تاوانێن پەکەکێ ل دژی خه‌لكێ سڤیل ل ده‌ڤه‌را دۆسکییا

گەر مرۆڤ بخوازیت باس ل تاوان و نەحەقیێن پەکەکێ ل دژی حکوومەت و خەلکێ باشوورێ کوردستانی بکەت، چ پێ نەڤێت دێ شێت چەندین پەرتووکان ل سەر بنڤیسیت، پێگەها «دارکا مازی» دێ ب به‌لگه‌ بەشەکێ وان تاوانان باس كه‌ت، گرتن، ژ تاوانێن رەڤاندن، ئه‌شکەنجەدان و بێ روومەت کرنێ بگره‌ حەتا دگەهیتە کوشتن، سۆتن و وندا کرنێ.

پاش کو په‌كه‌كێ ل سالێن نۆتان شيانێن شه‌ر كرنێ ل دژی تركیێ نه‌ماین و زانی نەشێن بوهۆسته‌كێ ژ خاكا باکور ئازاد بکەن و هەرێمەکێ بۆ دەستهەلاتدارییا خوە ل وێرێ دروست بکەن، پیلانێن خوه‌ ل دژی باشوورێ وه‌لات ده‌ستپێكرن و ب بەهانەیێن جور ب جور شه‌ر ب حكوومه‌ت و خەلکێ باشوورێ کوردستانێ فرۆت، پەکەکێ د وی شەری دا تشتەکێ دویری بوهایێن مرۆڤاتیێ نەما کو دگەل خەلکێ باشوور نەکری، یا راست په‌كه‌كێ گه‌له‌ك تاوانێن هۆڤ ئه‌نجام دان، ژ گرتنا رێکان ل همبەر خەلکێ نەساخ، په‌قاندنا كانیێن گوندان حەتا دگەهیتە دزین و تالان کرنا قیتێ خەلکێ هەژار، هەرچەنده‌ ل وی دەمی دا خەلکێ باشوور ب ئاوایەک گشتی د رەوشەکا ئابووری یا هەری خراب دا بوو.

پەکەکێ د دەما شەرێ فەرز کری ل سەر باشوور دا، نەتنێ شەر ل دژی پێشمەرگەیان كر، بەلکو شەر ل دژی خه‌لكێ سڤیل ژی ئەنجام دا و خوە ژن، زارۆک و پیر و کاڵ ژی ژ تاوانێن وان قورتال نه‌بوون.

پێگه‌ها داركا مازی د ڤێ مژارێ دا، دێ باس ل به‌شه‌كێ وان تاوانان كه‌ت کو پەکەکێ ل دژی خەلکێ باشوورێ کوردستانێ، ب تایبەت خەلکێ عەشیرەتێن کو ل سنۆرێ د ناڤبه‌را باشوور و باکورێ کوردستانێ دا دژین، دێ زانیاریێن هه‌ری تایبه‌ت ل ده‌ربارا وان وه‌لاتیێن سڤیل به‌لاڤ كه‌ین كو ل ده‌ه‌ڤه‌را«دۆسكییا» ل سنۆرێ پارێزگه‌ها دهۆكێ ب ده‌ستێ چه‌كدارێن په‌كه‌كێ ل سالێن نۆتان هاتنه‌ تیرۆر كرن.

ئه‌م نوونه‌رێن صه‌دامی نه‌ ل ڤێرێ

دگه‌ل ده‌ستپێكرنا شه‌ری، په‌كه‌كێ هه‌مان سیاسه‌تا خوه‌ یا باكورێ كوردستانێ یا تیرۆر و ته‌سفییه‌كرنا كه‌ساتی، سه‌رۆكهۆز، عه‌شیر، ئاغا و به‌گان، ل باشوور ژی به‌رپا كر و هه‌ول دا كه‌سێن دیار تیرۆر بكه‌ت.

دگەل هاتنا خوه‌ بۆ باشوور، په‌كه‌كێ هندەک ناڤێن ئاشۆپی و ل گۆر دلێ خوە ل وان دەڤەران كرن ئه‌وێن تیدا جێگیر بووین وه‌ك «هەرێمێن پاراستنا میدیا» و «هەرێمێن ئازاد کری»، تشتێ سه‌یر ئه‌ڤه‌ دەما پرسیار ژێ دهاتە کرن كانێ هه‌وه‌ ئه‌ڤ ده‌ڤه‌ره‌ ژ کێ ئازاد کرینە و ژ هوین ژ کێ دپارێزن؟، وان د گۆت: «ئه‌م نوینه‌رێن صه‌دام حسێنی نه‌ ل ڤێرێ، صه‌دامی ئه‌ڤ عه‌رد ژ هه‌وه‌ كرینه‌ و داینه‌ مه»‌.

مه‌یدانا شه‌ری ل چ ده‌ڤه‌ره‌كێ بوو

گوندێن سنۆرێ دهۆكێ ب تایبه‌ت ده‌ڤه‌رێن دۆسكی، به‌رواری، نێروه‌ رێكان، نهێلی، به‌رگاره‌ی، مزیرییا و گه‌له‌كێن دی، مه‌یدانا پرانییا شه‌رێن په‌كه‌كێ بوون، ژ بەر ڤێ چەندێ هه‌موو کارێن هۆڤ یێن پەکەکێ کو ل دژی یاسایێن شەر ژی بوون ل ڤان ده‌ڤه‌ران پێکهاتن.

ئه‌م دێ ل خارێ ناڤ، وێنه‌ و ده‌مێ تیرۆر كرنا هه‌ژماره‌كا وه‌لاتیێن سیڤل یێن دهۆكێ ل «ده‌ڤه‌را دۆسكییا» به‌لاڤ كه‌ین كو هه‌موو ل سالا 1997ێ ب ده‌ستێ چه‌كدارێن په‌كه‌كێ بێی هه‌بوونا چ ئه‌گه‌ره‌كێ و ب تنێ ب مەبەستا دروست کرنا ترسێ، هاتنه‌ تیرۆر كرن.

تاوانێن په‌كه‌كێ ل مفره‌قا بانه‌سۆرێ

ل رۆژا 7/10/1997ێ چه‌كدارێن په‌كه‌كێ ل نێزیكی مفره‌قا گوندێ بانه‌سۆرێ، ته‌قه‌ ل ترومبێله‌كا ژ جۆرێ به‌رازیلی كربوو، د ئه‌نجام دا 3 كه‌سێن سڤیل شه‌هید كرن كو ئه‌ڤه‌ ناڤێن وانه‌:

  • ئه‌كره‌م محه‌مه‌د جبو دیلی.

  • ئیسماعیل محه‌مه‌د جبو.

  • كاروان هاشم محه‌مه‌د جبو كو ژیێ وی 5 سال بوون.

تاوانێن په‌كه‌كێ ل گوندێ كه‌مه‌كا و باكۆزێ

هه‌روه‌ها ل رۆژا 11/10/1997ێ، چه‌كدارێن په‌كه‌كێ ل گوندێ كه‌مه‌كا ته‌قه‌ ل ترومبێله‌كا ژ جورێ پیك ئاپ ده‌بل كابینه‌ كر كو یا كه‌سه‌كێ خه‌لكێ گوندێ باكۆزێ بوو و د ئه‌نجام دا 3 كه‌س هاتنه‌ شه‌هید كرن ئه‌ڤه‌ ناڤێن وانه‌:

  • فه‌خره‌ددین یووسف ئه‌حمه‌د.

  • ئه‌یوب محه‌مه‌د سه‌عید مسته‌فا.

  • عه‌بدولباری حسێن كه‌مه‌كی.

تاوانێن په‌كه‌كێ ل گوندێ دێرگژنیكێ

چه‌كدارێن په‌كه‌كێ ل ڤێره‌ نه‌ راوه‌ستیان و ل رۆژا 17/10/1997ێ ترومبێلا ژ جورێ به‌رازیلی ته‌كسی یا هاولاتی «ره‌شید شه‌ریف بنیامین» كو خه‌لكێ گوندێ دێرگژنیكێ یه‌ و ژ عه‌شیره‌تا دۆسكییانه‌ سۆت و د ئه‌نجام دا هه‌ر یه‌ك ژ:

  • هۆزان ئیسماعیل ئه‌حمه‌د ملهمبانی شه‌هید بوو.

  • ئاسییا خالد حاجی هه‌ڤژینا «عه‌لی ده‌رباز» دێرگژنیكی و دوو كورێن وێ ب ناڤێ «عه‌زیز عه‌لی و جمعه‌ عه‌لی» بریندار ببوون.

تیرۆر كرنا 6 وه‌لاتیێن كرستیان ل نێزیكی گوندێ دیلییا

ل رۆژا 13/12/1997ێ چه‌كدارێن په‌كه‌كێ هه‌ژمارا 6 وه‌لاتیێن كرستیان كو هه‌موو كاسب بوون كوشتن، ئه‌ڤ 6 سڤیله‌ ل سه‌ر جادده‌یا گشتی یا مانگێشكێ ل نێزیكی گوندێ دیلییا و بانه‌سۆرێ هاتبوونه‌ گوللـه‌باران كرن.

ئه‌ڤه‌ ژی ناڤێن وانه‌:

  • سه‌لام یووسف اوراها جنو – ژ دایكبوویێ 1976ێ بوو.

  • سه‌میر ئیشو كلو مقدو – ژ دایكبوویێ 1971ێ بوو.

  • ناجی میخو قوسو خراكه‌ – ژ دایكبوویێ 1965ێ بوو.

  • ئه‌ركان هرمز یووسف تشیكو – ژ دایكبوویێ 1977ێ بوو.

  • صلیوا جمعه‌ زیا المنو – ژ دایكبوویێ 1965ێ بوو.

  • ماجد شمعون حنا خنجرو – ژ دایكبوویێ 1973ێ بوو.

پێگه‌ها داركا مازی بانگه‌وازیێ دده‌ته‌ خه‌لكێ باشوورێ كوردستانێ كو هه‌ر مالباته‌كا‌ ئه‌ندام یا ناسیاره‌كێ وان ب ده‌ستێ چه‌كدارێن په‌كه‌كێ هاتبیته‌ شه‌هید كرن یا زرار ڤێ كه‌فتبیت، وێنه‌ و زانیارییان ژ بۆ پێگه‌ها مه‌ بهنێریت ژ بۆ كو بهێنه‌ به‌لاڤ كرن.

پوستێن ھەمان بەش