ژ بەر سترانێن کوردی گەف ل سترانبێژێ کورد کرن

ژ بەر سترانێن کوردی گەف ل سترانبێژێ کورد کرن

سترانبێژێ کورد “جەسم باشبۆگا” راگھاند کو ژبەرکو سترانێن کوردی دبێژە جەندەرمەیان گەف ل وی خوارنە.

ل گۆر نووچەیا مالپەرا دوڤارێ، سترانبێژ جەسم باشبۆگا کو ل ناڤچەیا تەتوانا بەدلیسا باکورێ کوردستانێ ب ناڤێ ھونەرمەند جەسم دهێتە ناسکرن و د داوەتان دا سترانێن کوردی دبێژیت، راگەھاند کو فەرمانداریا جەندەرمەیێن باژێری، گەف ل وی کرینە کو سترانێن کوردی نەبێژیت.

جەسم باشبۆگا دیار کر کو ل فەرمانداریا جەندەرمەیێن باژێری، گەف ل وی هاتینەکرن و گۆت: “ئەز برم ئۆدەیەکێ کو ل سەر نڤیساندبوو میت. گۆتە من کو “ئەگەر تو جارەکا دی سترانێن کوردی بێژی دێ سەرێ تە کەڤیتە بەلایێ. ھەروھا کەسەکی کو خوە وەک کاربدەستێ میتێ دا ناساندن ژی، پشتی کو ئەو کەسێن دی دەرکەتی خاست ل گەل من باخڤیت.”

باشبۆگا دا زانین کو دەرباری وی پێش نها هیچ لێپرسین نەھاتنە دەستپێکرن و ب ڤی رەنگی بەردەوام کر: “گۆتە من کو “ئەم دەربارێ تە تشتێن نەباش دبھیسن. تو بەشداری تەڤاھیا چالاکیێن ھەدەپێ دبی و ب سترانێن کوردی پرۆپاگاندەیا بۆ رێخستنێ دکەی. ھەروھا تو دچیە هەموو داوەتێن ل گوندان ژی و ل وێرێ سترانێن رادیکال دبێژی. مە ھەموو سترانێن تە، بۆ ترکی وەرگەراندنە و ئاشکەرا بوویە کو تو پرۆپاگندەیا رێخستنێ دکەی. ژ نھا وێڤە قەدەخەیە تو سترانێن کوردی ببێژی. ئەڤ جارا داویێ یە ھشیاریێ ددمە تە. ب ڤی ئاوایی گەف ل من کرن”.

جەسم باشبۆگا بۆ ئالیکاریێ سەرەدانا کۆمەلەیا مافێن مرۆڤان یا بەدلیسێ کر و بریارە سبە دوشەمبێ ٢٨ێ ئیلۆنێ سکالایا خوە تۆمار بکەت.