سته‌ما ئیرانێ ل سه‌ر كۆلبه‌ران به‌رده‌وامه‌

سته‌ما ئیرانێ ل سه‌ر كۆلبه‌ران به‌رده‌وامه‌

هه‌ده‌ف كرنا كۆلبه‌ران ژ بال سپایێ پاسدارێن ئیرانێ ل سه‌ر سینۆرێ باشوور و رۆژهلاتا كوردستانێ كاره‌كه‌ تو جارا ب داوی نابه‌، ل مه‌ها رابووری 26 كۆلبه‌ر بوونه‌ قوربانی.

ل گۆر ئاماره‌كه‌ رێخستنا هه‌نگاوێ یا مافێن مرۆڤان، ته‌نێ د مه‌ها ئیلۆنا رابووری ده‌، 26 كۆلبه‌ر ل سه‌ر سینۆرێن نێڤبه‌را باشوورێ و رۆژهلاتا كوردستانێ ده‌ ژ بال سپایێ پاسدارێن ئیرانێ ڤه‌ هاتنه‌ كوشتن و بریندار كرن.

ده‌ست نیشان كر، 80% ژ حاله‌تێن كوشتن و برینداربوونێ یێن مه‌ها رابووری ب ته‌قا راسته‌ راست یا سپایێ پاسداران بوونه‌.

رێخستنا هه‌نگاوێ دبێژه‌ د ڤێ ده‌مێ ده‌، 6 كۆلبه‌ر هاتنه‌ كوشتن و 20 بریندار بوونه‌، ژ سه‌رجه‌ما وان 12 كۆلبه‌ر یێن پارێزگه‌ها ئۆرمیێ نه‌، هه‌روها كۆلبه‌ره‌ك ب ته‌قه‌یا ئارته‌شا تركیێ جانێ خوه‌ ژ ده‌ست داییه‌.