ئێریشا سەر گوندێن باشوورێ کوردستانێ ب سەدەما پەکەکێ بەردەوامە، ئێڤارا ئیرۆ گوندەکێ دن یێ دھۆکێ کەت بەر ئێریشان.
چاڤکانیێن پێگەھا دارکا مازی ل باشوورێ کوردستانێ ئەشکەرە کر، ئێڤارا ئیرۆ رۆژا ئینی 2020/9/25ان بالەفرێن دەولەتا ترکیێ د تەعقیبا لڤ و تەڤگەرێن پەکەکێ دە، ناڤچەیا کانی ماسێ ل بەرواری بالا ھەدەف کر.
دەست نیشان کر، بالەفران ل دەمژمێر 5:30 ئێڤارێ مووشەک ل نوقتیێن پەکەکێ ل دەڤەرا گەلیێ دێرا کو دبە ئاقارێ گوندێ بێشیلێ یێ گرێدای پارێزگەھییا دھۆکێ دانە.
ئەڤ ژی دبە جارا سێیەمین ژ شەڤا دەرباسبوویی ڤە، گوندێن دھۆکێ دکەڤن بەر ئێریشێن ھەوایی یێن ترکیێ. ل شەڤا دەرباسبوویی بالەفران ستارگەھێن پەکەکێ ل دەڤەرا بەرواری بالا ھەدەف کربوون، نیڤرۆژا ئیرۆ ژی مووشەک ل سەرێ چیایێ بێسمتێ کو دبە ئاقارێ گوندێ رەزیکێ دانە.
ھەرچەند کو زرارێن ئێریشان نەھاتنە زانین، لێ ترس ل جەم خەلکێ ناڤچەیێ چێبوویە. دەولەتا ترکیێ مەزنترین ئێریشا سەر باشوورێ کوردستان ل دژی پەکەکێ ل خزیرانا رابووری دەست پێکربوو، ژ وێ دەمێ ڤە پەکەکە ب ئاوایەک سیستماتیک خوە نێزی گوند و باژارۆکان دکە ب ئامانجا وێ یەکێ کو ببن مەیدانا شەر و ژ شێنییان وەرە ڤالا کرن.
