ل سووریێ د ئێریشەکێ دا ١٠ چەکدارێن سەر ب ئیرانێ ھاتن کوشتن

ل سووریێ د ئێریشەکێ دا ١٠ چەکدارێن سەر ب ئیرانێ ھاتن کوشتن

رەوانگەھا سووری بۆ مافێن مرۆڤان راگەھاند، چەند فرۆکەیێن نەناس، ل باشوورێ دەڤەرا ئەلبوو کەمال یا سەر سنۆرێ ئیراقێ، پێگەھێن چەکدارێن سەر ب ئیرانێ ڤە، کرنە ئارمانج. د ئەنجامێ دا ١٠ چەکدار ھاتنە کوشتن، کو ژ وان ٨ کەس ژ ئیراقێ نە و دو کەس ژی خەلکێ سووریێ نە.

ئاژانسا نووچەیان AFP ژ زارێ رێڤبەرێ رەوانگەھا سووری بۆ مافێن مرۆڤان رامی زعەبدورەحمان راگھاندیە کو د وێ ئێریشێ دا چەند عەمبارێن چەک و تەقەمەنیێن گرووپێن سەر ب ئیرانێ ژی ھاتنە ژناڤبرن.

رامی عەبدورەحمان ئاشکرا کریە کو دەڤەرا د ناڤبەرا ئەلبوو کەمال و مەیادین د بن ھەژموونا ئیرانێ دایە و ب رێیا چەند گرووپێن چەکدار ڤە، لگەل ئارتێشا سووریێ شەری دکەن و ئەو دەڤەر کۆنترۆل کرینە.

ھەر چەند راپۆرتێن رەوانگەھا سووری ئاماژە ب وێ یەکێ دکەن کو ئەو فرۆکە یێن ئیسرایلێ نە، لێ حەتا نھا نە مەدیایا فەرمی یا سووریێ و نە ژی ئالیەکی دی ئەڤ ئیدیعا پشتراست نەکرنە.

ھێژایی گۆتنێیە کو د ٣ێ ڤێ مەھێ دا ژی، ١٦ چەکدارێن گرووپێن ئیراقی یێن سەر ب ئیرانێ د ئێریشا چەند فرۆکەیێن نەناس دا ل دەردۆرا ئەلبوو کەمال ھاتبوون کوشتن. ھەروەھا د ٢٨ێ حزیرانێ دا ژی ٦ چەکدارێن دی یێن گرووپێن سەر ب ئیرانێ ھاتبوون کوشتن و دهیتە گۆتن کو ئێریش ژ ئالیێ ئیسرایلێ ڤە ھاتنە کرن.