دەما کو پەکەکە د سالا 1978ێ دە ھاتە دامەزراندن، ئارمانجا وێ یا دەستپێکێ وەکی “کوردستانا سەربخوە و یەکگرتی” ھاتە راگھاندن. د سالا 1999ێ دە، دەما کو ئۆجالان چوو ئیمرالیێ، ئارمانجا خوە گوھەرت. ئارمانجا نوویا ئۆجالان ئەڤە بوو: “کورد نە پێدڤینە کو دەولەتەکە سەربخوە ئاڤا بکن؛ پێدڤیتیا وان ب ڤێ ھەیە کو دەولەتا ترکیەیێ دەمۆکراتیک بکن و کۆمارا دەمۆکراتیک ئاڤا بکن.”
ژ سالا 1999ێ ھەتا سالا 2025ێ، ب ھەزاران جوانێن کورد د تێکۆشینا پەکەکێ دە ژ بۆ دەمۆکراتیککرنا کۆمارا ترکیەیێ جانێ خوە ژ دەست دان. لێ کۆمار دەمۆکراتیک نەبوو…
د سالا 2025ێ دە، ئۆجالان پەکەکە هلوەشاند. و دەما کو ئارمانجا خوەیا نوو راگھاندی، وی گۆت کو پێدڤی ناکە کورد داخوازا دەولەت، ئۆتۆنۆمی یان ژی مافێن چاندی بکن. ئارمانجا نوویا ئۆجالان ژ بۆ کوردان ئەڤە بوو: “ئەنتەگراسیۆنا پۆزەتیڤ”.
نھا ئۆجالان پەیڤا “پۆزەتیڤ” ل ھەر تێگەھا کو بکار تینە زێدە دکە، کو ئەڤ یەک تێ واتەیا کو ئەو تشت ئەرێنییە: دامەزراندنا پۆزەتیڤ، ئەنتەگراسیۆنا پۆزەتیڤ، یەکبوونا پۆزەتیڤ… چ تێگەھ تەنێ ب زەلقاندنا پەیڤا “پۆزەتیڤ” نابە پۆزەتیڤ. ئارمانجا ئۆجالان ئەوە کو ب لیستکێن پەیڤان، ل بەر چاڤێ جەماوەرێن کو زوو ب تشتان ناحەسن، کەرامەتەکێ ژ خوە رە چێبکە. وەکی دن، سیاسەتا “ئەنتەگراسیۆنا پۆزەتیڤ” د بنگەھ دە پۆلیتیکایەکە فیلتەرکری یا ئاسیمیلاسیۆن و بندەستیێیە کو ھێزێن کۆلۆنیال ب سالانە پێک تینن.
ئۆجالان ل سەر سیاسەتا ئەنتەگراسیۆنا پۆزەتیڤ وھا دبێژە: “دڤێت تێکلیێن ھەموەلاتیبوونێ نە ل سەر بنگەھا عایدیەتا نەتەوەیی، لێ ل سەر بنگەھا گرێدانا ب دەولەتێ رە وەرن ئاڤاکرن.”
یانی، واتەیا ڤێ ئارمانجێ ئەڤە: “کورد نە نەتەوەیەکن و مافێن وان یێن خوەزایی یێن کو ژ نەتەوەبوونێ دەرتێن نینن؛ لێ ئەو نە ترکن ژی، تەنێ وەلاتیێن ترکیەیێ نە.” سیاسەتا ئەنتەگراسیۆنێ یا ئۆجالان ئەوە کو کوردان بکە وەلاتیێن ئاسایی یێن کۆمارا ترکیەیێ. یانی ئۆجالان کوردان بێ وەلات، بێ دیرۆک، بێ چاند و ھونەر و بێ کوردستان پێناسە دکە.
ئەڤ تێ ڤێ واتەیێ: 50 سالن کورد ل ھەمبەر ترککرنێ ل بەر خوە ددن، دمرن، تێن پەرچقاندن، ژ وار و وەلاتێ خوە دبن مشەخت و ھتد… گەلۆ ئەڤ ھەموو رەزالەت تەنێ ژ بۆ کو ببن وەلاتیێن ترکیەیێ ھاتە ژیاندن؟
پێکانینا ھەری بەربچاڤا سیاسەتا “ئەنتەگراسیۆنا پۆزەتیڤ”یا ئۆجالان، رۆژئاڤایە. ل رۆژئاڤا، کورد ھەما بێژە د رەوشەکە مینا دەولەتێ دە بوون. لێ د ئەنجاما سیاسەتا ئۆجالان دە، نھا ل رۆژئاڤا زمانێ کوردی (د ئاستا فەرمی دە) قەلس بوویە، ناڤەکی کوردستانێ نەمایە و ناڤێن باژارێن کوردان تێن گوھەرتن. کورد مینا خازخازۆکان ژ شامێ لاڤا دکن دا کو ھندەک بەرماییێن دەستھلاتداریێ بدە وان. ژ ڤێ رەوشێ رە دبێژن “ئەنتەگراسیۆنا پۆزەتیڤ”… لێبەلێ، تشتێ کو ل رۆژئاڤا قەومی، سیاسەتەکە ئاسیمیلاسیۆنێ یا فیلتەرکرییە.
و ئۆجالان نھا ڤێ سیاسەتێ ل رۆژئاڤا وەکی مۆدەلەکێ ژ بۆ چار پەرچەیێن کوردستانێ پێشکێش دکە. ئەڤ ئارمانجا نوویا ئۆجالان، کو کوردان ژ نەتەوەبوونێ دوور دخە و وان ڤەدگوھەرینە دووڤکا کۆلۆنیالیزمێ، نە سیاسەتا ئەنتەگراسیۆنەکە پۆزەتیڤە، لێ پرۆژەیا خیانەتەکە پۆزەتیڤە.
