مۆدێلا كوله‌تیێ ل هه‌موو دنیایێ نه‌مایه‌، تنێ د ناڤ په‌كه‌كێ دا نه‌بیت

دەزگەهێ رۆشەنبیری و راگه‌هاندنا پارتییا دەمۆکراتا کوردستانێ، بەرسڤەکا ئاگرین دده‌ته‌ پارتییا کارکەرێن کوردستانێ و تێدا ئاماژه‌ ب دیرۆک و بەرخوەدان و سەروەریێن پارتیا دەمۆکرات دكه‌ت، هه‌روه‌ها وان ئاستەنگان کو پەکەکێ ل همبەر باشوورێ وەلات دروست کرینە.

پارتی د بەرسڤا پەکەکێ دا دبێژیت: «ئەڤه‌ دەمەکە کو هەڤسەرۆکێن کەجەکێ مورات کارایلان و دوران کالکان، دەست ب تاوانبار کرنا پارتی کرییە و داخوازا دکه‌ن پارتی به‌رسڤا وان بده‌ت».

د به‌رسڤا پارتی دا هاتییه‌: «ب وێ سیاسەتا شاش یا په‌كه‌كێ هوون هاریكارییه‌كا بێ وێنه‌ بۆ وی ئالی دکه‌ن ئه‌وێ دخوازیت دەستکەفتان ژ ناڤ ببەت، مۆدێلا کۆلەتیێ ل هەموو دنیایێ نه‌مایه‌، د ناڤ پەکەکێ دا نەبیت، سیستەمێ پەروەردە کرنێ د ناڤ پەکەکێ دا کەسێن ئازاد و دەنگ دلێر بەرهەم نائینیت، بەلکو ب تنێ فێری ئیتاعەت و بجهئینانا بریاران دکەت، گەلو کی د ناڤ هه‌وه‌ دا دشێت بۆچوونه‌ك هه‌بیت و کی ژی دشێت د گەل بۆچوونا پەکەکێ دا نه‌بیت و کیژان ئەندامێ هه‌وه‌ دشێت ژ پەکەکێ ڤه‌قه‌تیت»؟

هه‌وه‌ هاژی خۆ هه‌یه‌ كو هوون بووینه‌ ئاسته‌نگ بۆ هه‌موو پارچه‌یێن كوردستانێ

د بەشەکێ دی یێ داخویانییا دەزگەهێ رۆشەنبیری و راگهاندنا پارتییا دەمۆکراتا کوردستانێ دا هاتییە کو، سازیێن مەدیایی یێن پەکەکێ شەری ب پارتی د فرۆشن و مژوولی چەواشەکاری و سووچبار کرنا پارتی نە، لێ دەمێ کو کار دگه‌هیته‌ باس کرن ل دیرۆک و سەروەریێن پارتییا مە و شکۆ و دەستکەفتێن گەلێ کوردستانێ ژ بال هەڤسەرۆک و رایەدارێن پەکەکێ ڤه‌، بێ گومان ئەم بێ بەرسڤ نامینن و ئەم دێ روویێ راست یێ هه‌وه‌ دەرئێخین، ئەم ژ دبێژینه‌ هه‌وه‌: «هه‌وە سه‌حه‌ك ل خۆ كرییه‌ هوون ژ كیڤه‌ هاتینه‌ و نها ل كیڤه‌ نه‌ و هوون ژ بۆ چ دروست بووینه‌ و نها هوون چ دكه‌ن؟ گەلۆ هه‌وه‌ ل خۆ نێری یە ب چ ئاوا هوون بووینە ئاستەنگ ژ بۆ دروستکرنا پاشه‌رۆژ و دەستکەفتێن وان پارچەیێن کوردستانێ کو ب دەریایەکا خوینێ هاتینە ئازاد کرن»؟

ب نه‌رینا په‌كه‌كێ كلیلا كورداتی و وه‌لاتپارێزیێ د به‌ریكا وێ دا یه‌

پارتی ب پەکەکێ گۆتییه‌: «هه‌وه‌ بۆ خۆ تەسەورەکا دوور ژ راستی و لۆژیكێ چێکرییە کو ناسنامەیا کورداتیێ و وەلاتپارێزیێ د بەریکا هه‌وه‌ دا یە! ناسنامەیا خه‌باتێ ژی د بەریکا هه‌وه‌ دا یە و پارادایما هه‌وه‌ پیرۆزە و یا خەلکێ دی نەخێر!… نها باش گوهداری بکه‌ن هەرچەند کو ل جەم رایەدارێن پەکەکێ ب تنێ دان هەیە و ستاندن نینە)، دەستکەفتێن باشوور بەرهەمێ خوین و قوربانی و بەرخوەدان و شۆرشان و جانفیدائیا شێخ عەبدولسەلام بارزانی و شێخ مەحموودێ مەلکێ کوردستانێ و شۆرشێن بارزان و شۆرشا ئیلۆنا و گۆلانێ بوون و د دەمەکی دا بوون کو پەکەکە هێژ ژ دایک نه‌ببوو یان ژی گه‌له‌ك ساڤا بوو، ما هوون چ ژ دیرۆكا گه‌لێ مه‌ دزانن»؟

هوون بووینه‌ ئه‌گه‌رێ سه‌رئێشێ ژ بۆ هه‌موو كوردستانێ

د به‌رسڤا پارتی دا وه‌ها هاتییه‌ نڤیسین: «هوون داخوازا بەرسڤێ دکه‌ن! ئەم بەرسڤا چ بده‌ین کو هوون بووینە ئه‌گه‌رێ سەرئێشێ ژ بۆ هەموو کوردستانێ، ل هەر پارچەیەکا کوردستانێ روهنییەکا ب ده‌ركه‌ڤیت هوون خۆ دکه‌نه‌ تێدا و كاری بۆ ژ ناڤ برنا وێ دکه‌ن! ژ خۆ نابیت هوون ل هێڤیێ بن ئەم دگەل ڤێ سیاسەتا شاش و نەلۆژیکی یا هه‌وه‌ دا بین».

پارتی د بەردەوامییا بەرسڤا خۆ دا باس ل ئالیێ ئەخلاقی دکەت و دبێژیت: «هوون دخوازن هێجەتا بۆ شکەستنێن خۆ یێن سیاسی و لەشکری و دیپلۆماسی پەیدا بکه‌ن، وژدانێ ژ ده‌ڤ رایەدارێن پەکەکێ بار کرییە و هوون وەختە خۆ بكه‌ن وانەبێژێن ئەخلاقی؟ دێ دا ئەم بۆ هه‌وه‌ بێژین كانێ ئەخلاق چی یە؟، دروستکرنا پرسگرێکا و هەولدان بۆ ژ ناڤ برنا دەستکەفتێن هەرێما کوردستانێ بێ ئەخلاقی یە، بێ ئەخلاقی داگیرکرنا گوندێن خەلکی یە، بێ ئەخلاقی ئەڤەیه‌ کو ببێژی بلا لەشکرێن ترکیێ بهێن لێ نابیت پێشمەرگە بهێته‌ ده‌ڤه‌رێ! خاپاندنا زارۆکێن کوڕ و کچێن ڤی وەلاتی و ب کوشتن دانا وان بۆ پاراستنا سنۆرێن دەولەتان بێ ئەخلاقی یە… هوون دبێژن ئەم چەکان بێ دەنگ ناکه‌ین، هوون بوومه‌ نابێژن د هەرێمەکا ئازاد کری دا هه‌وه‌ چەک بۆ چی یە و دگەل کێ دا شەری دکه‌ن؟ هوون بوو مه‌ نابێژن ڤێتناما هه‌وه‌ چ ب سەری هاتییه‌»؟

به‌سێ هۆزات هه‌ر ته‌ڤره‌كی ل ئه‌رده‌كی دده‌ت

د داخویانییا پارتی دا ل سەر ئاخافتنا بەسێ هۆزات ژی زەلال کرن هاتییە دان، پارتی د بەرسڤا وێ دا دبێژیت: «بەسێ هۆزاتا هەڤسەرۆکا هه‌وه‌ ژ ئالیەکێ دبێژیت دەستێ پارتی دگەل دەولەتا ترکیێ هەیە بۆ ژ ناڤ برن وقەتلعامێ و ئەخلاقێ پارتی تونەیە و….! و ئەو ب خۆ ژ ئالیەکێ دی دبێژیت پێدڤییه‌ پارتی ب دەولەتا ترکیێ ببێژیت: پێدڤییه‌ ب رێكێن دەمۆکراسی پرسگرێک دگەل کوردان بهێنه‌ چارەسەر کرن و مافێ گەلێ کورد ل باکورێ کوردستانێ بده‌ن»!

پارتی ل سەر رەوشا شەنگالێ ژی ب ڤی ئاوایی بەرسڤا پەکەکێ دا یە: «ل دەربارا شەنگالێ ژی ئەم جارەکا دی ل بیرا هه‌وه‌ دئینین کو شەنگال بەشەكێ ڤه‌نه‌قه‌تیایی یه‌ ژ کوردستانێ و د هەموو دانوستاندنێن دگەل حکوومەتا عیراقێ دا ژی مە دوپاتی ل سەر ڤێ ئێكێ کرییە و دێ بەردەوام ژی دوپاتیێ ل سەر ڤێ ئێكێ كه‌ین».

ل دوماهییا داخویانییا خۆ دەزگەهێ رۆشەنبیری و راگه‌هاندنا پارتییا دەمۆکراتا کوردستانێ ب پەکەکێ دبێژیت: «گەر هوون گه‌له‌ك درێژ ئاخفتن، نه‌ئاخڤن داکو ئەم ژی ناچار نەبین هنده‌ بەرسڤا هه‌وه‌ بده‌ین کو هوون ئێدی نه‌گه‌هن ماسکێن ل سەر روویێ خۆ جارەکا دی گرێ بده‌ن».