ئامێدی باژارەک کەڤنار و دیرۆکی یێ باشوورێ کوردستانێ یه، ب پایتەختا میرگەها به‌هدینان دهێته نیاسین، ئه‌و میرگه‌ها كو ل دەمێ خۆ، خودان هێز و ده‌ستهلاته‌كا پگه‌له‌ك مه‌زن بوو، ئەڤ باژاره ل سەر چیاییەکی کو وەک کەلهەکا خوەزایی خۆ وێنە دکەت، هاتییە ئاڤاکرن.
سەردەمێ دروستبوونا ئامێدیێ بۆ 3000 سالان به‌ری زایینێ ڤه‌دگه‌ریت، هه‌ر یه‌ك ژ ناڤچه‌یێن شێلادزێ، کانی ماسێ، بامەرنێ، چەمانکێ و سەرسنکێ و دێرالۆکێ ب خۆ ڤە دگریت، ئامێدی وارگەهێ عه‌شیرێن رەسەن یێن کوردستانێ وەک عەشیرێن “نێروەیی، رێکانی، دۆسکی، بەرواری، نهێلی، بەرگارەی، مشارا سپنەیێ به‌هدینانه”، گه‌له‌ك شارستانیەتان حوکم ل ئامێدیێ كرییه وەک ئاشووری، ساسانی، ئەشکانی و چەندین شارستانیێن دی.
ڤەگوهاستنا گەریلایان بۆ ئامێدیێ
هاتنا پەکەکێ بۆ سینۆرێ ئامێدیێ بۆ سالێن هه‌شتیێان ژ چه‌رخێ بووری ڤه‌دگه‌ریت، ل وی ده‌می پارتیێن كوردستانی و ل به‌راهییا وان پارتییا ده‌مۆكرات یا كوردستانێ، هاریكارییا وان كر، لێ به‌لێ ل سه‌رهلدانا سالا 1991ێ و ده‌مێ كو پێشمه‌رگه مژوولی رزگار كرنا باشوورێ كوردستانێ بووی، په‌كه‌كێ ئه‌ڤ یه‌كه بۆ خۆ كره ده‌رفه‌ت، ژ به‌ر كو ل وی ده‌می پێشمه‌رگه داكه‌تبوون ناڤه‌ندێن باژاران و به‌ره‌یێن پێشیێ.
په‌كه‌كێ د گۆته خه‌لكێ گوندێن ده‌ڤه‌را ئامێدیێ: ئەڤه نوكه نەگوندێن هه‌وه‌نه، ئەڤه هەرێمێن پاراستنا مەدیانە، هه‌وه ئەڤ گونده فرۆتینە و پارێن خۆ وەرگرتینە
پشتی سەرهلدانێ دەمێ کو حکوومەت و په‌رله‌مانێ کوردستانێ هاتینه ئاڤا کرن، حکوومەتێ ل گۆر شیانێن ل وێ دەمێ بەردەست خزمەتگوزاریێن دەستپێکی وەک ئاڤ، ئەلەکتریک، دبستان و رێ بۆ گوندان پێشکشی وان ناڤچەیان کر و خوەست دیسان ئەو وه‌لاتیێن ل سەر دەمێ رژێما بەعس نه‌شیایین ل سەر گوندێن خۆ بژین و ب کارێ جۆتکاریێ و خودان کرنا ئاژه‌لان رابن، نها بشێن ب وان کاران رابن و ب وێ یەکێ هەم دەبارا ژیانا خۆ بکه‌ن و هەم ژی ئابوورییا کوردستانێ ب چاندنێ و ئاژه‌لداریێ بهێز بکه‌ن، لێ پەکەکێ ئەڤ دەرفەته ژ ناڤ بر و هەر وەک رژێما بەعس بەهانە ب کوردان گرتن و ئەڤ ناڤچە ب ناڤچەیێن شەر دیار کرن، پەکەکێ ژی مینا رژێما بەعس کر، پەکەکێ سەرهلدان ب دەرفەت دیت و هەژمارەکا زیدە ژ گوندێن سنۆری یێن دکەڤنه ئامێدیێ و ناڤچه‌یێن وێ ێخستنه ژێر کۆنترۆلا خۆ و نوقته و بارەگەهێن خوە ل وان گوندان دانان، دەمێ وه‌لاتیێن ڤان گوندان ڤیایین ڤەگەرنه گوندێن خۆ، پەکەکێ ب وان گۆت: «ئەڤه نوكه نە گوندێن هه‌وه‌نه، ئەڤه هەرێمێن پاراستنا مەدیانە، هه‌وه ئەڤ گونده فرۆتینە و پارێن خۆ وەرگرتینە، پەکەکێ هەما دگۆت ئەم نوینەرێن سه‌دامی نە ل ڤێڕێ و رێ ناده‌ین هووین بهێنه ڤان گوندان».
پڕانییا گوندێن پەکەکێ ئێخستینه بن چەنگێ خۆ، گوندێن عەشیرەتا نێروەیی و رێکانییان و نهێل و بەرواری بوون، ژ بەر ڤێ سیاسەتا شاش و قرێژ یا پەکەکێ، وه‌لاتیێن ڤان گوندان ناچار مان بەرێ خۆ بده‌نه که‌مپێن کو دوور ژ گوندێن وان هاتبوون دروست کرن بێ کو بشێن ل وان که‌مپان کارەکی بكه‌ن.
هه‌تا نوكه پەکەکێ دەست دانایه سەر 487 گوندێن دکەڤنه سنۆرێ قەزا ئامیدیێ و ناڤچه‌یێن وێ چ ئاوایه‌كی ناهێلن خەلکێ وان گوندان ڤەگەرن گوندێن خۆ، پەکەکێ ئەو گوند وەک هەرێمێن پاراستنا مەدیا و هەرێمێن عەسکەری ب ناڤ کرن، د ڤێ یەکێ دا پەکەکێ چاڤ ل رژێما بەعس یا ژ ناڤ چوویی کرییە، ده‌مێ ڤێ رژێمێ ئەڤ ناڤچە وەک ناڤچەیێن عه‌سكه‌ری راگه‌هاندین و ب ڤێ یەکێ ژیان ل وه‌لاتیێن وێ کربوو دوژەهـ و جه‌هه‌نه‌م.
پەکەکێ نان و قویتێ خه‌لكێ ئامێدی وەک باج و مافێ پارتییا خۆ دزانی
د دەمێ شەرێ پەکەکێ ل دژی حکوومەتا هەرێما باشوورێ کوردستانێ، چ زۆلم و ستەمەک نەما کو پەکەکێ دەرحەق گەلێ ئامێدیێ و ناڤچه‌یێن وێ دا نەکری، زۆلم و ستەمەک هنده قرێژ کو هنده‌ك جاران دگه‌هشته وێ زۆلم و ستەما کو حکوومەتا ئیراقێ ل وه‌لاتیێن ڤێ ناڤچەیێ دکر، پەکەکێ ب ئاوایەکی گشتی ئامێدی و ناڤچه‌یێن وێ کربوو ناڤچەیا عه‌سه‌كه‌ری، ب رۆژ خۆ د ناڤا چیایێن ئامێدیێ دا دڤەشارت و درازان و ب شەڤ ژی ل دووڤ پێشمەرگەیێن هەژار و فەرماندارێن وان دگەران د ناڤا گوندێن ئاڤەدان دا، پەکەکی چ بێرێزی و ستەمەک نەمابوو کو دەرحەق وان دا ئەنجام نەدای، ل سالێن نۆتان دا ب تایبەتی د دەمێ شەرێ پەکەکێ ل دژی حکوومەتا شەرعی یا کوردستانێ دا، هەر چەند کو گەلێ ناڤچەیێ د هەژاریێ دا دژیان و نه‌دشیان ب ئاوایەکێ باش دەبارا ژیانا خۆ بکه‌ن، گەریلایێن پەکەکێ ب دارێ زۆرێ ئەو نان و خوارنا د دەستێ خه‌لكێ ئامێدیێ و ناڤچه‌یێن وێ دا ژی ژ وان وەردگرت، خه‌لك نه‌دشیا چ تشتان د مالا خۆ دە بهێلن، هەر تشت گه‌له‌ك زەحمەت بوو، وان ژ بلی دەست دانانا سەر گوند و رەز و باخێن وه‌لاتییان، باج ژی ژ وان د ستاند، ژ شڤانان پەز وەک باج د ستاند، ژ گاڤانان، چیل د ستاندن و ژ جۆتکاران ژی بەرهەمێن چاندنێ، وان رەحم ب کەسێن هەری هەژار ژی نەدبر و قویتێ وان وەک باج و مافێ پارتییا خۆ دزانی.
ئه‌وا په‌كه‌كێ كری، رژێما به‌عس نه‌كر
د دەمێ شەرێ ل دژی حکوومەتا شەرعی یا کوردستانێ دا، ژ بەر کو ئامێدی ناڤچەیەکا چیایی یە، پەکەکێ ب ساناهی دشیا پرسگرێکان بۆ خه‌لكێ ناڤچەیێ دروست بکه‌ت، د دەمێ شەری دا پەکەکێ خوە رێ نەددا ئامبولانس ژی نەخۆشان ژ شێلادزێ و دێرەلۆکێ ببەنه ئامێدیێ یان دهوکێ، وان د رێ دا ب سایا چەکێن دۆشک و نیشانەشکێنان، رێیا سەرەکی یا د ناڤبەرا شیلادزێ و دیرالۆکێ بۆ ئامێدیێ و دهوکێ قوت کربوو، ئەڤه د دەمەکێ دا بوو کو د درێژاهییا شەرێ چەندین سال یێ حکوومەتێن یەک ل دووڤ یەک یێن ئیراقێ ل دژی پێشمەرگەیێن کوردستانێ، د چ دەمەکێ دا حکوومەتێ کارەکێ ب ڤی رەنگی ئەنجام نەدا و رێ ل همبەر نەخۆش و پیر و کالان نەگرت! چ یەک ژ پێشمەرگەیان نه‌دشیا ب شەڤ د مالێن خۆ دا ب ئارامی بمینیت، کەسوکارێن پێشمەرگەیان ژی ل بن چاڤدێری و فشارەکا زۆر بوون، رۆژ نەبوو دەنگێ دۆشکێن پەکەکێ نه‌هێت، ب ئاوایەکی کو ئەڤ دەنگه ژ بۆ گوهێن خه‌لكێ ناڤچەیێ ببوو دەنگەکێ ئاشنا، خه‌لك نه‌دشیا ژ مالێن خۆ دەرکەڤیت، ئەڤه هەموو بێ کو چ گونەهەکا وان هەبیت، گونەها وان ب تنێ ئەڤه بوو کو گوندێن وان ببوونه مەیدانا شەرەکی کو چ پەیوەندیا وان پێڤه نەبوو، شەرەکی سەپاندی ژ پال پەکەکێ ڤە.
پەکەکێ هەر تشت ب ئامێدیێ کر
هەر چاوا بیت باس کرن ل کێشە و دەردەسەریێن کو خه‌لكێ ئامێدیێ و ناڤچه‌یێن وێ ب ئه‌گه‌را پەکەکێ تووش بووی ب داوی ناهێن، پەکەکێ هەر تشت ب ئامێدیێ کر، گوند سۆتن، خه‌لك برسی كر، بێ رومەت کرن، مال و حالێ وان تالان کر، ئەو دەربەدەر و بێ جهـ کرن، گه‌له‌ك کەس شەهید كرن، لێ نوكه دهێت و باس ل پاراستنا گه‌نجێن ڤێ ناڤچەیێ دکەت، ئه‌و گه‌نجێن کو هەژمارەکا هه‌ری زیدە ژ وان ب ئه‌گه‌را په‌كه‌كێ بێ باب و دایک و مال و حال ماین.
دبیت هه‌تا نها پەکەکە نەزانیت مەیدانا خەباتا وێ ئامەدا باکورێ کوردستانێ پایتەختا کوردستانا مەزنه و ئازاد کرنا وێ یه ژ دەستهلاتدارییا دەولەتا ترکیێ، نە کو پرسگرێک دروست کرن و ئالۆزکرنا رەوشا ئامێدی و دژایەتی کرنا تاکە حکوومەتا کوردی ل هەر 4 پا‌رچه‌یێن کوردستانێ.
دوژمنێ باب و کالان، نابیته دوستێ لاوان
ل دوماهیێ ئەم دبێژینه خه‌لكێ ئامێدیێ ب گشتی و گه‌نجێن وێ ب تایبەتی، کەسێن کو دیرۆکێ ناخوینن دێ نەچار مینن هەموو دیرۆکێ دوبارە تەجریبە بکه‌ن، ژ بەر ڤێ یەکێ ئەم رجا دکه‌ین گه‌نجێن ئامیدیێ ل دیرۆکا سالێن نۆتان ژ چەرخێ بووری بزڤرن و بخوینن و بزانن پەکەکێ چ ب سەرێ باب و کال و ناڤچەیا وان ئینایه، داکو نەچار نەبن وێ یەکێ دوبارە ب چاڤێن خوە ببینن، ئەم ب وان گه‌نجان دبێژین «دوژمنێ باب و کالان، نابیته دوستێ لاوان».
