ئێریشا ده‌وله‌تا تركیێ یا ل سه‌ر باشوورێ كوردستانێ به‌رده‌وامه و ئیرۆ حه‌ره‌كه‌تا چه‌كدارێن په‌كه‌كێ ل سینۆرێ ناڤچه‌یا ده‌ركارێ تۆپباران كر، په‌كه‌كه ژی دبێژیت: په‌ده‌كێ ئه‌و ئێریش كرییه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا سێشه‌می 10/11/2020ان، تۆپهاڤێژێن ئارته‌شا تركیێ ژ سینۆرێ باكورێ كوردستانێ، سینۆرێ ناڤچه‌یا ده‌ركارێ یا گرێدا قه‌زا زاخۆ تۆپباران كر، لێ به‌لێ زرارێن ڤێ ئێریشێ نه‌هاتنه زانین.
ده‌ست نیشان كر، مووشه‌كێن ئارته‌شا تركیێ ب ناڤچه‌یێن چیایی كه‌تنه و دومانه‌كه مه‌زن ل جیێ كه‌تنا مووشه‌كان به‌رز بوویه.
د ڤێ ده‌ربارێ ده، مه‌دیا په‌كه‌كێ ئه‌ڤ نووچه وها ڤه‌گوهاستییه و گۆتییه كو بنگه‌هێن په‌ده‌كێ هه‌رێمێن گه‌ریلایان تۆپباران كرنه، ئه‌ڤ ژی خزمه‌ته‌كه مه‌زنه كو مه‌دیا په‌كه‌كێ ژ بۆ ده‌وله‌تا تركیێ دكه.
ل گۆری ئاگاهیێن تایبه‌ت یێن پێگه‌ها داركا مازی، ژ ده‌ستپێكا ئێریشا ده‌وله‌تا تركیێ یا ل سه‌ر باشوورێ كوردستانێ كو ل ناڤه‌راستا مه‌ها خزیرانا ئیسالێ ده‌ست پێ كربوو، 53 گوندێن گرێدای قه‌زا زاخۆ ب سه‌ده‌ما په‌كه‌كێ هاتنه چول كرن، 15 ژێ ل سینۆرێ ناحیا ده‌ركارێ نه.
