پارتییا دژبەرێن کوردستانێ

پارتییا دژبەرێن کوردستانێ

پارتییا کارکەرێن کوردستانێ یا بەرنیاس ب «پەکەکە» هەر ژ یەکەم رۆژا دامەزراندنا خۆ هەتا نوكه‌ باس ل ب خودان دەرکەفتنێ ل تەخا كاركه‌ر و کوردستانێ دکەت، پەکەکێ هەر ژ دەستپێکێ دژایەتیسا خۆ بۆ تەخا سه‌رۆكهۆز و ئاغا و بۆرجوازان راگهاند و دیار کر دێ پارتییا وان ل دژی ڤان دو تەخان خەباتێ بکەت، ژبەرکو ئەڤ دوو تەخێن جڤاکی رێگرن ل همبەر ئازادییا هزری و جەسەدی یا مرۆڤان، لێ بەلێ نها پارتییا کارکەرێن کوردستانێ بوویە پارتییا ئاغا و بۆرجوازێن کوردستانێ، کار ژ بۆ هەر تەخەکی دکەت ژ بلی تەخا كاركه‌ران، ئەو تەخا کو پەکەکە گه‌هاندییه‌ رۆژا مه‌ یا ئه‌ڤرۆ، پەکەکە کو خۆ ب پارتییەکا کوردستانی ددەته‌ ناساندن، نها هەر تشت و کارەکێ وێ تو لێ بنێری دێ دژاتیەکا روهن یا کوردستانێ تێدا بینی، ئەڤ دژایه‌تی هنده‌ ئاشكرا و دیارە کو مرۆڤ دشێت ب وێرەکێ وێ ب “پارتییا دژبەرێن کوردستانێ” ژی ب ناڤ بکەت.

پشتی رێككه‌فتنا د ناڤبەرا حکوومەتا هەرێما کوردستانێ د گەل حکوومەتا فیدرال یا ئیراقێ دا ل سەر شنگالێ، پەکەکێ ب ئاشکەرا و نهێنی دژاتییا خۆ بۆ ڤێ رێككه‌فتنێ دیار کر، ئەڤجا ژ داخویانیێن كادرێن رێڤەبەرێن پەکەکێ بگرە هه‌تا دگەهیتە مەش و خوەپێشاندانێن ئالیگرێن وێ کو داخوازیێن وان ئالیگرێن خۆ وەک داخوازی و حەزا هەموو گەلێ شنگالێ د دا نیشاندان، ئەڤ دژاتییا پەکەکێ ژبەر هاتن یان هەبوونا سوپایێ ئیراقێ نینە، ژبەرکو د ئەساس دا نها عەسکەرێن ئیراقی و حەشدا شەعبی ل شەنگالێ هەنە، دژاتیکرنا پەکەکێ ب تنێ ژ بەر ڤێ یەکێ یە کو دێ پێشمەرگەیێن جانفیدایێن کوردستانێ دیسان ڤەگەرنه‌ شەنگالێ و دێ ئەڤ پارچەیا بریندار ژ خاکا کوردستانێ جارەکا دی کەڤیتە سەر تاکە هەرێما ئازادا کوردستانێ.

په‌كه‌كه‌ باس ل براتییا گه‌لان دكه‌ت، باس ل براتییا جه‌ندرمه‌یان و كوردان، عه‌سكه‌رێن ئیراقێ و كوردان دكه‌ت، لێ به‌لێ چ جاره‌كێ به‌حسا براتییا دگه‌ل پێشمه‌رگه‌یان ناكه‌ت و پێ رازی ژی نابیت

پەکەکە یا کو هەتا نها ئاخافتن و سیاسەتا خۆ ل سەر زارێ كادرێن رێڤەبەرێن پەکەکێ وەکی «جەمیل بایک، دۆران کالکان، مستەفا کاراسۆ، موراد قەرەیلان و بەسێ هۆزات» ددا خویا کرن، نها سیاسەتا خۆ ل سەر زارێ شێخ و کەسێن ئاغا ددەته‌ خویا کرن، پەکەکە یا کو باس ل براتییا د ناڤبەرا گەلان دا دکەت، باس ل براتییا د ناڤبەرا جەندرمێ ترک و کوردان دا دکەت، باس ل براتییا د ناڤبەرا پاسدارێ ئیرانی و کوردان دا دکەت، باس ل براتییا د ناڤبەرا سه‌ربازێ ئیراقی و کوردان دا دکەت، ب چ رەنگان  نەباس ل براتییا دگەل پێشمەرگەیان دکە نە ژی پێ رازی دبیت، ئەو ب هەموو ئاوایان ل دژی پێشمەرگەی، ئالا و سەرخوەبوونا کوردستانێ نە، دخوازن ب بەهانەیا براتییا گەلان کوردان جارەکا دی بکه‌نه‌ کۆلە د دەستێ داگیرکاران دا گەر وه‌ها نەبیت بۆچی پەکەکە وان کەسێن کۆبانێ پاراستی، وان کەسێن کو ب درێژاهییا دیرۆکێ ناڤ و روومەتا کوردان پاراستی ب برایێن داعشێ ب ناڤ دکەت؟!

پشتی کو پەکەک ژ هەر تشتی بێ هێڤی بووی و زانی چەوا بیت دێ ناچار مینیت ژ شنگالێ دەرکەڤیت و جارەکا دی دێ شنگال ڤەگەریتە سەر هەرێما کوردستانێ و پێشمەرگەیێن جانفیدا دێ جارەکا دی ل وێ دەرێ بجهـ بن و هەر تشت دێ ب یاسایێ و دوور ژ میلیشیا و سلۆگان و مەش و خوەپێشاندانێن بێ رامان برێڤە چیت، پشتی کو زانی دێ ئەڤ رێككه‌فتنه‌ بیته‌ سەدەما ئاڤەدانکرنا شنگالێ و ڤه‌گه‌ریانا گەلێ شنگالێ کو نها د که‌مپان دا دژین، نها دهێت و ب رێیا سەرۆک عەشیر و شێخێن خائین دژایه‌تییا خۆ بۆ ڤێ رێکكەفتنا دیرۆکی دیار دکه‌ن.

گه‌لۆ بۆچی په‌كه‌كه‌ ب دیتنا پێشمه‌رگه‌ی و ئالایێ كوردستانێ هار دبیت

ئەڤ کەسێ کو د ڤیدیۆیێ دا دیار دبیت و پێشمەرگەیان ب برایێن داعشێ وێنە دکەت و دبێژیت خۆ خودێ نه‌شێت پێشمەرگەیان ڤه‌گه‌رینیت شنگالێ، گەر پێشمەرگە ڤەگەرن شەنگالی دێ چەکان ل دژی وان هه‌لگرن بێ گۆمان یەک ژ وان کەسێن خۆفرۆش و وه‌لاتفرۆشە کو د دەما سەدام حسێنێ دا جاش بوویە و د دەما هاتنا داعشێ دا ژی یەک ژ وان کەسان بوویە کو ب دووڤ داعشییان کەتی داکو خۆ بپارێزیت، گەر نه‌ قەت به‌رئاقل نینە کوردەکێ ئێزدی ب ڤی ئاوایی ل دژی پێشمەرگەیان ئاخفتنان بکەت.

ب راستی ژی گه‌له‌ك نەخۆشە پارتییەک کو خۆ ب کوردستانی بزانیت و ل دژی تەخا ئاغا و ده‌ربه‌گان کار بکەت و ستراتیژییا خۆ بدانیت، نها وەک گایێن ئیسپانی لێ هاتییه‌ كو دەما ب دیتنا پارچه‌ په‌رۆكا سۆر هار دبیت ئەو ژی ب دیتنا ناڤ و ئالا و پێشمەرگەیێن کوردستانێ هنه‌ك هار دبن و ئێریشی سەر پیرۆزیێن گه‌لێ كورد دكه‌ن، ب تەنێ داکو بەرژەوەندیێن خۆ یێن حزبی پێ بپارێزن.

ل داویێ ئەم ژ ڤی کەسی و ئەو کەسێن ئەڤ ئاخفتن ب وی داینە گۆتن و ئەو کەسێن پشتەڤانییا وی دکه‌ن دبێژین، هه‌وه‌ پێ خۆش بیت یان نە، پێ ته‌حل بیت یان شرین، پێشمەرگە دێ ڤەگەرنە شنگالێ و چ هێزەک نینە رێگریێ ل هاتنا پێشمەرگەیان بکەت خودێ تێنه‌بیت، ژ بەر کو چ یەک ژ کوردێن رەسەن یێن ئێزدی ل دژی هاتنا پێشمەرگەیان نینە، نە تەنێ ل دژی هاتنا وان نینە بەلکو داخوازا وان یا سەرەکی یە.