ئه‌نجوومه‌نا ئه‌وله‌هییا ناڤده‌وله‌تی ژ نه‌چاری و ته‌نگاڤی دێ كۆمبوونه‌كا‌ بله‌ز ساز كه‌ت ژ بۆ كو ده‌وله‌تێن زلهێز هه‌لسه‌نگاندنێ بۆ داخویانییا كۆمیتا ناڤه‌ندی یا په‌كه‌كێ بكه‌ن، ئه‌وا ئه‌ڤرۆ به‌لاڤ كری، هه‌موو ئاماژه‌ ب وێ ئاراستێ دچن ره‌وشا نه‌ئاسایی یا هه‌ری خه‌ته‌ر ل دنیایێ بهێته‌ راگه‌هاندن و له‌شكه‌رێن ده‌وله‌تان بكه‌ڤنه‌ د نه‌فیر عام و ئاماده‌باشیێ دا، ئه‌ڤه‌ ژی ب ئه‌گه‌را ده‌ستپێكرنا په‌كه‌كێ بۆ «به‌رخوه‌دانا ئه‌نتیفاشیست» یا «سه‌ربه‌ستكرنا رۆژهه‌لاتا ناڤین و ته‌ڤاهییا مرۆڤایه‌تیێ»، ئه‌نجوومه‌نا ئاساییشێ حه‌یری مایه‌ و دبێژیت: ره‌وش نه‌زه‌لاله،‌ لێ به‌لێ گوهه‌رینێن مه‌زن دێ ل ده‌مه‌كێ‌ نێزیك چێبن.

پارتییا كاركه‌رێن كوردستانێ، ئه‌ڤرۆ په‌یامه‌ك ژ بۆ سالڤه‌گه‌را 43ێ یا دامه‌زراندنا رێكخستنا خوه به‌لاڤ كر، پێنگاڤا «ده‌م ده‌ما ئازادیێ» یه‌ راگه‌هاند و هنده‌ك ئارمانجێن پر عه‌جێب، پر مه‌زن و پر نه‌لۆژیكی تێدا‌ ده‌ست نیشان كرینه‌، بۆ نموونه‌ «سه‌ربه‌ست كرنا رۆژهه‌لاتا ناڤین ژ فاشیزمێ، به‌لكو پتر دبێژیت‌: ئه‌م دێ مرۆڤایه‌تیێ سه‌ربه‌ست كه‌ین»!.

کۆمیتەیا ناڤه‌ندییا په‌كه‌كێ د داخویانیا خوە دا بانگ ل ھەر کەسێ کر کو ب خورتی تەڤلی پێنگاڤا بەرخوەدانێ یا ب ناڤێ «ده‌م ده‌ما ئازادیێ» یه‌ ببن و خواستییه‌ «به‌رخوه‌دانا ئه‌نتیفاشیست» ل هه‌ر قادێ بەلاڤ بکه‌ن، مەزن بکه‌ن.

كۆمیتا ناڤه‌ندییا په‌كه‌كێ پاشی دهێت و ده‌ست ژ ڤان ئارمانجێن مه‌زن به‌ردده‌ت‌ و دبێژیت: «ئه‌ڤ ساله‌ دێ سالا ب ده‌ست ئێخستنا ئازادییا فیزیكی یا رێبه‌ر ئاپۆی بیت»، یا راست ئارمانجا ئازادییا فیزیكی یا رێبه‌ر ئاپۆی ب وێ واتایێ دهێت كو ره‌وش هنده‌ خه‌ته‌ر نینه‌ وه‌ك‌ ئه‌نجوومه‌نا ئاساییشا ناڤده‌وله‌تی راگه‌هاندی!

ژ په‌كه‌كێ ڤه‌ كورد به‌رخكن

پارتییا كاركه‌رێن كوردستانێ، كێم مایه‌ سالا خوه‌ یا 42ێ ب دوماهی بینیت‌ و ده‌رباسی سالا 43ێ ببیت، ئه‌ڤه‌ 42 سالن‌ ئه‌ڤ رێكخستنه‌ ته‌كۆشینێ دكه‌ت‌، لێ چ ده‌ستكه‌فت بۆ گه‌لێ كورد ب ده‌ست نه‌ئێخستنه‌، یه‌ك مه‌ترا خاكا كوردستانێ رزگار نه‌كرییه‌، د هه‌موو سالڤه‌گه‌رێن خوه‌ دا‌ ده‌ردكه‌ڤیت‌ و دبێژیت‌: «ئه‌ڤساله‌ دێ سالا هه‌لوه‌شاندنا فاشیزمێ بیت، دێ سالا سه‌ربه‌ستكرنا گه‌ل و ده‌مۆكراتیزه‌كرنا تركیێ بیت»، لێ به‌لێ ل ڤان سالێن داویێ ئارمانجێن خوه‌ به‌رفره‌هتر لێ كرینه‌ و دبێژیت: «ئه‌م دێ براتییا گه‌لان پێك بینین، ئه‌م دێ رۆژهه‌لاتا ناڤین ده‌مۆكراتیزه‌ كه‌ین، هه‌تا دبێژیت: ئارمانجا مه‌ سه‌ربه‌ست كرنا مرۆڤایه‌تیێ یه‌»!.

پرسا ل ڤێرێ دهێته‌ كرن، ئه‌رێ كۆمیتا ناڤه‌ندییا په‌كه‌كێ دزانیت‌ ئه‌و چ دبێژیت‌؟ دزانیت كو رێكخستنا وێ نه‌شیایه‌ هه‌تا نها گوندێ رێبه‌رێ خوه‌ ژ ده‌ستێن تركان رزگار بكه‌ت؟ ئه‌رێ ئه‌و ب چ ئاوایی ب ڤێ روو قایمیێ ده‌ردكه‌ڤیت‌ دبێژیت ئه‌م دێ داگیركه‌ریێ ل هه‌ر چار پا‌رچه‌یێن كوردستانێ ب دوماهی ئینین؟ ئه‌رێ هوون دبێژن په‌كه‌كه‌ ب چاڤێ به‌رخكان ل گه‌ل دنێریت‌ و وها هزر دكه‌ت كو تشتێ ئه‌و دبێژیت‌ گه‌ل ژێ باوه‌ر دكه‌ت‌؟

یا راست گه‌لێ كورد ل هه‌ر چار پا‌رچه‌یێن كوردستانێ، نها باش په‌كه‌كه‌ ناس كرییه‌، باش دزانیت‌ كو ئه‌ڤ رێكخستنه‌ نها بوویه‌ به‌لا و سه‌رئێش ژ بۆ گه‌لێ كورد، باش دزانیت‌ كو په‌كه‌كه‌ وه‌كه‌ په‌نجه‌شێرێ لێ هاتییه‌ و كه‌تییه‌ جانێ كوردستانێ، گه‌لێ كورد باش فێم كرییه‌ كو ئه‌ڤه‌ ده‌ما 42 سالانه‌ په‌كه‌كه‌ هه‌مان د‌ره‌وان دكه‌ت‌ و هه‌مان سلۆگانێن خوه‌ یێن ئاشۆپی دوباره‌ دكه‌ت‌، ئه‌ڤه‌ 42 سالن په‌كه‌كه‌ ل كو ده‌رێ بیت ته‌نێ شه‌ر و مالوێرانی ل وێ ده‌رێ یه‌.

گەر هوون داخویانیێن ڤان پێنگاڤان کۆمبکه‌ن‌ و بینن به‌ر ھەڤ، ھوون دێ ببینن کو په‌كه‌كێ ژ سالا 2001 ھەتا 2020ێ ھەمان ھەڤۆک و پەیڤ ب کار ئیناینه‌، د دەستپێکێ دا په‌كه‌كه‌ بەحسا دیرۆکێ دکەت و دبێژیت‌: «ئازادییا ئۆجەلان ئازادییا مەیە، ھه‌لوەشاندنا پەرگالا تەجریدێ یا ئیمرالیێ دێ رێكێ ل بەر رۆناکبوونا رۆژھه‌لاتا ناڤین ڤەکەت و دێ ترکیێ دەمۆکراتیزە بكه‌ت».

ئەڤه‌‌ 20 سالن ئەڤ پێنگاڤه‌ خوە دوبارە دکه‌ن و ملیمەکێ ژی پێشکەفتن چێنەکرییە

ئەڤه‌‌ 20 سالن ئەڤ پێنگاڤه‌ خوە دوبارە دکه‌ن و ملیمەکێ ژی پێشکەفتن چێنەکرییە، په‌كه‌كه‌ داخویانییەکێ ددەت و رێكخستنێن وێ پشتگریێ دده‌نه‌‌ ڤێ پێنگاڤێ، ئەو جه‌ماوه‌رێ ل دۆرا په‌كه‌كێ كێمه‌ لێ گه‌له‌ك ئالا و گەلەک وێنەیێن ئۆجالان نیشان دده‌ن، ئانكو ب وێنە و ئالایان دخوازن وه‌ نیشان بده‌ن كو جه‌ماوه‌ره‌كێ مه‌زن هه‌یه‌، پشتی مەھەک یان دو مەھان، كه‌جه‌كه‌ دیسان ھەر کەسه‌كی گازی كاری دکەت و ب ڤی رەنگی ھەر بھار و پاییزێ ب موزیکێ، ستران و دیلانان وه‌سا هزر دكه‌ن کو ئەو ژ بۆ شۆرەشا کوردستانێ خزمەتێ دكه‌ن و وەزیفەیەکا پیرۆز پێک تینن، لێ بەلێ، کەسێ کو ل پاریس یان فرانکفۆرتێ دكه‌ته‌‌‌ هاوار و دبێژیت‌: «بژی براتییا گەلان، بژی سەرۆک ئاپۆ» ل سەر تێکۆشینا ئازادیێ یا کوردستانێ چ كاریگه‌رییا خوه‌ نینه‌، ھەتا ئەم دشێین ببێژین د ناڤا ڤێ، چەرخا خرش دا ب ئاوایەکی دزینا مۆرالا کوردان دهێته‌ ئارمانج کرن.

په‌كه‌كه‌ و ده‌ستكه‌فتێن سالا رابووری

كۆمیتا ناڤه‌ندی یا په‌كه‌كێ د داخویانییا خوه‌ دا باس ل ده‌ستكه‌فتێن خوه‌ یێن سالا 42ێ كرینه‌ و باس ل خو‌ینا شه‌هیدان كرییه‌ و دبێژیت مه‌ ده‌رسه‌ك نیشا داگیركه‌ران دایه‌، لێ یا راست مرۆڤ دشێت ده‌ستكه‌فتیێن راست یێن په‌كه‌كێ یێن سالا رابووری ب چه‌ند خاله‌كان باس بكه‌ت:

ده‌ست ژ ڤێ ئاوازێ به‌رده‌ن‌، ئێدی گه‌ل ب ڤان پێنگاڤێن بێ ئه‌ساس ناهێته‌ خاپاندن

تشتێ كو په‌كه‌كێ د داخۆیانییا خوه‌ یا ئیسالێ دا‌ زێده كری، جاره‌كا دی ئێریشی سه‌ر پارتییا ده‌موكرات یا كوردستانێ كرییه، ئه‌ڤ ژی نه‌ تشته‌كێ نوویه‌ په‌كه‌كێ كری، به‌لكو په‌كه‌كه‌ ئه‌ڤه‌ ده‌مه‌ك پر درێژه‌ كه‌تییه‌ د هه‌ولێن فرۆتنا شه‌ری ب حكوومه‌تا باشوور و دخوازیت‌ ڤێ پا‌رچه‌یا ئازاد وه‌كه‌ باكور و رۆژئاڤا راده‌ستی داگیركه‌ران بكه‌ت، ل داویێ ژی ئه‌م دێ بێژن، پێویسته‌ په‌كه‌كه‌ ده‌ست ژ ڤێ ئاوازا كه‌ڤن به‌رده‌ت‌، ئێدی گه‌ل ب ڤان پێنگاڤێن بێ ئه‌ساس ناهێته‌ خاپاندن.