ژ شەرێ خەندەکان یێ 2015ێ هێڤە، پەکەکە د ناڤا تێکچوونەکا ستراتیژیک دا مایە، ب خواستەکا کو رۆژا خوە رابۆرینیت، خوە دوبارە بکەت و د ناڤ رۆژھلاتا ناڤین دا جھەکێ بۆ خوە چێکەت، ڤێ جارێ دخوازیت ل دژی باشوورێ کوردستانێ شەرەکێ ئەنجام بدەت، کا ئەو دێ د ڤی شەری دا سەرکەڤیت یان ژی نە، بابەتەک دی یە، لێ پەکەکە وەک کارێ خوە یێ ههردهم ل دەمێ کو دخوازیت کارەکێ قرێژ ئەنجام بدەت ل دەستپێکێ زەمینەیا ئەنجامدانا ڤی کاری پێش وەخت دروست دکەت داکو پاشان بکاریت بەرپرساتییا دیرۆکی و ئەخلاقی یا ئەنجامدانا ڤی کاری ل سەر خوە نەهێلە، ژ بۆ ئەنجامدانا ڤی شەری ژی پەکەکە نها مژوولی بنگەھ سازییا ڤی شەری یە و دەست ب پرۆپاگاندایەک توند کرییە.
پەکەکە 60% پرۆپاگاندایە
ھێزا سەرەکی یا پەکەکێ ل سەر بنگەھێ چوارینهیا «تۆلھلدان- باوەری- خوین و مرۆڤ» ئاڤابوویە، ئەوێ ژی ب پرۆپاگاندایێ ب دەست خوە ڤە دئینیت، پرۆپاگاندایا ناڤخوە و دەرڤەیی 60٪ ھەبوونا پەکەکێ د ئافرینیت، ئەڤ رێژە نە رێژەیەک مەزنکری یە، نها پەکەکێ بەرێ ھەموو چەکێن خوە یێن پرۆپاگاندایێ داینه حکوومەتا ھەرێما کوردستانێ ژ بۆ ڤێ ئارمانجێ، ژ ئەندامێن دامەزرینەرێن پەکەکێ بگرە حەتا دگەهیتە، رێڤەبهرێ وێ، کارمەندێن وێ حەتا ب چالاکڤانێن وێ، ھەمی ژ لایەنێن جوداڤە پێکڤە کار دکەن.
مژارەک “جەنگا حەفتەنینێ” یە، کو ھەر رۆژ ژ ھێلا ھەمی چاپەمەنییا پەکەکێ ڤە پرۆپاگاندا بۆ دهێتە کرن، ب ڤێ یەکێ زەختێ ل سەر گەل و حکوومەتا باشوور چێدکەن، لێ بەلێ ل حەفتەنینێ چ جەنگ و مەنگ نینن، ھەموو دەڤەرێن حەفتەنینێ ھاتینە داگیر کرن، پەکەکێ حەفتەنین بەردایە، لاشێن گەنجان و باوەرییا وان وەک ئاموورێن چەکا شەری بکار دئینن د دووڤ دا د راگەهاندنێ دا، ب وێنەیێن ب دەڤ کەنی دخوازن خیتابا ھەست و وژدانا گەل بکەن، رێڤەبرێن کو ل باژارێ سلێمانیێ د ناڤا قەسران دا دژین و ل چییا د شکەفتێن حەفت تەبەق د بنێ ئەردی دا ب ئەولەھی دژین ل سەر کەدا ڤان گەنجان سیاسەتێ دکەن و دبێژن بۆچی رێڤەبهرییا باشوور پشتگریێ ل مە ناکەت، پەکەکە ل سەر ژیانا ڤان گەنجان داستانا شەرێ کو د هەبوونێ دا نینە دخوازیت بنڤیسیت، ڤێ رەوشا خوە ژی ل سەر حکوومەتا باشوورێ کوردستانێ دکەتە مننەت.
پەکەکە، ب بەرەڤاژی کرنا دیرۆکا باشوور، ھەر رۆژ نڤیسینێن تایبەت و گۆتاران بەلاڤ دکەت، ھەول د دەت کو پرۆڤاکسیۆنێ “ئاژاوەیەکێ” ل سەر قەیرانا ئابووری کو ل باشوور دهێته ژیان کرن، زێدە بکەت، گەلەک نووچەیێن درەو بەلاڤ دکەت، ئەو ژ ھەر لایەکێ ڤە ئانکو ئایدۆلۆژیایهك و پۆلەتیک و ئابووری ھەول د دەت کو ب درەوان ژ بۆ خوە تشتەکی چێکەت، ئەو ھەول ددەت ئۆپۆزسیۆنا کو ل ھەموو وەلاتان ھەیی ل کوردستانێ ژ بۆ خوە بکەتە بنگەھێ قۆرغکرنێ “مۆنۆپۆل کرنێ” کرنێ.
پەکەکە فاشیزمەکا ڤەشارتی ل سەر ھەر کەسێ جودا ژ وێ هزر دکەت د مەشینیت
پەکەکە، تشتێ کو نەشێت مۆنۆپۆل بکەت ژ گۆرەپانێ رادکەت ب سالان، پەکەکێ ل ھەر دەڤەرێ ل باکورێ کوردستانێ و ئەورۆپایێ کەسێن کو پیچەک جودا ژ وێ هزر دکر، بێدەنگ کرنە، پەکەکە ھەر کەسێ کو جودا هزر دکەت وەک سیخۆر، ھەڤکارێ دوژمن و ھەڤالبەندێ داگیرکەران ب ناڤ دکەت، پەکەکێ گرسەیا خوە وەک چیڤ ل سەر جوداھییان ب کار ئینا، یێن مخالف نەکارین دەنگێ خوە دەربێخن، پەکەکێ زەخت ل سەر تاخ و کۆلانێن ئەورۆپا و باکورێ کوردستانێ ب کار ئینا، نھا ئەو ھەول ددەت کو ل باشوور ژی ھەمان تشتی بکەت، دخوازیت کو ھەمی چاپەمەنییا باشوور و کارمەندێن وان ب رێکا میدیایا جڤاکی بێدەنگ بکەت، ب تۆرا میدیایا جڤاکی زەختێ دکەت، وان ھەموویان ب جاش و خزمەتکارێن دژمنی تاوانبار دکەت، ئەو دخوازن رهوشەنبیرێن باشوور ژی چاڤ ترساندی بکەت، راستیێ دەست نیشان بکەن ژی ھەمان تشتی دکەت مخابن، چاپەمەنییا باشوور نکاریت رێکێ ل ڤێ فاشیزما ڤەشارتی یا پەکەکێ بگریت و پاراستنا دەستکەفتێن خوە بکەت، ژ بەر کو ئەو د بن کارتێکرنا شەرێ تایبەتی یێ پەکەکێ دا مانە، نەشێن پرۆپاگاندایا پەکەکێ چارەسەر بکەن و رەوشا پەکەکێ یا ل باکورێ کوردستانێ ژی فێم ناکەن، ژ بۆ ڤێ یەکێ، ب ڤەکری نەوێرن هەلویستا خوە ب زەلالی نیشانی پەکەکێ بدەن، ئەڤ رەوشا چاپەمەنیێ ناھێتە قەبوول کرن.
پێویستە خەباتکار و رەوشەنبیر ژ گەفێن ڤالا یێن پەکەکێ نەترسن
خەلەتییەکا دی یا چاپامەنی و رەوشەنبیرێن باشوور ئەوە کو خوە وەک بێ لایەن و دیمۆکرات دبینن، د سیاسەتێ دا تشتەک وەکی بێ لایەنبوونێ نینە، دەزگەھێن مەدیایی یێن وەک کوردستان 24 و رووداو ژ ھێلا پەکەکێ ڤە ب دەھان جاران ب سیخۆر ھاتینە تاوانبارکرن، نڤیسینگەهێن وان یێن ل رۆژئاڤا ھاتنە گرتن، دەستوور نەدان کو ئەو ل رۆژئاڤا کار بکەن، وان ھەمان زەخت ل باکور ژی دیت، لێ بەلێ، دەزگەھێن راگاھاندنا باشوور ب بەردەوامی بوونە دەنگێ پەکەکێ و سازییێن مینا ھەدەپێ و ل سەر وان راپۆرت بەلاڤ کرن، بێ گۆمان، تشتێن کو د بەرژەوەندییا گەلێ کورد دا دڤێت بهێنە کرن، لێ پێویستە روویێ راست یێ پەکەکێ ژی بهێتە ئاشکرا کرن، بەرژەوەندییا گەلێ کورد د دیتنا روویێ راستین یێ پەکەکێ را دەرباس دبیت.
نموونە، پەکەکێ شێوازێ شەرێ تایبەت هندە پێشڤەبر کو د سالا 2014 ێ دا، وان ب تنێ ئێرشێن داعشێ شکاندنە و ئەو ھێزێن دی یێن کوردستانی ھەموو ب هێزێن لاواز و رەڤی د دانە نیشاندان، ل شهنگال و کەرکووکێ وەکر، گەلەک کەس نھا دفکرن کو پەکەکێ د سالا 2014ێ دا کەرکووک ژ دەستێ داعشێ رزگار کرییە، پەکەکێ ل کەرکووکێ 4 شەھید دانە و پێشمەرگەیان ٢١٠ شەھید دانە، لێ پەکەکێ جەوەک وە چێکرییە کو تنێ پەکەکێ ل ڤان دەڤەران شەر کرییە و ئەو تێگەھشتن ئافراندییە.
ل مەخموور و شهنگالێ فەرماندارێن پایەبلندێن پێشمەرگەی شەرەکێ گەلەک باش کرییە، لێ مینا کو تنێ پەکەکێ ئەڤ دەڤەرە رزگار کرنە تێ فەھم کرن، پەکەکێ ب ڤی شەرێ دەرۆنی سەروەرییا خوە ئاڤاکر، ئەو سیاسەتا شەرێ تایبەت یا ل سەر باشوور ھاتییە مەشاندن، رەوشەنبیر و راگاھاندنا باشوور نەشییابوون کارتێکرنێ و واتەیا ڤی شەری یا تایبەتی فەهم بکەن و نەشیابوون ڤی شەرێ تایبەتی یێ پەکەکێ ب ڤالا دەربێخن، پەکەکێ ئیرۆ ژی ل سەر ڤێ سەرکەفتنا خوە پلانان ل د ژی باشوور چێدکەت.
پێویستە ئێدی رەوشەنبیر و چاپەمەنییا باشوور ڤێ راستیێ ببینیت، جوگرافییا کوردستانێ نە ل ئەسکەندەنافیایێ یە، وەلاتێ مە د ناڤا بازنەیا ئاگری دایە، چ کەسەک نە خودانێ بێلایەن بوونێ و ب شێوازێ رۆژئاڤایی یان وەکو دیمۆکرات تەڤگەریانێ یە، ژ بۆ کو کورد دیمۆکراسیێ بپارێزن، دڤێت دەستپێکێ وەلاتێ خوە بپارێزن، و د سەری دا پێدڤییە کو میتۆدێن شەرێن تایبەتی یێن پەکەکێ بهێنە ڤالا دەرئێخستن، پێویستە کو میدیا و رەوشەنبیرێن راست یێن کوردستانێ دەرکەڤن گۆرەپانێ و پێشیێ ل ڤێ پرۆپاگاندایا خراب یا ل دژی گەلێ کورد بگرن.