راگھاندنکار و کەسێن سەر ب پەکەکێ کو ل سەر سۆسیال مەدیایێ کار دکەن، هەموو نرخێن نەتەوی، جڤاکی و شەخسی بن پێ دکەن. ب هەموو رەنگا گۆتنێن نە راست بەلاڤ دکەن.  ڤی تشتی ئەم ھەر رۆژ ل راگھاندنێ دا دبینن کو نووچەیێن بێ بنگەھ و ئاگاھی یێن نە راست بەلاڤ دکەن. یەک ژ وان ئاگاھییان ئەو ئاگاھییێن نە راستن یێن کو ڤێ داوییێ ل سەر ئەندامێ سەرکرداتییا پارتی، عەلی عەونی د ڤان رۆژان دا ھاتیە بەلاڤ کرن.

ژ بەر کو عەلی عەونی بەردەوام ھەلوەستێن نەتەوی نیشان ددەت گەلەک جارا بوویە ئارمانجا نەخوێرخازا.  تایبەت ژی ڤان رۆژا، ژ بەر کو ل سەر شەھید کرنا پێشمەرگەیەکێ ب دەستێ پەکەکێ، عەلی عەونی ھەلوەستەک توند نیشان دا ھەمان دەم دا راستییێن پەکەکێ ل ھەرێما کوردستانێ ئاشکەرا کرن. د ئەنجام دا ژی ل سەر سۆسیال مەدیایێ ھاتە ئارمانجکرن و ئێریشێن بێ ئەخلاقانە ل سەر وی ھاتنە کرن.

ئەندام و قەلەمشۆرێن پەکەکێ ل سەر سۆسیال مەدیایێ بەلاڤ کر کو کورێ عەلی عەونی دەست درێژی ل سەر ژنەکێ کرییە.  ناڤێ وی کوری ژی ساسان عەونی یە.  ب زمانێ ترکی ئەڤ نووچە بەلاڤ کرن کو کەس ئاگاھداری راستییێ نەبیت.

لێ بەلێ پشترا ھندەک گەنجێن نشتمانپەروەر ئەڤ درەوە ئاشکەرا کر و گۆتن کو ئەڤ کەسێ دهێتە باس کرن نە کورێ عەلی عەونی یە نە ژی مرۆڤێ وی یە. ئەو کەسێ ئالیگرێن پەکەکێ وەکو کورێ عەلی عەونی دایە ناساندن دەرکەت کو ل سالا ١٩٧٠ ژ دایک بوویە و عەلی عەونی ژی سالا ١٩٦٨ ژ دایک بوویە. ئانکو ل گۆر قەلەم شۆرێن پەکەکێ دەما عەلی عەونی ٢ سال بوو ئەڤ کورە هەبوویە!

پەکەکە حەرەکەتەک تاکرەوی یە و دەرڤەی خوە چ کەسەکێ قەبوول ناکەت. ھەگەر کەسەک پەکەکێ رەخنە بکەت، ئەو کەس ھەر کی بەیت ژی پەکەکە دبێژیتێ کو ھوون سیخورێن ترکیێ نە، ھوون ئەندامێن میتێ  نە.  پەکەکە ل باکورێ کوردستانێ و ئەورۆپا ب ھزاران موخالیفێن خوە ب ڤان گۆتنا و ب زللـەھ لێدانێ بێدەنگ کرن. گەلەک کەسێن کو ل ئەورۆپا پەکەکێ رەخنە دکەن دوکانێن وان تێنە شەوتاندن، لێدانێ دخوەن یان ژی ژ بەر گەفێن پەکەکێ ل کارێ خوە پاشڤە دچن.

پەکەکە کەسێن کو ب ڤی ئاوایی بێدەنگ نەبیت دکوژیت.  پەکەکە ب کوشتنا مرۆڤا ل باکورێ کوردستانێ ب ناڤ و دەنگە.

گەلۆ راستییا بوویەرا ل بەر دەرێ دادگەها زاخۆ چییە؟!

راستییا بوویەرا ل نێزیکی دادگەھا زاخۆ قەومی ئەڤەیە کو، ل دادگەھا زاخۆ کەیسا دادگەھکرنا ژن و مێرەکی ھەبوو، زەلام سەر ب عەشیرەتا “گەودا”یە، ژن کچە کوردەک ژ باکورێ کوردستانێ یە، بەرا سێ رۆژان ژ ڤێ بوویەرێ ب بریارا دادگەھێ ئەڤ ژن و مێر ژ ھەڤ ھاتینە تەلاق دایین، ل گۆر بریارا دادگەھا زاخۆیێ زارۆکا ڤان ژن و مێرا ژ بۆ زەلامی مایە، پشتی کو زەلام ل دادگەھێ دەردکەڤیت دچیتە جھێ راوەستاندنا ترۆمبێلان و ل وێ دەرێ ب بەران ئێریشی ترۆمبێلا خەزۆرێ خوە دکەت، دەما پۆلیس دخوازن وی بگرن ئەو زەلام گەفان ل پۆلیسان دکەت کو نارنجۆکەک ل جەم من ھەیە و گەر نێزیکی من ببن ئەزێ نارنجۆکێ ب خوە دا بتەقینم، داکو زرارێن جانی نەبن پۆلیس نێزیکی وی نابن، مێرک رێیا خوە دبینیت و ل ترۆمبێلا خوە سووار دبیت و دچیت.

یا مە ل سەر بوویەرا نێزیکی دادگەھا زاخۆ باس کری راستییا مژارێیە، ب چ رەنگان ئەو کەس نە کورێ عەلی عەونی یە، کەسێ کو پەکەکێ وەکو کورێ عەلی عەونی دایو ناساندن ئانکو “ساسان عەونی” ژ بلی کو ب تەنێ جوداھیا دناڤبەرا ژیێ وی و عەلی عەونی ٢ سالن، ئەو وەزیرێ وەزارەتا شارەوانی و گەشتوگۆزارە ل حکوومەتا ھەرێما کوردستانێ و چ پەیوەندیەک خێزانی دگەل عەلی عەونی نینە.

ژ بلی ڤێ یەکێ مالا عەلی عەونی ل زاخۆ نینە، بەلکو ل ھەولێرێ یە و کورێ وی د ژییێ نێزیکی ١٥ سالیێ دایە و ئەڤە دەما ١٠ رۆژانە ژ بەر تووشبوونێ ب ڤیروسا کۆرۆنا ل مالا خوە ل ھەولێرێ دەرنەکەتییە.