چاڤکانیەکێ ژ “ئەنجوومەنا لەشکەری یا باژارۆکێ عەین عیسا” ل سووریێ رۆژا دوشەمبێ (٧ێ کانوونێ) ئاشکەرا کر کو ھێزێن رووسی ب فەرمی داخاز ژ ھێزێن سووریا دەمۆقرات، کو وەکی “قەسەدە” دهێنە ناس کرن کریە کو باژارۆکێ عەین عیسا ل گوندەوارێ باکورێ رەقایێ رادەستی ھێزێن رێژیما سووری بکەن.
یەک ژ سەرۆکێن جڤاتا لەشکەری یا عەین عیسا، کو نەخواست ناڤێ وی بهێتە ئاشکەرا کرن، گۆت کو دو رۆژ بەرێ جڤینەک ل بنگەھەکێ رووسی ب بەشداریا ئەفسەرێن کورد، ئەفسەرێن رژیما سووری و کاربدەستێن ئارتێشا رووسیێ ل باژارۆکێ عەین عیسا ھاتە ل دار خستن. د وێ جڤینێ دا، ئەفسەرێن رووسی سەرۆکێن ھێزێن سووریا دیمۆکراتیک ئاگاھدار کرن کو گەفێن ترکیێ ل سەر ئێریشکرنا باژاری جددینە و داخاز ژ ھێزێن سووریا دیمۆکرات کر کو رێڤەبەریا ئیداری و لەشکەری یا ناڤچەیێ رادەستی ھێزێن رژیما سووری بکەن دا کو گەفێن ترکیێ ئاستەنگ بکەن.
ل گۆری چاڤکانیێ، لایەنێ رووسی هندەک پێشنیار پێشکێشی سەرۆکێن قەسەدێ کرینە، د ناڤ وان پێشنیارا دا ژ وان خواست کو ناڤەندەک ئەولەھیێ ل باژێرۆکێ ئاڤا بکەن و ئالایێ حوکوومەتا سووریێ ل سەر ھەمی ئاڤاھیێن ئیداری، نڤیسینگەھ و سازیێن ناڤ باژێری دا بلند بکەن، وەک کو ل باژێرێن قامشلوو و حەسەکێ ئەڤ کارە هاتیە کرن، دا کو ب ڤی رەنگی رێگریێ ل ئێرشا چاڤەرێکری یا ترکیێ بگرن.
رۆژنامەیا الشرق الاوسەت ب ڤەگوهاستن ژ ڤێ چاڤکانیێ راگەھاند کو بریارە سەرۆکێن ھێزێن سووریا دەمۆکرات دەربارا ڤێ پێشنیارا روسیا بفکرن، لێ چاڤکانیێ دەستنیشان کر کو دبیت ھێزێن قەسەدێ پێشنیارا رووسیێ رەد بکەن ژ بەر کو ترکیا و لایەنێن وێ یێن هەڤسۆز ژ روسیا خواستبوون کو شەرڤانێن قەسەدێ 32 کم ژ سنۆرێ ترکیێ دوور بکەن. لێ باژێرۆکێ عەین عیسا 37 کم ژ سنۆرێ ترکیێ دوورە.
باژێرۆکێ عەین عیسا ژ بلی جھێ خوە یێ ستراتەژیک، ژ بەر پرۆژەیا “رێڤەبەریا خوەسەر” یا کوردی ل رۆژھلاتێ سووریێ، خوەدیێ جیهەک سیاسی یێ تایبەتی یە ژی. گەر باژێر بکەڤیتە دەستێ ئارتێشا نەتەوەیی یا سووریێ کو ترکیا پشتگریێ لێ دکەت، ئەڤ دهێتە واتەیا دەربەیا داوی و بداویکرنا پرۆژەیا لامەرکەزی یا ئیداری ل رۆژھەلاتێ سووریێ.
باژێرۆکێ عەین عیسا شانەیا سەرەکی یا رێڤەبەریا خوەسەرا کوردا یە، ئەڤ باژێرە بەر ب ئۆتۆبانا کو پارێزگەھێن حەلەب، حەسەکێ و رەقایێ ل باکورێ رۆژھەلاتێ سووریێ پێکڤە گرێددەت، دنێریت.
گرینگیا ستراتەژیک و زیدەیا ڤێ ھەرێمێ ھەر دەم بوویە سەدەما ناکۆکیا دناڤبەرا رووس و ترکان.
ترکیا یەکینەیێن سووریا دیمۆکراتیک وەکی کۆمەک تیرۆریستی یا گرێدایێ پارتیا کارکەرێن کوردستانێ (پەکەکێ) دبینیت.
