ئه‌ندامێ ئه‌نجوومه‌ن و به‌رپرسیارێ ده‌ڤه‌را راپه‌رین یا هاوپه‌یمانییا نیشتیمانی، دوو رۆژه پاش ده‌رباسبوونا وی د ناڤچه‌یا قه‌ندیلێ ره كو سینۆرێ په‌كه‌كێ یه، ووندا بوویه.
باوه‌ر محه‌مه‌د كوڕێ مه‌زن یێ «محه‌مه‌د گرتكی» به‌رپرسێ هاوپه‌یمانییا نشتیمانی ل ده‌ڤه‌را راپه‌رین، ژ بۆ پێگه‌ها Kurdistan24 داخویانی دایه و گۆتییه كو بابێ وی ل ده‌مژمێر 9:00 سپێدێ یا رۆژا پێنجشه‌می 15/10/2020ێ ژ مالا خوه ل رانیه ده‌ركه‌تییه و ل ده‌مژمێر 12:00 هه‌مان رۆژێن مۆبایلا وی هاتییه داخستن و ووندا بوویه.
مالباتا ڤی به‌رپرسێ هاوپه‌یمانییا نشتیمانی ل راپه‌رین، ل هه‌مان رۆژا ووندا بوونێ، هێزێن ئه‌وله‌هیێ ل رانیه هایدار كرنه، لێ به‌لێ ل گۆری گۆتنا كورێ وی، هێژان تو ئاگاهی ل ده‌ربارا چاره‌نڤیسا وی نینه.
محه‌مه‌د گرتكی، ل رۆژا پێنجشه‌مییا رابووری ب ئۆتۆمبێلا خوه ژ مال ده‌ركه‌تییه، كورێ وی دبێژه: داوی جهێ كو بابێ وی لێ هاتییه دیتن، خالا زۆركان یا هێزێن ئه‌وله‌هیێ یه و پشتره د ناڤچه‌یا قه‌ندیلێ ره ده‌رباس بوویه و ل ور ووندا بویه.
تێ زانین ئه‌و ناڤچه‌یا كو ئه‌ڤ به‌رپرسێ ده‌ڤه‌را راپه‌رین یێ هاوپه‌یمانییا نیشتیمانی لێ ووندا بووی، ب سینۆرێ ده‌ستهلاتا پارتییا كاركه‌رێن كوردستانێ تێ حه‌ساب كرن.
