د سۆشیال میدیا باشوور دا، پەکەکە مژارا هه‌ری گەرمە!

گەر د نها دا ل سۆشیال مەدیایا باشوورێ کوردستانێ ب تایبەتی په‌یجێن فەیسبووکێ و توویتەرێ بنێرین، دێ ب ئاشكرایی ببینین كو مژارا هەره‌ گەرم، گه‌فێن به‌رپرسێن پەکەکێ یه‌ ل دژی باشوورێ کوردستانێ و رادەستکرنا حەفتەنینێ و ده‌ڤه‌رێن سنۆری ب ترکیێ و هه‌روه‌ها تەقاندنا بۆرییا په‌ترۆلا باشوورێ کوردستانێ یە ب دەستێ پەکەکێ.

گه‌نجێن باشوور ل گه‌ل هەبوونا پرسگرێکێن ئابووری ژبەر برینا بودجە و مووچەیێ وان ژ ئالیێ حکوومەتا ناڤەندی یا ئیراقێ ڤە، نها خەمەکا دی ژی ل سەر خەمێن وان زێدە بوویە، ئەو ژی خەما گه‌ف و بێریزیێن ڤێ دوماهیێ یێن به‌رپرسێن پەکەکێ یە کو بەردەوام دهۆلا شەرێ دگەل باشوور لیدده‌ن و باس ل شەرەکی دی دکه‌ن.

د نها دا مرۆڤ دشێت ببێژیت هەموو باشووری گه‌هشتینە وێ باوەرێ کو پەکەکە نەشەرێ بەرژەوەندیێن گەلێ کورد، بەلکو شەرێ بەرژەوەندیێن خۆ یێن حیزبی دکەت و ل جهێ کو ببیته‌ فاكته‌ره‌ك ژ بۆ بهێزکرنا پێگەها باشوورێ کوردستانێ و کێم کرنا خەمێن گەلێ باشوور، بەرەڤاژی بوویە بارگرانی و خەمەکا دی ل سەر هەموو خەم و بارگرانیێن وان.

وەها دیاره‌ ئێدی روویێ راستێ پەکەکێ ئه‌وێ ماسکێ نەتەوایەتی ل به‌رخۆ كری ژ بۆ گه‌لێ باشوور دیار و زه‌لال بوویه‌، گه‌لێ باشوور دزانیت ئێدی ئه‌و ب وی روویێ په‌كه‌كێ و کەزیێن کچێن کوردان و ئاوازێن خۆش ناهێنه‌ خاپاندن.

هەر ژ بەر ڤێ یەکێ د نها دا پرانیا گه‌نجان ل دژی پەکەکێ دنڤیسن و تەڤ دگەرن، کەسێن کو به‌ری نها ژی كه‌یف ب پەکەکێ دهات نها ئه‌و ژی ل دژی وان تەڤ دگەرن و ل دژی وان دنڤیسینن، ژبەرکو ئێدی روویێ پەکەکێ یێ بێ ماسک ژ هەر ئالی بۆ گه‌لێ باشوور دیار بوویه‌.

وه‌ها دیارە ئیدی پەکەکە نه‌شێت ب سترانان و کەزیێن کچە گەریلایان و سلۆگان و مەشێن بێ رامان، یاریێ ب هەستێن گەلێ کورد ب گشتی و گه‌نجان ب تایبەتی بكه‌ت.