پشتی تیرۆرکرنا غازی سالح ئالیخان، رێڤەبەرێ ئاساییشا دەریێ سینۆری یێ سەر زیرێ ل ئێڤاریا رۆژا پێنجشەمبی 8/10/2020ێ ژ لایێ چەکدارێن پەکەکێ ڤە ئێدی دەم هاتیە سنۆرەک ژ بۆ ڤان سەرکێشی و بێ روومەتییا پەکەکێ و لایەنگرێن وێ ل باشوورێ وەلات بهێتە دانان و چ دی ولاتیێن باشوورێ کوردستانێ د بن گەفا ترس و تیرۆرا پەکەکێ دا نەژین.
هەر کو دچیت پتر روویێ راست یێ پەکەکێ دیار دبیت، دیار دبیت کو ئارمانج و ستراتژییا پەکەکێ ل باشوورێ وەلات چییە و دخوازیت ل باشوور چ بکەت، پەکەکە نها ل هەر چار پارچەیێن کوردستانێ ب تنێ ل دژی کوردان تەڤ دگەریت، ئەو وسا هزر دکەت کو ب ئارمانجکرنا کەسێن وەلاتپارێز و گەف کرن ل سازیێن ئەولەهی یێن باشوورێ کوردستانێ دێ شێت شکەستنێن خوە یێن ئێک ل دووڤ ئێک ڤەشێریت.
پەکەکە نها وەکو کەسەک مەست و کورە سەرەدەریێ دکەت، نها ب تنێ کار ب ڤێ گۆتنا کوردی دکەت دەما دبێژیت “هەر کەسێ دبینم، تێ دوەرینم” لێ ب ڤێ جوداهیێ کو پەکەکە دبێژیت “هەر کوردەکێ دبینم تێدوەرینم”، ب چ رەنگان پەکەکە باس ل تێوەرینا بەرپرس و عەسکەرێن ترکیێ و ئیران و ئیراق و سووریێ ناکەت، ئەو ب تنێ باس ل تیرۆرکرنا بەرپرس و گەلێ باشوورێ کوردستانێ دکەت.
کارێن تیرۆریستی یێن پەکەکێ ل باشوورێ کوردستانێ تشتەک نوو نینە، بەلکو پێش نها ژی چەندین جاران ئەڤ کارە ئەنجام دانە، لێ ژبەرکو حکوومەتا هەرێما باشوورێ کوردستانێ چ هەلویستەک جدی ل دژی وان وەرنەگرتیە پەکەکێ دەست ژ ڤان کارێن تیرۆریستی هەلنەگرتیە، پێویست بوو ل دەما تەرۆرکرنا ولاتپارێزەکێ وەکو کانی یلماز کو پەکەکێ ل سلێمانیێ تیرۆر کری سینۆرەک ژ بۆ ڤان کارێن قرێژ هاتبا دانان.
پەکەکە وەکو هەرجار دەما کوردەکێ دکەتە ئارمانج وی ب خیانەت و سیخوریێ تاوانبار دکەت داکو رەواتیێ بدەتە کارێ خۆ یێ تیرۆریستی، لێ پێش وەخت هەر تشتی حازر دکەت، داخویانیێن نڤیسکی یێن دوبارە، سووچێن بێ بنەما و درەوێن بەردەوام ئامادەنە داکو دگەل هەر کارەک تیرۆریستی وان د ناڤا سۆسیال میدیا و چاپەمەنیا خۆ دا بەلاڤ بکەن و روویێن خۆ یێن قرێژی پێ ڤەشێرن.
مرۆڤ حەیری دمینیت کو پەکەکە دەست ژ ڤان کاران بەرنادەت و وەکو ولاتپارێزی دبینیت، گەر پەکەکە دخوازیت کوردایەتیێ بکەت، گەر دخوازیت کوردان سەردەست بکەت و سەرخۆبوونا وان بینە جی، گەر پەکەکە ژ بۆ کوردان خەباتێ دکەت بلا بەرپرسێن دەولەتێن داگیرکەر بکەتە ئارمانج نە کو کوردەک هەژار.
ب تیرۆر کرنا غازی سالح ئالیخان چەندین پرسار دروست دبن کو پێویستە هەر کوردەک وەلاتپارێز ل بەرسڤا وان بگەریت، ئەو پرسیار ژی ئەڤنە، گەلۆ بۆچی پەکەکە بەرپرسێن تورک ناکەتە ئارمانج؟! بۆچی پەکەکە ئاردۆگان ناکەتە ئارمانج؟ ما قەی ل دەما ئاردۆگان ل ئامەد و وان و… باژێرێن دی یێن کوردستانا باکور ژ بۆ گەلێ کورد د دەما هەلبژاردنان دا داخوەیانیا ددەت نەشێت بکەتە ئارمانج؟ گەلۆ بۆچی نیشانشکێنێن پەکەکێ دشین بەرپرسەکێ کورد ژ دوور ڤە ب نیشانشکێنێ ئارمانج بکەن، لێ نەشێن بەرپرسەکێ ئیستخباراتی یێ تورک ئارمانج بکەن؟ قەی ب تەنێ لوولیا تڤەنگێن پەکەکێ کوردان ناس دکەت؟!
ل داویێ ئەم وەکە کوردێن باکورێ وەلات کو مە زولم و ستەما پەکەکێ ب جاڤێ سەرێ خوە دیتیە، یەک تشت دبیژین، گەر حکوومەتا هەرێما کوردستانێ دخوازیت وەلاتیێن باشوور ب گشتی و ب تایبەتی کەسێن د ناڤا سازیێن ئەولەهیا هەرێمێ دا کار دکەن ل دەستێ پەکەکێ بپارێزیت، پێویستە هەلویستەک توند ل دژی پەکەکێ وەرگریت، پێویستە سینۆرەکێ ژ بۆ ئالیگرێن پەکەکێ کو نها د سۆسیال میدیایێ دا مژوولی چێکرنا ئاخافتنێن نە شرین و جڤین و بێ بوها کرنا پیرۆزیێن نەتەوا کوردن بدانیت، پێویستە هەر تشتەک وەکو وان بهێتە بەرسڤاندن و ژ وان را ببێژن “ئێدی بەسە” و ل جیێ خوە راوەستن، ژبەرکو پەکەکە ب تنێ د ئێک زمان دگەهیت، ئەو زمان ژی ئەڤەیە کو وەکو وێ سەرەدەری دگەل دا بهێتە کرن.
