نڤیسکار و شیرۆڤەکارێ سیاسی سەلیم چوروککایا ل سەر کریارێن پەکەکێ یێن ل ھەرێما کوردستانێ دیار کر: “دڤێت ھەموو کورد بانگ ل پەکەکێ بکن و ببێژنێ دڤێت کورد ب دەستێ کوردان نەیێن کوشتن و پەکەکە د دەستێ دەولەتان دا ئاموورە. “
ل سەر ئێریشێن پارتیا کارکەرێن کوردستانێ (پەکەکێ)یێن ل دژی ھەرێما کوردستانێ، کو ل سینۆرێ ترکیێ بۆریا پەترۆلا ھەرێما کوردستانێ تەقاندبوو و د ئێریشەکێ دا پێشمەرگەیەک شەھید کربوو، سەلیم چوروککایا ل سەر ڤێ مژارێ ژ باژارێ ھامبورگێ یێ ئالمانیایێ بەشداری بولتەنا نووچەیان یا K24 بوو و بەرسڤ دا پرسێن جەمال باتون.
سەلیم چوروککایا دەستنیشان کر کو سەرۆک بارزانی شەرێ کورد و کورد حەرام کریە و دڤێت ھەموو کورد بانگ ل پەکەکێ بکن و ببێژنێ دڤێت کورد ب دەستێ کوردان نەیێن کوشتن.
چوروککایا دیار دکەت: “پێدڤی یەھەموو پارتیێن کورد بریارەکا وسا بدەن کو کورد ب دەستێ کوردان نەیێن کوشتن.”
هەڤدەم دگەل ڤێ یەکێ کو گەلەک رێخستن و پارتیێن ژ باکور و رۆژھلاتێ کوردستانێ ل ھەرێما کوردستانێ ھەنە و رێز ل سەروەریا وێ دگرن، لێ پەکەکە و دەردۆرا وێ، رێزێ ل ھەرێما کوردستانێ ناگرن. سەلیم چوروککایا ل سەر ڤێ مژارێ دیار کر: “پەکەکە دچوو سووریێ ئیزن وەردگرت ل سووریێ دسەکنی، دچوو ئیرانێ ئیزن دگرت دسەکنی، دچوو ئیراقێ ئیزن دگرت دسەکنی، لێ ژ کوردستانێ ئیزنێ ناوەرگریت. ترکیا، ئیران، ئیراق و سووریا دخوازن ھەرێما کوردستانێ خراب بکەن. پەکەکە د دەستێ وان دا ئاموورە.”
ھەموو پارتیێن کوردستانێ ل ھەمبەر کریارێن ڤێ داوییێ یێن پەکەکێ ل ھەرێما کوردستانێ ھەلوەست نیشان دان و دیار کرن کو دڤێت پەکەکە رێزێ ل سەروەریا ھەرێما کوردستانێ بگریت، ل سەر پرسا “گەلۆ پەکەکە دێ گوھداریا رەوشەنبیر و پارتیێن کوردی کەت” سەلیم چوروککایا دیار کر کو ئەگەر ئیرادەیا پەکەکێ ھەبیت، دێ گوھداریێ کەت، لێ ئەگەر ئیرادەیا وان ئیران و حەشدا شەعبی بیت، گوهداریێ ناکەت.
