په‌كه‌كه‌ ژ داخوازا سه‌رخوه‌بوونێ به‌ر ب دووڤه‌لانكیێ

په‌كه‌كه‌ ژ داخوازا سه‌رخوه‌بوونێ به‌ر ب دووڤه‌لانكیێ

 كه‌ژال ده‌روێش/نڤیسکار

پێویسته‌ ئه‌م خوه‌ ژ وێ عاتیفێ دوور بكه‌ین ئه‌وا كو ب هه‌زاران سالانه‌ مه‌ دكوژیت و ل پێناڤێ وێ قوربانیێ ب هه‌ر تشتی ژ بۆ خزمه‌تا دوژمنێن گه‌لێ كورد دده‌ین

هه‌گه‌ر ئه‌م بخوازین راستییا بوویه‌رێن كو ل ده‌ڤه‌رێن كوردی ب تایبه‌ت ل باشوورێ كوردستانێ چێدبن بزانین، بگره‌ ژ ئیستفزازاتێن سه‌ربازی یێن كو ئه‌وله‌هی و ئێمناهییا هه‌رێما باشوور و حكوومه‌تا وێ یا شه‌رعی ب سه‌رۆكاتییا مه‌سروور بارزانی دكه‌نه‌ ئارمانج، هه‌روه‌ها هێزێن پێشمه‌رگه‌ی كو كوردستانێ و گه‌لێ وێ ژ رێكخستن و میلیشیایێن تیرۆری د پارێزن، ئه‌و هه‌رێما كو نها د زه‌حمه‌ترین قووناغ دا ب ئه‌گه‌را ڤیرۆسا كۆرۆنایێ ده‌رباس دبیت، پێویسته‌ ئه‌م خالان ل سه‌ر پیتان دانین و خوه‌ ژ وێ عاتیفێ دوور بكه‌ین ئه‌وا كو ب هه‌زاران سالانه‌ مه‌ دكوژیت و ل پێناڤێ وێ قوربانیێ ب هه‌ر تشتی ژ بۆ خزمه‌تا دوژمنێن گه‌لێ كورد دده‌ین.

د راستی دا كارێن ئیستفزازی یێن كو پارتییا كاركه‌رێن كوردستانێ ل سه‌ر ئاستێ سه‌ربازی و مه‌دیایی، ته‌نێ خزمه‌تا به‌رژه‌وه‌ندیێن دوژمنێن گه‌لێ كورد ل هه‌ر چار پا‌رچه‌یێن كوردستانێ دكه‌ت، له‌وما ژ بلی خۆفرۆشیێ نكارم چ ناڤێن دی ل ڤان كاران بكم، هه‌روه‌ها ب ئه‌گه‌را رێڤه‌به‌رییا په‌كه‌كێ ئه‌وا كو گه‌له‌ك ب زه‌لالی دبێژیت كو وان چ ئه‌جێندایێن نه‌ته‌وه‌ی و یێن هه‌ڤئاوا نینن، به‌لكو ئه‌و ژ بۆ براتییا گه‌لان و هنده‌ك سلۆگانێن نه‌به‌رئاقل و نه‌لۆژیكی خه‌باتێ دكه‌ن.

په‌كه‌كێ ده‌ست ژ ئارمانجا سه‌رخوه‌بوونا كوردستانێ به‌ردایه‌، ئه‌وا كو ل ده‌ستپێكا دامه‌زراندنا خوه‌ خه‌بات ژ بۆ كری و ل پێناڤێ وێ پتری 40 هه‌زار گه‌نجێن كورد ب كوشتن داین، په‌كه‌كێ خه‌ونا سه‌رخوه‌بوونێ كرییه‌ كابویس و كه‌تواره‌كێ ته‌حل ل سه‌ر ملێ هه‌لگرێن ڤێ ئارمانجێ ل هه‌ر چار په‌رچه‌یێن كوردستانێ.

بۆچی په‌كه‌كه‌ ئێدی راست و چه‌پ وه‌كه‌ گایێ هار هێرشان دكه‌ت؟

دا ئه‌م ڤه‌گه‌رین وان ئه‌گه‌ران و كانێ بۆچی په‌كه‌كه‌ ژ بال دوژمنێن گه‌لێ كورد ڤه‌ دهێته‌ بكارئینان، گه‌له‌ك ژ پرسێن سیاسی ل ناڤچه‌یێ هێژان ژ بۆ ته‌ڤاهییان ئالییان نه‌زه‌لالن، هه‌گه‌ر ئه‌م ژ خوه‌ بپرسین چما نها؟ و چما ئه‌ڤ پارتییه‌ راست و چه‌پ وه‌كه‌ گایێ هار ئێریشان دكه‌ت‌؟!

د راستی دا دێ هنده‌ك گوهه‌رین ل سه‌ر ئاستا ناخوه‌ چێبن، ژ وان دروستبوونا هه‌رێما سوننی ل ئیراقێ، لێ گه‌ر ئه‌م ژ خوه‌ بپرسین، چ ئالی دێ زیانێ ژ ڤێ هه‌نگاڤێ بینیت‌؟

دێ زانین كو هیلالا شیعی دێ بهێته‌ قوت كرن، پرسا دی په‌یمانا ل نێڤبه‌را هه‌ولێر و به‌غدایێ یه‌ كو ژ بۆ ده‌رێخستنا په‌كه‌كێ هاتییه‌ ئیمزا‌ كرن كو دێ ڤێ هیلالێ پارچه‌ كه‌ت‌، ژ به‌ر كو په‌كه‌كه‌ ل شنگالێ د چارچووڤه‌یا (میحوه‌رێ مقاوه‌مێ) یێ ئیرانێ دا‌ یه‌، له‌وما زیانڤێكه‌فتیێ ئێكێ ل هه‌ردوو حاله‌تان ته‌نێ ر‌ژێما ئیرانێ یه‌.

له‌وما د ڤێ ده‌ما هه‌ستیار دا‌ په‌كه‌كێ ده‌رفه‌ت ژ بۆ خوه‌ دیت و ژ به‌ر كو ئالیێن سه‌ره‌كی‌ ب مه‌له‌فا رۆژهلاتا ناڤین و هلبژاتنێن ئامه‌ریكایێ ڤه‌ مشه‌غول بوون، له‌وما ئیرانێ په‌كه‌كه‌ ژ بۆ لێدانا ئه‌وله‌هییا باشوورێ كوردستانێ لڤاند، ب ئارمانجا چێكرنا فتنێ ل نێڤبه‌را گه‌لێ باشوور، یا راست ئه‌ڤ هه‌ول ژ بۆ لێدانا ده‌ستهلاتا شه‌رعی یا باشوور دهێنه‌ هاڤێتن.

ل ڤێر پێویسته‌ ئه‌م ئه‌جێندایێن تركیێ ل باشوورێ كوردستانێ ژبیر نه‌كه‌ین كو ئه‌ڤ ده‌وله‌ته‌ و مفادارێ یه‌كه‌مینه‌ ژ وان بوویه‌رێن كو نها لێ دهێنه‌ ژیان كرن، تركیێ ئۆپه‌راسیۆنه‌كا ب گومان ل دژی په‌كه‌كێ ل باشوور ده‌ست پێ كرییه‌، ب به‌هانه‌یا وێ ئۆپه‌راسیۆنێ سوپایێ تركیێ نێزی 30 كیلۆمه‌تران كه‌تییه‌ د خاكا باشوور دا، 12 نوقته‌یێن ستراته‌جی ئاڤا كرینه‌ و به‌رده‌وامیێ دده‌ته‌ ئه‌جێندایێن خوه‌.

ئارمانجێن په‌كه‌كێ گه‌له‌ ژ فكرا نه‌ته‌وه‌یی یا كوردستانێ دوور كه‌تینه‌

ده‌رئه‌نجام زێده‌ گرنگه‌، تشتێ ب ته‌ڤاهی كو دكارم ببێژم ئه‌ڤه‌یه‌‌: ئارمانجێن پارتییا كاركه‌رێن كوردستانێ پر ژ فكرا نه‌ته‌وه‌ی یا كوردستانێ دوور كه‌تینه‌، ئه‌ڤ پارتییه‌ وه‌ك هێزه‌كا‌ ب كرێ لێ هاتییه‌ ژ بۆ جی ب جی كرنا ئه‌جێندایێن ده‌وله‌تێن داگیركه‌ر ل هه‌ر چار پا‌رچه‌یان، ئارمانجا وێ بوویه‌ زیان گه‌هاندن ب ئێمناهییا نه‌ته‌وه‌ی یا كوردی و هه‌بوونا گه‌لێ كورد.

بانگه‌وازییا من ژ بۆ هه‌ر كورده‌كێ ولاتپارێز كو باوه‌ر ب نه‌ته‌وه‌ییا خوه‌ هه‌بیت، هه‌موه‌خت ژ بۆ ته‌ڤ رۆشه‌نبیر و سیاسیێن كورد، ژ سیاسه‌تا گرتنا نیڤا داری دوور بكه‌ڤن و هه‌لوه‌ستێن خۆ‌ ب زه‌لالی ئاشكرا بكه‌ن، ئه‌م نها ل دۆریانه‌كێ نه‌، دێ هه‌بین یان نامینین.

پوستێن ھەمان بەش