مەمەت مێردینی

سەرۆکێ کەجەکێ مامێ مە جەمیل بایک ب هەلکەفتا 42یەمین سالڤەگەرا دامەزراندنا پەکەکێ ژ بۆ ئاژانسا ANF ێ ئاخفتیە و وەکو هەرجار ب لەزاتیەک هند زێدە ئاژۆت کو دبیت نها تەپ و تۆزا ئاژۆتنا وی گەهشتبیتە گراڤا ئیمرالیێ و دفنا عەڤدلا ئۆجەلانێ رێبەرێ پەکەکێ. مام جەمیل کو ب مام جومعا دهێتە ناسکرن د هەڤدیتنا خوە دا د گەل ئاژانسا ANFێ باسی دیرۆکێ دکەت و دبێژیت: ” تێکۆشین و نرخێن د ناڤا 500 سالان دا تێنە ئافراندن، پەکەکێ د ناڤا 50 سالان دا ئافراندن”.! کەسەکێ های ژ خوە نەبیت دێ ل گۆر ڤێ ئاخافتنا جەمیل بایک وەسا هزرکەت کو پەکەکێ پشتی 42 سالان هەر چار پارچەیێن کوردستانێ ئازاد کرینە و کرینە یەک پارچە و دەولەتەک تێدا ئاڤا کریە کو هەر کەس ببینیت دێ وسا هزرکەت ئەڤ دەولەتە 500 سالە هاتیە ئاڤاکرن! ئاخر هەر تشتێ ڤێ دەولەتێ هەیە، تۆپ و تەیارە، چەک و جەبلخانە، سیادە و سەروەری، حکوومەت و پەرلەمان هتد… بەلێ مامێ جەمیل ئەڤ جارە هندە لەز ئاژۆت کو دیرۆکا پەکەکێ ژ 42 سلان دەرباسی 50 سالان کر و گۆت کو د ڤان 50ی سالان دا ب پارادیگمایا  “میناکا” رێبەر ئاپۆ و پەکەکێ مە هندی 500 سالان دۆزا کوردان بەر ب پێش ڤە بریە!   گەلەک خوەش ئاژۆتیە نە ولۆ یە؟

نە مامۆ جان نە، خوینا کوردان نە هند یا بێ بوهایە، راوەستە.

ل سەر بەخت و ویژدانا مە نەبیت، ل سەر بەخت و ویژدانا فتنەچی و فەسادێن ئاژانسا ANF بیت، دبێژن مامێ وە جەمیل بایک گۆتیە: ” خەتا چالاکیێ، رێخستنێ، پۆلیتیک و ئیدەئۆلۆژیکا پەکەکێ ژ ھەر لایەکێ ڤە تەجرووبەیەکە گرنگ دەرخستیە هۆلێ،ھەما بێژن ھەر مالەکێ شەھیدەک دا، گازیەکی خوە ھەیە، گرتیەکی خوە ھەیە کو ھەری کێم 10 سالان گرتی مایە. ڤێ تێکۆشینێ خوە گەھاندە تەڤاھیا گەلێ کورد؛ گەلێ کورد ب تەمامی ئێخستە ناڤا ڤێ تێکۆشینێ. لەوما ئەڤ تێکۆشینە ب رەنگەکێ گشتی ڤەگوھەری تەکۆشینا گەل.”!! وەی شاباش مامۆۆ! مامێ جەمیل وەسا هزر دکەت کو کورد ژ بۆ ڤێ یەکێ تێکۆشینێ دکەن کو گرتی، گازی کری و شەهیدێن دەستێ دەولەتا ترکیێ هەبن! مامێ جەمیل قوربان تە شاش فێم کریە ولۆ نینە یاو، کورد و ئەو جوانێن نها د ناڤا ریزێن پەکەکێ دا و یێن جانێ خوە فەدا کری و یێن نها د زندانێن دەولەتێ دا ژ بۆ ئازادکرنا کوردستانێ ئەو بەدەل داینە، نە ژ بۆی پارادیگمایا قرێژی یا تۆ باس دکەی و ژ بۆ پارتیا خوە بازرگانیێ پێ دکەی، یاو مامێ جەمیل ئەڤە چ تەجرووبەیە تو باس دکەی؟! قای جوان، زارۆک، ولاتپارێز و نیشتیمانپەروەرێن کوردان مشکێن  تاقیگەهانە کو دختۆرێن وەکو تە بهێن و تەجرووبەیان ل سەر خوینا وان بکەن؟! نە مامۆ جان نە، خوینا کوردان نە هند یا بێ بوهایە، راوەستە.

هەموو باکورێ کوردستانێ تەسلیمی ترکیێ کر، حەفتەنین و مەتین و هتد… تەسلیمی دەولەتا ترکیێ کرن و هێژتا ژی باسی سەرکەفتنێ دکەت!

ئەندامێ کۆنسەیا کەجەکێ و مێرێ مێران مامێ مە جەمیل بایک، ب ڤی رەنگی بەردەوامی دا ئاخافتنا خوە: “ئەڤ سال سالا سەرکەفتنێ یە، سالا سەرکەفتنا پارادیگمایا پەکەکێ یە کو “رێبەر” ئاپۆ پێشەنگاتیا وێ دکە!”، ئەم چەند پیتر هزر دکەین و پێتر گوهداریا ئاخافتنێن مام جەمیل دکەین پێتر حەیری دمینین، ئاخر د ڤان 43 سالێن مامێ مە باسی وان دکەت هیچ سەرکەفتنەکا پەکەکێ تێدە ناهێتە دیتن، سەرکەفتنا مەدیایی نەبیت، پەکەکە ب تەنێ د مەدیایا خوە دا، وەکو نازییان سەرکەفتن ئانیە، پەکەکە نها دکاریت درەوەکا مەزن ب هندی چیایێ قەندیلێ وەکو راستیەک نیشانی لایەنگرێن خوە بدەت، دکاریت بنکەفتنێن خوە ژی بکەتە سەرکەفتن، هەموو باکورێ کوردستانێ تەسلیمی ترکیێ کر، حەفتەنین و مەتین و هتد… تەسلیمی دەولەتا ترکیێ کرن و هێژتا ژی باسی سەرکەفتنێ دکەت! نە هوسا ژی مامێ جەمیل نە، خوە مە پیش نەخواریە!

هەر بژی جەرگێ من جەمیل!

جەمیلێ مە د ئاخافتنا خوە دا هەر تشتەک ژی ب درەوڤە گۆتبیت ئەڤ تشتە راست گۆتیە دەما دبێژیت: ” دڤێت ھێزێن دەمۆکراسیێ یێن ل ترکیا و رۆژھەلاتا ناڤین ڤێ یەکێ ببینن؛ کلیلا چارەسەریێ یا پرسگرێکێن ل ترکیا و رۆژھلاتا ناڤین ھەموویان، د فکرا رێبەراتیێ دایە”، هەر بژی جەرگێ من جەمیل! ئاخافتنەکا راست ژ دەڤێ تە دەرکەت، ب راستی ژی تە راست گۆت، گەر ترکیا و رۆژهەلاتا ناڤین کو مەرەما تە یا سەرەکی ژ “رۆژهەلاتا ناڤین” ترکیا و ئیران و ئیراق و سووریا یە، ل گۆری هزرێن ئەڤدلا ئۆجالان تەڤ بگەرن هیچ پرسگرێکەکا وان نامینیت، ئاخر گەر ب وی رەنگی بیت هیچ پێویستیەکا وان ب لەشکەر و تۆپ و تانک و بالەفران نابیت داکو دیسان کوردان پێ جینۆساید بکەن، وان دەربەدەر و مالوێران بکەن، وان زیندانی و شەهید بکەن، هەما هەما بێژە کورد هەموو وەکو خۆلامان دێ د ناڤا وان دەولەتان دە کار کەن و هیچ پرسگرێکەکا وان نابیت، بەلێ مامێ جەمیل، بەلێ ترک باش ڤێ فام دکەن خەما ل سەر ڤێ چەندێ نەخوە! ئاخر ئەڤ هزرێن ئەڤدولایێ رێبەرێ تە ب راستی ژی ئەو هزرن کو کەمالیستێن ترکیێ و مەلایێن ئیرانێ  و…..دخوازن.

ژ کەرەما خوە و ئەڤدولا ئۆجەلان، ژ بۆ خاترا خوەدێ و تاووسێ مەلک بێژنە مە هوون بەحسا کیژان سەرکەفتنێ دکەن؟

بەلێ ئە، ھەڤسەرۆکێ کوردێن سەرەرد و بنەرد مامێ مە جەمیلێ دەلال د ئاخافتنا خوە دا تشتا هەری زێدە تەکەز دکەت، سەرکەفتا پارادیگمایا پەکەکێ و رێبەرێ وێ ئۆجالانە، ئەم ل ڤێرە دخوازین ڤان پرسیاران ژ مامێ خوە یێ دەلال جەمیلێ چاڤ کال بکەین: ” گەلۆ تۆ و پەکەکە باسی چ سەرکەفتن دکەن؟ پشتی٤٣ سالان ژ بۆ باکورێ کوردستانێ وە چ دەستکەفت هەبوویە ژ بلی وێرانکرنا 5 ھزار گوندان،  کۆچبەر بوونا 4 میلیۆن مرۆڤان ، ب گرتن دانا 200 ھەزار کوردان، ژیان ژ دەست دایینا 45 هەزار کەسان د ناڤا رێزێن پەکەکێ دا؟!! نە نە ب راست هوون باسی کیژان سەرکەفتنێ دکەن کو ئەم نزانین؟!! ب پارادیگمایا تو باس دکەی نێزیکی دو میلیۆن مرۆڤ کۆچبەری ئەورۆپا بوونە. جھێن کو دەولەتێ چ جاران نەکاری بوو بگریت نها گرتیە و مژوولی ئاڤاکرنا قەرەقۆلایە تێدا، دلێ بەرخوەدانا کوردایەتی جزیرێ ھاتە شەوتاندن و ئیدی  نکاریت کار بکەت. د ئەنجاما ئۆپەراسیۆنا کو د بن ناڤێ خەندەکان دا وە دەستپێکری 9 باژێر ھاتن وێران کرن. کوردی بوویە زمانەک کو تەنێ پیر و کال دزانن و پێ دئاخڤن. زارۆکێن مەیێن کو ناڤێن وان ئازاد، بێریتان، ئارین یێن هەی لێ یەک پەیڤ ب کوردی نزانن. ما ئەڤەیە سەرکەفتنا پەکەکێ؟ گەر د ماوێ 43 سالان دا هەوە بھۆستەک ئاخ رزگار نە کربیت، دوژمن ژ وەلاتی دەرخستن ئەم بدەینە ئالییەکێ، دوژمن بریە پارچێن دی یێن وەلاتی ژی؛ و زمانێ دایکێ ژی هەوە دایە بیرکرن، ڤێجا مامێ جەمیل، تۆ و پەکەکە بەحسا سەرکەفتنا چ دکەن؟!! های دێ ژ کەرەما خوە و ئەڤدولا ئۆجەلان، ژ بۆ خاترا خوەدێ و تاووسێ مەلک بێژنە مە هوون بەحسا کیژان سەرکەفتنێ دکەن؟

ب کورتاهی، ب شەش تەلاقان بیت، مام جەمیل و پەکەکە ژ سالێن 90ێ هەیا نها ڤان ئاخافتنان دوبارە و سەدبارە دکەن لێ بەلێ ژ بلی پێتر بندەست کرنا کوردان و مالوێرانکرنا وان ب دەستێ دەولەتێن داگرکەر هیچ سەرکەفتنەک وان نینە و ب ڤی ئاوا بەردەوام بن، سەرکەفتنا وان نابیت ژی!

لێ ئەم ژ مامێ جەمیل رە دبێژین: باژۆ مامێ جەمیل، باژۆۆۆۆۆۆۆ! تو گەلەک خوەش تاژۆی!