شەرێ پەکەکێ ل دژی باشوورێ کوردستانێ، شەرەکە د خزمەتا سیاسەتێن هەرێمی یێن ئیرانێ دا

د دەمێن رابووری دا ب تایبەتی پشتی رێکەفتنا شەنگالێ دناڤبەرا هەولێر و بەغدایێ دا، شەر فرۆتنێن پەکەکێ ل دژی دۆزا کوردان و ب تایبەتی ستاتۆیا سیاسی یا باشوورێ کوردستانێ، روویەک نوو ب خوە ڤە دیتییە و ب لێنێرینەکی ل سەر ستراتیژیێن هەێمی یێن رژێما ئیرانێ ئەڤ یەک ب زەلالی دیار دبیت کو شەر فرۆتنێن رێڤەبەرێن پەکەکێ ب تەنێ د خزمەتا سیاسەتێن هەرێمی یێن تەهرانێ دا ب رێڤە دچن.

هەرچەند کو شاندنا گەریلایا ژ بۆ شەنگالێ و ناڤچەیێن کوردستانی یێن دەرڤەی ئیدارەیا هەرێما کوردستانێ هەر ل دەستپێکێ ڤە ئاشکەرا بوو کو پیلانەکا هەڤبەشا ئیران و پەکەکێ یە و ئارمانجا رژێما تەهرانێ وەکو ئەو ب خوە دبێژن “میحوەرا بەرگرییێ” ل تەهرانێ گرێ بدەت، ژ بۆ سەرخستنا تیئۆرییا وان یا ب ناڤێ “هیلالا زێرین” ئانکو کەمەرا شیعەیان، پەکەکە وەکە قولپەک ژ قولپێن زنجیرا وێ میحوەرێ دانابوو، لێ بەلێ رێڤەبەریا پەکەکێ ب چەواشەکاری دخواست ڤێ راستیێ ل بەر چاڤێن گەل شوولی بکەت. هەڤدەم دگەل ڤێ یەکێ کو چەکدارێن پەکەکێ ل شنگال و کەرکووکێ و …. د بن ناڤێ حەشدا شەعبی و حکوومەتا عیراقێ دا راستە راست ب پارە و ئالیکاریێن لۆجیستی یێن ئیرانێ کار دکر، لێ بەلێ هەر دو ئالیان هەول ددا هندی ئەو بکارن ڤێ چەندێ بڤەشێرن.

پشتی ئیمزا کرنا رێکەفتنا شەنگالێ د ناڤبەرا حکوومەتا هەرێما کوردستانێ و حکوومەتا فیدرالا ئیراقێ و پێشوازیکرنا گەلێ باشوور ب گشتی و ئێزدییان ب تایبەتی ل ڤێ رێکەفتنێ، ئیران و پەکەکە هندە ب لەز بوون ژ بۆ دژاتی کرنا ڤێ رێکەفتنێ کو ئێدی نەکارین هەڤکاریێن دناڤبەرا خوە دا بڤەشێرن و ب ئاشکەرا کەتنە پیلانگێرانێ ژ بۆ ڤێ چەندێ کو رێ ل جێبەجێکرنا ڤێ رێکەفتنێ بگرن.

ئەگەر ل گۆر “ریال پۆلەتیک”ڤە ئەم ل رێکەفتنا شەنگالێ بنێرین، ئەم دکارین باشتر ژ ترسێن تەهرانێ و (ئیمرالی-قەندیل)ێ فام بکین. ژبەرکو ئەڤ رێکەفتنە د بەرژەوەندیا پرسگرێکا کوردی ب گشتی و شەنگالێ ب تایبەتی دا یە و پێنگاڤەکا گرنگە ژی د ئاراستا جێبەجێکرنا مادەیا 140 کو ئەڤە چەندین سالە شیعەیێن لایەنگرێن ئیرانێ ل ئیراقێ رێ ل جێبەجێکرنا وێ دگرن. هەڤدەم دێ زەرەرمەندێن یەکێ ژی پەکەکە و ئیران بن کو دخوازن ب رێیا ئافراندنا کریزان و نەئارامیێ د ڤان ناڤچەیێن کوردستانێ دا بگەهن مەرەمێن خوە یێن قرێژی.

رۆپەلا “خبر24” کو یەک ژ رۆپەلێن نێزیکە ژ ناڤەندێن ستراتیژی یێن ئیرانێ و گەلەک جاران خەونێن هەرێمی و نێڤدەولەتی یێن ئیرانێ بەلاڤ دکەت، د شیرۆڤەیەک دوور و درێژ دا ب هۆرگلی باس ل لهەڤهاتنا شەنگالێ و زەرەرێن وێ ژ بۆ سیاسەتێن مایتێکرنێن ئیرانێ د ناڤچەیێ دا کرییە. د ڤان شیرۆڤەیان دا کو رۆپەلا “خبر24” ب تەنێ چەند رۆژان بەرا شەر فرۆتنێن پەکەکێ ب دانانا وێنەیەکێ ژ مەسعوود بارزانی و کازمی، د بن ناڤێ “سیناریۆیا قوت کرنا باسکێ بەرگریێ ل شەنگالێ” پارڤە کرییە، ب زەلالی ئێماژە ب ڤێ یەکێ کرییە کو ئیران ب رێیا پەکەکێ کارییە میحوەرەکی کو ئەو ب ناڤێ “میحوەرا بەرگریێ” ب ناڤ دکەن دروست بکەت کو ئەڤ میحوەر تەهرانێ و بەیرۆتێ ب رێیا ئەردی ب هەڤ را گرێ ددەت و ب دەرفەتەک زێرین ژ بۆ مایتێکرنێن هەرێمی یێن رژێما ئیرانێ ددەتە ناساندن. مەرەم ژ میحوەرا بەرگرییێ هەموو ئەو میلیشیا و گرووپێن چەکدار وەکو حیزبوللاها لوبنانی، حکوومەتا بەشار ئەسەد و میلیشیایێن دووڤەلانکێن ئیرانێ ل سووریێ و میلیشیایێن حەشدا شەعبی و پەکەکە و گرووپێن دی یە کو رژێما ئیرانێ د ناڤچەیێ دا ژ بۆ ئەئارامی دروستکرنێ و تیرۆرێ و کارێن تێکدەر بکار دئینیت و ب رێیا وان بەرژەوەندیێن خوە ل رۆژهلاتا ناڤین و هەموو جیهانێ دپاریزیت.

شەرێ پەکەکێ ل دژی باشوورێ کوردستانێ، شەرەکە د خزمەتا سیاسەتێن هەرێمی یێن ئیرانێ دا

د راپۆرتەکێ دا رۆپەلا ناڤبووری ئاماژە ب ڤێ یەکێ کریە کو ب جێبەجێکرنا لهەڤهاتنا شەنگالێ و دەرکرنا پەکەکێ ل شەنگالێ، وەکە ئەو دبێژن “میحوەرا بەرگریێ” یان ژی ئەوا کو د راپۆرا خوە دا ئاماژە پێ کری “باسکا بەرگریێ” دێ د گرنگترین جیهـ دا قوت بیت و ب ڤێ یەکێ دێ پیلانێن هەرێمی یێن تەهرانێ و سوپایێ پاسداران راستی پرسگرێکەک مەزن هێن.

ئیرانێ ب رێیا حەشدا شەعبی و پەکەکێ ل دەستپێکێ هەول دا گەلێ کوردستانێ ل دژی وێ رێکەفتنێ هان بدەت لێ بەلێ سەرکەفتن نەئینا. هەول دا ب رێیا هندەک عەرەبێن کرێ گرتی کو روونشتڤانێن جیهێن دی بوون و قەت ل شەنگالێ نە ژییانە، ب ناڤێ گەلێ شنگالی خوەپێشاندانا بکەن و ڤان خوەپێشاندانا وەکو خوەپێشاندانا گەلی شنگالی بدەنە نیشاندان لێ د ڤێ چەندێ دا ژی سەرکەفتی نەبوو. ژبەر ڤێ یەکێ پەکەکە ئەرکدار کر شەرەکی ل دژی هەرێما کوردستانێ رابگهینیت. پیلان ژی ئەڤەیە کو ببێژن پەکەکە ل دژی پارتی شەری دکەت و لایەنێن دژبەرێن پارتی ل کوردستانێ بدەتە پال لایەنێ شەرخواز “پەکەکێ”.

هەرچەند کو دبیت د ڤێ یەکێ دا حەتا رادەیەکێ سەرکەفتن ئینابیت ژی و هندەک کەسێن گەندەل و کرێ گرتی ل کوردستانێ د مەدیایێن خوە دا وسا بدەنە نیشاندان کو ئەڤ شەرە، دێ شەرێ دناڤبەرا پارتی و پەکەکێ دا بیت، لێ بەلێ جیهێ خوەشحالیێ یە کو گەلێ کورد هشیارترە ژ ڤێ یەکێ کو باوەر ژ نووچەیێن ب ڤی رەنگی بکەت و ڤێ راستیێ فام نەکەن کو یاکو هاتیە ئارمانج کرن د ڤی شەری دا ب تەنێ پارتییا دیمۆکراتا کوردستانێ نینە بەلکو ستاتۆیا سیاسی یا باشوورێ کوردستانی و میحوەرێ نەتەوی و رزگاریخوازێ کوردستانێ یە و شەرخواز ژی ئاموورێن دەستێ داگیرکەرێن کوردستانێ و دوژمنێن دۆزا رەوا یا کوردستانێ نە.

یاکو جیهێ ئەسەفێ یە د ڤێ شەرخوازی یا پەکەکێ دا کو ب ئاشکەرا خوە ئێخستیە د خزمەتا پیلانێن ناڤچەیی یێن ئیرانێ دا و چاپەمەنیا رژێما تەهرانێ ب بێ هیچ ڤەشارتنەک باس ل ڤێ یەکێ دکەن کو پەکەکە بەشەکی گرنگێ میحوەرا سوپایێ پاسداران د ناڤچەیێ دا پێک تینیت، لێ بەلێ رێڤەبەریا ڤێ ریخستنێ ل قەندیلێ دخوازیت وەکو شەرەکێ ل دژی پارتیا دیمۆکراتا کوردستانێ و د بەرژەوەندیا گەلێ کورد دا بدەتە نیشاندان.! ئەڤە ژی جیهێ ئەسەفێ یە کو رێڤەبەرێن پەکەکێ یان هند گەلێ کورد ب نەزان دزانن کو ب ڤی رەنگی ب ئاشکەرا درەوان دکەن و دخوازن خەلک باوەر بکەت، یان ژی ئەڤەیە کو ل سەر وێ باوەرێ نە کو خیانەت کرن ل کوردستانێ دەمە دبیتە هەلوەستەک نۆرمال و شەرم پێ نەڤێت.

ل داویێ ئەم دکارین ببێژین هەرچەند کو د دیرۆکا کوردستانێ دا خائینان هەردەم هەول دایە بەهانەیا ژ بۆ خیانەتا خوە بگرن هەر وەکو ڤێ کو د 3ێ سالێن رابووری دا ل سەر فرۆتنا کەرکووکێ رووی دای، لێ بەلێ نەتەوا کورد و فکارێن رزگاریخواێن کوردستانێ ژ ڤێ یەکێ مەزنتر و خەباتگێر ترن کو ل کوردستانێ دا خیانەت بهێتە کرن و وەکو کارەکێ نۆرمال بهێتە دیتن و حەتا کو کوردەک مابیت خیانەت، کارەکێ قرێژ و گەمارە و خائین ژی دێ شەرمەزار و روو رەش بن. هەڤدەم خوەناسکرنا نەتەوی یا کوردان گەهشتیە ئاستەکێ کو نە پەکەکە و نە هیچ لایەنەک دی نەشێت پاراستنا ئەنیا فەوازوی یا رەژێما ئیسلامی یا ئیرانێ و سیاسەتێن وێ یێن داگیرکار و دژە کورد ل کوردستانێ، ب ناڤێ شەرکرن ل دژی پارتیەکا کوردستانێ بەرچاڤ بکەت و رەنگێ خیانەت و شەرخوازییا خوە یا نە رەوا کێم رەنگ بکەت.

پوستێن ھەمان بەش