ئارتێشا ترکیێ ئۆپەراسیۆنێن خوە ل ھەرێما کوردستانێ ب دوماهی ئینان

ئارتێشا ترکیێ ئۆپەراسیۆنێن خوە ل ھەرێما کوردستانێ ب دوماهی ئینان

ئارتێشا ترکیێ ئۆپەراسیۆنێن خوە (ئۆپەراسیۆنێن پەنجکێ)یێن ل ناڤچەیێن سنۆری یێن ھەرێما کوردستانێ ب دوماهی ئینان.

وەزارەتا بەرەڤانیێ یا ترکیێ د داخویانیەکێ دا راگەھاند، ئۆپەراسیۆنا پەنجک-پلنگێ د 16ێ حەزیرانێ دا ل حەفتەنینێ ھاتبوو دەستپێکرن ب داوی بوو.

د داخویانیێ دا ھاتە گۆتن: د ئۆپەراسیۆنا کو ژ ئەسمان و بەژاھیێ دەوام کر دا، کۆماندۆیێن ترکیێ زەرەرەک مەزن ل پەکەکێ دا و د ئۆپەراسیۆنان دا ب تەڤاھی 320 ئەندامێن پەکەکێ ھاتنە بێ باندۆرکرن.

دیار کر ژی، کۆماندۆ کەفتنە 269 ستارگەھ و ھاونگەھان و 53 شکەفتان و گەلەک چەک، جەبلخانە و ئالاڤێن ژیانێ ئێک ب ئێک تێک برن.

وەزارەتا بەرەڤانیێ یا ترکیێ ئاشکرا کر ژی: ل ھەرێمێ 365 تەقەمەنیێن ب دەست چێکری، 11 ماین، رۆکەت هاڤێژێن 10 RPG-7، 125 بۆمبەیێن دەستان، درۆنەک، 26 چەکێن گران، 4 ھاوەن، 143 چەکێن سڤک، 27 ھزار و 693 موھماتێن چەکان، 22 ھەزار و 331 موھماتێن چەکێن گران، 8 مۆشەکێن دژەتانکانێن AT-4، 244 موھماتێن تۆپ/ھاوەنێ، 238 موھماتێن رۆکەتاڤێژێ، 4 جلکێن خوەڤەشارتنێ یێن ب رێکا کامیرایێ نایێن دیتن، ٦ بێتەل و گەلەک ئالاڤێن ژیانێ ھاتنە ژناڤبرن.

ئارتێشا ترکیێ ژ 16ێ حەزیرانا بووری ڤە ل ناڤچەیێن سنۆری یێن ھەرێما کوردستانێ ل دژی پەکەکێ دەست ب ئۆپەراسیۆنێن سەربەزی کر و د ئەنجاما وێ ئۆپەراسیۆنێ دا، ھەژمارەک وەلاتیێن سڤیل شەھید و بریندار بوون، ب دەھان گوندێن ھەرێما کوردستانێ ڤالا بوون و گەلەک زەڤی و باخچەیێن جۆتکاران و چیا و دارستان شەوتین.