رێخستنێن جڤاکا سڤیل ل دوهۆکێ ئێریشا پەکەکێ ل سەر پێشمەرگەیان پرۆتەستۆ دکن

رێخستنێن جڤاکا سڤیل ل دوهۆکێ ئێریشا پەکەکێ ل سەر پێشمەرگەیان پرۆتەستۆ دکن

ئێریشا چەکدارێن پەکەکێ ل سەر پێشمەرگەیێن کوردستانێ ل ناڤچەیا چەمانکێ کو بۆ سەدەما شەهید کەتنا پێشمەرگەیەکێ و برینداربوونا دو پێشمەرگەیێن دی هەر کو دچە پێتر کارڤەدانان ل دووڤ خوە تینە، د ڤێ دەربارێ دا رێخستنێن جڤاکا سڤیل ل دوهۆکێ ئەڤ کارێ پەکەکێ پرۆتەستۆ کر.

ئیرۆ رۆژا پێنجشەمێ 5/11/2020ێ رێخستنێن جڤاکا سڤیل ل دهۆکێ ب توندی ئێریش و زێدەگاڤیێن چەکدارێن پەکەکێ ل سەر باشوورێ کوردستانێ پرۆتەستۆ کرن و راگەهاندن، د ڤێ رەوشێ دا کو کریزێن ئابووری، سیاسی و جڤاکی د ناڤا باشوورێ کوردستانێ دە هەنە و بوونە بارگرانی ل سەر ملێن گەلێ باشوور، د دەمەکێ دا کو ئەم ل بەندێ بووین هەموو لایەن ب بەرپرسیارانە تەڤ بگەرن، لێ بەلێ پەکەکێ ب ڤی کارێ تێکدەرانە رەوش زێدەتر ئالۆز و بارێ گەلێ کورد ل باشوور گرانتر کر.

رێخستنێن جڤاکا سڤیل راگەهاند کو باشوورێ کوردستانێ ل سەر ئاستا ناڤ دەولەتی بوویە پەناگەهەک ئارام ژ بۆ کوردێن هەر 4 پارچەیێن کوردستانێ، لەوما پێویستە هەموو هەولدان ژ بۆ پاراستنا دەستکەفتێن هەرێما باشوورێ کوردستانێ بن، گەلێ ولاتپارێزێ باشوور نە هێژایی وێ یەکێ یە کو کریزا ئەولەهی ژی ل سەر کریزێن وان زێدە ببیت.

رێخستنێن سڤیل هەر وەها راگەهاندن، ب مخابنی ڤە پەکەکە، وەکو هەردەم بەرژەوەندیێن ستراتیژی و ئابووری و ئاساییشا نەتەوی و ئارامییا کوردستانێ ب رەفتارێن خوە یێن نە رەوا ئارمانج دکەت، ب تایبەتی ئێریشا ترسنوکانە یا دوهـی  4/11/2020ێ کو د ڤێ ئێریشێ دا چەکدارێن پەکەکێ پارێزەرێن راستەقینە یێن ئاخ، ئالا، سینۆر و هەموو پیرۆزیێن کوردستانێ ل ناڤچەیا چەمانکێ هەدەف کرن و چەندین پێشمەرگە شەهید و بریندار کرن.

نوونەرێ ڤان رێخستنان راگەهاند کو ئەم وەکە رێخستنێن جڤاکا سڤیل ل دهۆکێ ڤان کارێن تێکدەرانە یێن پەکەکێ ب توندی پرۆتەستۆ دکەین و داخوازێ ژ پەکەکێ دکەین رێزێ ل قانوون و سەروەرییا ئاخا باشوورێ کوردستانێ و سازیێن وێ یێن فەرمی بگریت و ڤەگەریت گۆرەپانا خوە یا خەباتێ ل باکورێ کوردستانێ و رەوشا کوردستانێ پێتر ئالۆز نەکەت.