محەمەد مێردینی

ھەڤپەیڤینا فەرماندارێ گشتی یێ هەسەدێ مەزلووم عەبدی، کو ل رۆناھی تیڤی ھاتە پەخشکرن، د 3یێ کانوونێ دا ژی د ھاوار نیۆز دا ھاتە بەلاڤکرن. لێ بەلێ، د ناڤبەرا بەلاڤکرنا ترکی و کوردی  دا د ھەڤپەیڤینێ دا گەلەک گوھەرتن ھاتبوونە ئەنجامدان. ھەر وەھا، ئۆرژینالا ھەڤپەیڤینا مەزلووم عەبدی د رۆناھی تڤ دا ژ ڤێرژنا ترکی گەلەک جوداتر بوو. هاوار نیۆز ڤێرژنا ترکی ب تەڤلیکرنا نێرینێن خوە ڤە، گەلەک گورانکاری د ناڤەرۆکا ھەڤپەیڤینا مەزلووم عەبدی دا چێکر بوون. دەستپێکا ھەڤپەیڤینا کوردی دیالۆگا ئەنەکەسێ و پەیەندێ بوو. لێ د پێشگۆتنا ھەڤپەیڤینا ترکی دا، ھەڤۆکێن وەھا ھاتنە نڤیساندن کو ھوون نزانن گەلۆ ئەڤە فکرێن نووچەگەھانی نە یان ژی یێن مەزلووم عەبدی نە.

چاپەمەنیا رۆژئاڤا ژ ناڤێن کو راستەراست ژ لایێ مستەفا کاراسو ڤە ھاتینە دەستنیشان کرن پێک دهێت

د ھەڤپەیڤینا ترکی دا دگۆت “دۆرپێچکرنا گارە ژ لایێ ھێزێن تایبەت یێن پەدەکێ ڤە چێبوویە ئەڤە ژی د جڤاتا کوردستانێ دا بوویە سەدەما کارڤەدانێ” ب راستی پەیڤەکا ب ڤی رەنگی مە قەد نەدیتییە کو مەزلووم عەبدی ب کار ئینابیت. لێ بەلێ، نووچەگەھانێ ھاوار نیۆزێ یێ ترکی خواست کو مەزلووم عەبدی ب وی رەنگی بدەتە نیشاندان کو ئەو ل دژی پەدەکێ یە، ژ بۆ ڤێژی رۆژنامەڤانێ ھەوار نیۆزێ گەلەک کەدەک مەزن (!) نشان دا.

چاپەمەنیا رۆژئاڤا دکاریت ل سەر مەزلووم عەبدی تشتەکێ وەھا بکەت؟ ئەرێ دکاریت بکەت. ژ بەر کو چاپەمەنیا رۆژئاڤا ژ ناڤێن کو راستەراست ژ لایێ مستەفا کاراسو ڤە ھاتینە دەستنیشان کرن پێک دهێت. ب تایبەتی مالپەرا ترکی رۆژانە د بن کۆنترۆلا مستەفا  کاراسو دایە. د راستی دا، پەکەکە چاپەمەنیا رۆژئاڤا مینا چەکی د دەستێ خوە دا دگریت. بەرێ لوولییا چەکێ هندەک جاران د دەتە سەر رێڤەبەرێن رۆژئاڤا یێن وەکو شاھین عەبدی. ژ بەر ڤێ یەکێ د ڤێ ھەڤپەیڤینێ دا ژی پەکەکێ ئەڤ تەکتیکە بکار ئانییە ئانکو بەرێ چەکێ خوە دایە مەزلووم عەبدی.

مەزلووم عەبدی چ گۆت؟

گەلۆ ئارمانجا ڤێ ھەڤپەیڤینێ چیە، ئەڤە پرسیارەکا گرنگە. د ھەڤپەیڤینێ دا، پرسیارێن بەردەوام ل سەر ھەبوونا باشوورێ کوردستانێ، شەنگال و ھەبوونا پەکەکێ ل رۆژئاڤا هاتنە پرسین. ووسا خوەیا دکەت کو پەکەکە دخوازیت ھندەک دیتنێن مەزلووم عەبدی کو وی د دەما رابوری دا کر بوون، ب وی بدتە راستڤەکرن.

ھەتا ئەم دزانین کو مەزلووم عەبدی د بن دۆرپێچەکا مەزن دایە. ل ئالیەکێ، پەکەکە ھەول ددەت کو ب ناڤبەینکارییا مەزلووم عەبدی ھەڤسەنگیەکێ د ناڤبەرا ئەمەریکا و رۆژئاڤا دا ئاڤا بکەت. ل ئالیێ دی، ئەو دترسیت کو مەزلووم عەبدی ژ سیستەما ئەمر-تەعلیماتێن پەکەکێ دەرکەڤیت و دخوازیت تیما دەورووبەرێن وی بەلاڤ بکەت. ژخوە، د ھەڤپەیڤینێ دا، ب ئیسرار ژ مەزلووم عەبدی ھاتە خواستن کو داخویانیەکێ بدەت و تێدا پەسنا پەکەکێ بکەت و گرینگیا وێ ژ بۆ رۆژئاڤا ئاشکەرا بکەت.

پەکەکێ بریار دایە ھەمی کادرۆیێن خوە ل رۆژئاڤا پەروەردە بکەت

بێ گومان، مەزلووم عەبدی کەسەک ژ بنەمایێ پەکەکێ یە. وی شەربەتا فکر و رامانێن پەکەکێ ڤەخوارییە. لێ تشتێ کو ئەم دزانین ئەڤەیە کو د ڤان سالێن داوی دا، مەزلووم عەبدی ھەول دا کو ژ بن سینۆرێن پەکەکێ دەربکەڤیت، خەتەکا سەربخوە و ریالیست، بشۆپینیت. کا ئەو دێ چەند سەرکەڤیت دەم دێ دیار کەت. لێ داتایێن بەردەست نیشان ددەن کو پەکەکە ل دژی مەزلووم عەبدی و کادرێن رۆژئاڤا یێن مینا وی ئێریشەکا ئایدۆلۆژیک دایە دەست پێ کرن.

ھندەک زانیاری ھەنە کو پەکەکێ بریار دایە ھەمی کادرۆیێن خوە ل رۆژئاڤا پەروەردە بکەت و بریار دایە زڤستانێ کۆنفەرانسێن کادر چێکرنێ سازبکەت. د فەرھەنگا پەکەکێ دا، کۆنفەرانسا کادران دهێتە واتەیا سەرراستکرنا کادران و ئەو کەس ل گۆری پیڤانێن ئایدۆلۆژیک بهێنە هەلسەنگاندن. د ھەمان دەمێ دا زانیاری ل بەر دەستێ مە دا ھەنە کو پەکەکە، دێ وان کەسێن ھەرێما رۆژئاڤا دپەژرینن بەتە قەندیل و وێ دەرێ دێ بالانسەکا رێخستنێ ل گۆری خوە دەنێ. ئانکو د وارێ فکری و سەکناندنێ دا دێ خوەسەرییا رۆژئاڤا ژ ھۆلێ راکەن.

کی ل سەر ماڤێ پەکەکێ چاڤدێرییا مەزلووم عەبدی دکەت؟

پەکەکێ ژ بۆ ڤی کاری راستەراست تیمەکا رێڤەبەرێن خوە ئەرکدار کرییە. ب سایا ڤێ تیمێ، دێ ژ کارمەندێن ئاستا رێڤەبەریێ و خەباتکارێن گرنگ یێن ل رۆژئاڤا هێتە خواستن کو ھەلوەستێن خوە دییار بکەن. دهێتە پێشبینیکرن کو کەسێن وەکی سۆزدار ئاڤێستا ب رەنگەک چالاک دێ بەشداری ڤێ پێڤاژۆیێ بن و د ڤێ پێڤاژۆیێ دا دێ “کادرێن رۆژئاڤا زڤرینن سەر خەتا پەکەکێ یا بەرێ”.

باھۆز ئەردال یەک ژ وان کەسایە کو ھاتنە ئەرکدارکرن. باھۆز ئەردال ب خوە ژ خەلکێ رۆژئاڤایە و ب راستی دژبەرێ مەزلووم عەبدی یە. حەتا شەرێ رۆژئاڤا، د ناڤا پەکەکێ دا ناڤێ ھەری مەحبووب باھۆز ئەردال بوو، ب تایبەتی ب خێرا چاپەمەنییا ترکییێ. لێ د شەرێ رۆژئاڤا دا تێرا خوە دەرنەکەت پێش. وی ئەڤ رەوشە نە داعیورایە. باھۆز ئەردال ئەڤە دەما چەند ھەیڤانە ل رۆژئاڤا دمینیت. ئەو ھەم ل سەر ناڤێ پەکەکێ چاڤدێریا مەزلووم عەبدی دکەت و ھەم ژی دخوازیت کو ژ مەزلووم ئەرکا بدزیت.

پەکەکە ژ بەر ئەمریکا نەشییابوو ب سالان بەردەڤکێ یەپەگێ پۆلات جان ژی ببەتە وەزیفەیێن دی

ھندەک زانیاری ژی ب زانابوون دهێنە بەلاڤکرن مینا، کو دێ مەزلووم عەبدی ژ فەرماندارییا ھەسەدێ هێتە دەرکرن و ئەو دێ چیتە د کارێ دیپلۆماسیێ دا. لێ ئەم ھەمی دزانین کو ئەمریکا ڤێ یەکێ قەبوول ناکەت. د ھەمان دەمدا د چاپامەنیێ دا ھاتە راگەھاندن کو پەکەکە ژ بەر ئەمریکا نەشییابوو ب سالان بەردەڤکێ یەپەگێ پۆلات جان ژی ببەتە وەزیفەیێن دی. مەزلووم عەبدی ناهێتە گوھەرتن. پەکەکە ئەنجامێن گوھارتنا وی دزانیت لەوما ژی نەشێت ئیسرارێ بکەت. ژ بەر ڤی سەدەمی، نە مومکنە کو مرۆڤ مەزلووم عەبدی ژ قادێ دەربێخیت. لێ دێ ئاستا کادر و تێکلیێن وی یێن گشتی هێتە بەرتەنگ کرن و دۆرپێچەکا ڤەشارتی ل دەردۆرا وی دێ هێتە ئاڤا کرن. ب ڤی رەنگی، ئەو نەشێت خەتا خوە ب رێخستن بکەت.

دێ دەم دیار کەت کا مەزلووم عەبدی دێ د خەتا خوە دا ب بریار تەڤگەریت یان ژی نە. ئەم ژی دێ بینین کا ئەو دێ ژ داخویانیێن خوە گاڤێ پاشدا هاڤێژیت.

ب گشتی دهێتە باوەر کرن کو پەکەکە دخوازیت د بن ناڤێ خەباتێن جوودا دا ھەمی کادرێن رۆژئاڤا یێن کەڤن و پسپۆر ژ رۆژئاڤا دەربێخیت. ب ڤی رەنگی دهێتە چاڤەرێکرن کو هندەک کەسێن نوو و بێ تەجرووبە یێن لاواز د ناڤا پەکەکێ دا ببنە دەستھەلاتدار. یەک ژ ڤان ناڤان ئاسیا عەبولا یە، ناڤێ کۆد دیلان دێرکی، ھەڤسەرۆکا بەرێ یا پەیەدێ بوو. بەریا نھا ل قەسرا ئەلیسە ل گەل سەرۆک کۆمارێ فەرەنسایێ ھۆڵاند ھەڤدیتنەک ئەنجام دابوو، ئاسیا عەبدولا ژ لایێ پەکەکێ ڤە ژ رۆژئاڤا ھاتیە دەرخستن. ئاسیا عەبدولا نھا ژ پێڤاژۆیێ ھاتیە دوورخستن کو ژ بۆ چالاکیێن یەکیتیا نەتەوەیی د ناڤبەرا کوردان دا د ناڤ رێخستنا پەکەکێ یا ب ناڤێ کەنەکێ دا بهێتە ئەرکدارکرن.

پەکەکێ ل دژی رۆژئاڤا دەست ب هەوەکا کادر نوو کرنێ کرییە

تێ دیارکرن کو فاوزا یوسف، ب کۆدناڤێ زاخۆ زاگرۆس، یەکا دی ژ وان کادرا یە کو پەکەکە خوە ئامادە دکەت ژ رۆژئاڤا ڤەکێشیت. دهێتە دیارکرن کو ژ فاوزا یوسف دهێتە خواستن داخویانیێن خوەیێن لیبرال د مەدیایێ دا سەر راست بکە.ت

ب کورتاھی، پەکەکێ ل دژی رۆژئاڤا دەست ب هەوەکا کادر نوو کرنێ کرییە. دخوازیت بالانسەکا ئایدۆلۆژیک بدەتە کادرێن رۆژئاڤایی. بەری ھەر تشتی، دێ ڤێ هەوێ ل دژی کارمەندێن خوە ئەنجام دەت. گاڤا کو تەڤگەرێن مینا پەکەکێ ژ دەرڤە کەفتنە دارێ زۆرێ، یەکەم کارێ کو دێ ئەنجام دەن ئەوە کو کادرێن خوە  گڤێشیت. ب ڤی رەنگی، پەکەکە دخوازیت کادرێن رۆژئاڤا یێن بەحسا یەکیتیا کوردان و دەرخستنا کادرێن بییانی ئانکو یێن باکووری دکەن ھەموویان تەسفیە بکەن. ئەڤ کریارە ھەم ژ بۆ رۆژئاڤا ھەم ژی ژ بۆ کوردان خرابیەکا مەزنە. خرابیەکە کو دشێت ھەموو کوردان ژناڤ ببەت.