ناڤەندا رەڤەندا کورد د داخویانیەکێ ئێریشا پککێ بۆ سەر پێشمەرگەیێ کوردستانێ شەرمەزار کر و پشتەڤانیا خوە بۆ قەقارەیا ھەرێما کوردستانێ کر.
ئیرۆ رۆژا شەمیێ ناڤەندا رەڤەندا کورد د داخویانیەکێ دە پشتەڤانیا خوە ژ بۆ قەوارەیا سیاسییا ھەرێما کوردستانێ، دام و دەزگایێن دەستووری، یاسایی و دەستکەڤتیێن نیشتمانی و نەتەوەیی ئاشکەرە کر و بانگ ل پککێ کر د ڤێ رەوشا ھەستیاریا باشوورێ کوردستانێ دە کەدا خەلکێ بەرچاڤ بگرن، دەست نەاڤێژن کار و بارێن ھکوومەتا ھەرێما کوردستانێ، رێزێ ژێ رە بگرن.
ناڤەندا رەڤەندا کورد راگاھندیە: “مخابن، د ڤێ رەوشا ھەستیارا ئابۆری، تەندروستی و سیاسیا ب تایبەتی ل ھەرێمێ و کوردستانێ دە دڤێ ھنەک زانیاری و شیرۆڤە وەرن کرن د دەربارەیێ ئێریشا ل سەر ھێزا پێشمەرگەیێن کو ستوویێ تەرۆریستێن داشێ تێکشکاندن. ئەو گرژی و ئالۆزیێن ژ ئالیێ پککێ ڤە تێنە کرن ژ خەینی تێکدانا ئارامی و ئەولەھیا ھەرێما کوردستانێ، دژایەتیا دەستکەڤتیێن نیشتمانی و نەتەوەیییێن گەلێ مە، مەترسییە ژ بۆ ژیان و بەرژەوەندیێن ھەرێما کوردستانێ و باندۆرا وێیا ل سەر جڤاتا ناڤنەتەوەیی ژی.”
ھەروھا ناڤەندا رەڤەندا کورد ل دەرڤە تەکەز دکە، “ئەم د ڤێ دەمێ دە پشتگریا خوە ژ بۆ قەوارەیا سیاسییا ھەرێما کوردستانێ، دام و دەزگایێن دەستووری، یاسایی و دەستکەڤتیێن نیشتمانی و نەتەوەیی ئاشکەرە دکن. ئەم دەستدرێژیا ل سەر بەرژەوەندیێن نیشتمانی شەرمەزار دکن.”
ناڤەندا رەڤەندا کورد ل دەرڤە بانگ ل پککێ ژی دکە و دبێژە، “ئەم ژ سەرکردەیێن پککێ دخوازن کو د ڤێ رەوشا ھەستیاریا باشوورێ کوردستانێ دە کەدا خەلکێ بەرچاڤ بگرن. ژ بۆ رێگریا بوویەرێن نەیینی، دڤێ دەست نەاڤێژن کار و بارێن ھکوومەتا ھەرێما کوردستانێ، رێزگرتنێ ژێرە بکن، و ڤەگەرن مەیدانا خوەیا راستی کو ئەو ژی باکورێ کوردستانێیە.”
