پشتی کو د دەما رۆژێن رابووری دا ل هندەک باژێر و باژێرۆکێن باشوورێ کوردستانێ هەر یێک ژ پەکەکێ و یەنەکێ ب پیلانەکا بەرنامەکری دەست ب خوەپیشاندنا کری و چەندین دام و دەزگەهـ حکومی و بارەگەهێن حزبی و مومتەلەکاتێن حکوومی شەوتاندی، دەما کو خوەپێشاندان گەهشتی ئاستێ هەری خەتەر کو یەنەکێ ب خوە ژی فام کر گەر ئەڤ خواستەکا کو ب هەڤبەشی د گەل پەکەکێ پلان کری بەردەام بیت رەوش ل بن کۆنترۆلا وان دا نامینیت و دێ یەنەکە ب خوە زەرەرمەندا یەکەمین بیت ژ ڤان ئالۆزی و نەئارامیێن دهێنە برێڤەبرن، د ڤێ چارچوڤێ دا یەکەم جار قەدەغەیا هاتن و چوونێ د ناڤبەرا باژێرێ سلێمانیێ و باژێرۆکێن دی یێن سەر ب وێ ڤە هاتە راگەهاندن، ئەڤ کارە ژ بۆ رێگریکرن ژ وێ گرووپا سەر ب پەکەکێ بوو کو ب ئاوایەک سیستەماتیک ل باژێرەکێ بەر ب باژێرەکێ دی دچوون و ئاگر ل سازیێن حزبی و حکوومی بەرددا، و پاشان یەنەکێ دەست ب گرتن و لێدانا کەسێن کو خوە وەکو خوەپێشاندەر ددا دیار کرن کر، د ڤێ ناڤبەرێ دا هەژمارەکا هەری زێدە یا خوەپێشاندەران کو پرانییا وان ئەندام و لایەنگرێن پەکەکێ بوون هاتنە گرتن.
ژ بەرکو ناڤبەرا پەکەکێ و یەنەکێ خوەشە و یەک سیاسەت دمەشینن و بریارێ ژ یەک ناڤەند وەردگرن، یەکەم جار یەنەکێ هەست ب خەتەرەیا پەکەکێ نەکر و هەرتشت ل گۆر خواستەکا پەکەکێ ب رێڤە بر، لێ ل داویێ بۆ یەنەکێ ئاشکەرا بوو کە ئەڤ پیلانە نە ب تەنێ ل دژی حکوومەتا هەرێما کوردستانێ، بەلکو د رێزا یەکەم دا ل دژی یەنەکێ ب خوە یە، لەوما دەست ب گرتن و لێدانا خوەپیشاندەران کر و نێزی 800 کەسان زندانی کرن.
دەما کو پەکەکێ دیتی ئەندام و لایەنگرێن وێ ژ لایێ یەنەکێ ڤە هاتنە دەستەسەرکرن، ژبەرکو ناڤەبەرا وان خوەشە نەخواست هیچ داخویانەیەکا ئاشکەرا بدەت، ژ بەر ڤێ یەکێ پەکەکێ د مەدیایا خوە یا سیبەر دا گەف ل یەنەکێ کرن و دیار کر، “گەر یەنەکە د دەما 24 دەمژمێرێن دی دا کەسێن هاتیە گرتن (لایەنگرێن پەکەکێ) ئازاد نەکەت، پەکەکە دێ هەتکبەریەکا یەنەکێ کو ل 14ێ مژدارا 2020ێ دا قەومیە ل کۆمیسیۆنا ئەورۆپایێ بەلاڤکەت”.
پەکەکێ ئەڤ گەفا خوە ب رێیا سۆسیال مەدیایێ د رووپەلا ب ناڤێ “TEVDA PRESS” کو یەک ژ رووپەلێن سیبەر یێن سەر ب چاپەمەنییا پەکەکێ یە گەهاندە یەنەکێ، یەکەم جار ب ئاوایەکێ ئاشکەرا پەکەکێ د ڤێ رووپەلێ دا گەف ل یەنەکێ کرن، لێ بەلێ پشتی بۆرینا 20 خۆلەکان کو حەتا نها ناهێتە زانین د وی دەمی دا چ قەومی، 3 جاران تەڤدا پرێسێ نڤیسینا خوە گوهارت و ل سەر ناڤێ چالاکڤانەکێ خوە یێ ل ئەورۆپایێ بەلاڤکر، ئەڤە ژی دیار دکەت کو مەسجەک ب وان گەهشتیە، کیژان ئالی یان کیژان کەس ئەڤ مەسجە ب وان گەهاند چ پەیام تێدە بوویە حەتا نها ناهێتە زانین.
ب ڤێ یەکێ یەنەکە دێ کەڤیتە د ناڤا دو هلبژارتنا دا، یان دێ حەتا سبە لایەنگرێن پەکەکێ ئازاد کەت و ستویێ خوە ل هەمبەر پەکەکێ چەمینیت، یان ژی دێ پەکەکە هەتکبەرییا یەنەکێ د سۆسیال مەدیایێ دا بەلاڤکەت. د هەردو حالەتان دا دێ یەنەکە “باڤل و لاهۆر” زەرەرمەند بن، ژبەرکو گەر کەسێن گرتی بهێنە ئازاد کرن دێ دیار بیت یەنەکێ کارەک گەلەک قرێژی کریە کو ئەو ب ڤی رادە دترسیت، گەر ژی ئازاد نەکەن دیسان دێ ئەو کارێ وان هێتە ئاشکەرا کرن.
تەڤدا پرێس یێک ژ رووپەلێن سۆسیال مەدیایێ یێن سەر ب پەکەکێ یە کو وەکو سازیێن دی یێن چاپەمەنیێ یێن سەر ب پەکەکێ ڤە، رۆژانە مژوولی دژایەتیکرنا حکوومەتا باشوورێ کوردستانێ، خائینکرنا مرۆڤێن نشتیمانپەروەر و کەسێن ناسیۆنالیست و سەرڤیسکرنا دەرەوانە، بەرەڤاژی ڤێ یەکێ ژی هەردەم هەول ددەت کەس و لایەنێن خائین، خوەفرۆش و دژە کورد وەکو کەس و ئالیێن باش بدەتە نیشاندان، د دەما رۆژێن رابووری دا ژی ئەڤ رووپەلە یەک ژ وان رووپەلا بوو کو هەرتم گەنجێن باشوور هان ددان کو خوەپێشاندنان بکەن و بارەگەهێن حزبی و حکوومی بشەوتینن، تەڤدا پرێس هندەک جاران ب ئاوایەکی گەرم دبوو کو راستەراست جەمیل باییک دهاتە بەر چاڤێن مرۆڤی، ب رەنگەکێ کو هەر کەسێ وسا هزر دکر کو جەمیل باییک ب خوە ڤێ رووپەلێ ب رێڤە دبەت.
