۆ دێ هێته ل دارخستن، ماكرۆن دێ تەنێ چەند دەمژمێران ل به‌غدایێ مینیت.
ل گۆر ئاگاھییان، مژارا سەروەرییا ئاخا ئیراقێ، مژارەکا سەرەکی یا گۆتووبێژێن ماكرۆن و بەرپرسێن ئیراقی و کوردستانێ یە، هه‌روه‌ها مه‌له‌فا پشتگرییا فره‌نسایێ ژ بۆ هه‌رێما باشوورێ كوردستانێ، ئەو یەک ژی د دەمەکێ دەیە کو زێدەتری دو مەھانە ترکیە د ناڤ ئاخا باشوورێ کوردستانێ و ئیراقێ دا، ئۆپەراسیۆنێن سەربازی پێک دئینیت.
پرسگرێکێن ناڤبەرا ئامەریکا و ئیرانێ د ناڤ سنۆرێ ئیراقێ دا، دێ مژارەکا دی یا گۆتووبێژێن ھەردو ئالییان بیت.
تێ زانین فره‌نسا ب یێك ژ وه‌لاتێن دۆستێن دێرین یێن باشوورێ كوردستانێ دهێته هه‌ژمارتن، د ته‌ڤ كریزان دا ژ وه‌لاتێن پێشه‌نگ بوویه د پشتگری و ئالیكارییا كوردستانێ دا.
