داخویانیا کەجەکێ یا ڤەشارتی-2

داخویانیا کەجەکێ یا ڤەشارتی-2
  • بەشا دویەمین

د بەشا یەکێ یا نڤیسینا خوە دا مە باس ل ڤێ یەکێ کر کا چاوا کەجەکێ داخویانیەک ڤەشارتی وەکو بەرسڤەک ژ بۆ جڤینا چاپەمەنی یا سەرۆک وەزیرێن هەرێما کوردستانێ بەلاڤکر، مە دیار کر کو پەکەکێ ژ بۆ ڤەشارتنا خیانەتا خوە یا ل شنگالێ و نەکارینا وێ ل سەر بەرسڤدانا هندەک پرسێن سەرەکی کو نها د رۆژەڤا هەرێما کوردستانێ دا دهێنە ژیانکرن ب ڤی ئاوا ئەڤ داخویانیە دا. پەکەکێ ژبەرکو نەخواست بەرسڤەکا زەلال بدەتە کوردان، ژ بەرکو دزانیت ئێدی کورد دەرەوێن وێ باوەر ناکن و راستیا پەکەکێ فێم کریە، ئەڤ داخویانی ب ئاوایەک ڤەشارتی دا.

پەکەکە نەشێت حەتا داویێ ب دەرەوان کارێن خوە یێن قرێژ بڤەشێریت

پەکەکە وسا هزر دکەت کو کورد وەکو هەڤرێیێن شکەفتێ (اسحاب الکهف)ێ نە کو ئەڤە چەند سەد سالن د خوە دا و ژ نوو ڤە ژ خەو رابوونە و هیچ تشتەک ب چاڤێن خوە نەدیتیە، نە دیتیە کو پەکەکێ گولەیا خوە یا یەکەمین ل دژی کوردان تەقاندیە، نە دیتیە پەکەکێ یەکەم جار دەست ب تەسفییەکرنا کەسێن ولاتپارێز کر، نە دیتیە ب چ رەنگ رێبەرێ وان خوە تەسلیمی دەولەتێ کر و داکو خوە بپارێزیت هێڤی ژ جەندرمەیێن ترکیێ کرن و داخوازا لێبوورینێ ژ داییکێن جەندرمەیێن کوشتی کر، نەدیتیە هتد… پەکەکە ب ئاوایەکی کوردان وەکو هەڤرێیێن شکەفتێ دبینیت کو حەتا نها نزانیت کوردان هەر تشت ب چاڤێن خوە دیتینە و دزانن. کورد باش د پەکەکێ گەهشتینە و پەکەکە نەشێت حەتا داویێ ب دەرەوان کارێن خوە یێن قرێژ بڤەشێریت.

ب مانشێتا ” مەسروور بارزانی ب ھەلوەستێن خوە داگرکەریا ترک رەوا دکەت” دخوازیت وسا بدەتە نیشاندان کو ئەڤە مەسروور بارزانیە لەشکەرێ ترکیێ ل دووڤ خوە ب کوراهییا 50 کیلۆمەتران کێشایە ناڤا خاکا باشوورێ کوردستانێ دا، دخوازیت شکەستنێن خوە یێن حەفتەنین، خواکورک و جیهن دی ب ڤێ یەکێ بڤەشێریت، هەر کەس دزانیت ئەڤە هەلوەستێن مەسروور بارزانی نینە کو رەواتیێ ب داگرکاریا ترکیێ ددەن بەلکو ئەڤە هەلوەست و کار و سیاسەتێن قرێژ یێن پەکەکێ نە کو نە ب تەنێ ل باشوورێ کوردستانێ بەلکو ل رۆژئاڤایێ کوردستانێ ژی بوونە سەدەم کو دەولەتا ترکیێ عەفرینێ و گرێ سپی ب بەهانەیا کار و کریارێن پەکەکێ داگیر بکەت، ژ خوە مەسروور بارزانی ل عەفرینێ و گرێ سپی نەبوویە و چ داخویانی ل سەر ڤان دو باژێران نادابوو دەما پەکەکێ ئەڤ باژێرە رادەستی ترکیێ کری.

مرۆڤ نزانیت پەکەکە باس ل کیژان بەرخوەدانا قەهرەمانانە دکەت؟!

کەجەکە هەر وسا د بەشەکێ دی یا داخویانیا خوە یا ڤەشارتی دا دبێژیت ” خوەسەریا شەنگالێ نە دژی خوەسەریا کوردستانێ و یاسایێن ئراقێ یە. بەرەڤاژی، وان خورت دکەت”، ژ بلی کو ئەڤ ئاخافتنا کەجەکێ ئدانپیدانەکا ئاشکەرایە ب ڤێ یەکێ کو ئەو ژی وەکە دەولەتێن داگیرکەر شەنگالێ ب بەشەک ژ هەرێما کوردستانێ نزانن و دخوازن سەر ب دەولەتا داگیرکەرا ئیراقێ بیت، هەڤ دەم دخوازیت ل سەر ناڤێ 5٪ یا روونشتڤانێن شنگالێ هەموو سیسەتێن خوە یێن قرێژ کو دکەڤنە چارچووڤەیا “میحوەرا مقاوەمێ” یا ئیرانێ دا ل شنگالێ جێبەجێ بکەت، و پارێزڤانیێ ل بەرژەوەندیێن ئیرانێ ل ناڤچەیێ بکەت. دڤێت ل شوونا ئاخافتنێن مەزن و نە ل گۆر سەنگا خوە، پەکەکە دەست ژ خیانەتا شنگالێ و هەڤالبەندییا حەشدا شەعبی بەردەت و ل شنگالێ دەرکەڤیت، داکو شەنگالێ ژی ب دەردێ عەفرینێ نەبەت و نەبیتە پرەک ژ بۆ دەرباسبوونا ترکیێ ژ بۆ شنگالێ، هەر وەک ل عەفرینێ، سەرێ کانیێ، حەفتەنینێ و خواکورکێ بوویە پرا دەرباسبوونا ڤێ دەولەتا داگیرکەر.

د بەشەک دی یا داخویانیا خوە دا هەر وەکو کوردان هەموویان ب خەشیم و ئاگەهـ ژ خوە نە بدەتە نیشاندان، کەجەکە دبێژیت ” مەسروور بارزانی د داخویانیا چاپەمەنیێ دا بەرخوەدانا ب قەهرەمانی یا پەکەکێ کو ل کوردستانێ ل دژی داگیرکەریا ترک ددەتە مەشاندن ژی بەرەڤاژی کریە و ئەڤ بەرخوەدانە رەش کریە”، مرۆڤ نزانیت پەکەکە باس ل کیژان بەرخوەدانا قەهرەمانانە دکەت؟! گەلۆ ل کیژان دەڤەرێ پەکەکە شییایە بەرخوەدانێ بکەت و وێ دەرێ ب دەست دەولەتێ ڤە بەرنەدەت؟! ل حەفتەنینێ؟! ل خواکورکێ؟! ل چیایێ مەتین؟! یان ژی ل عەفرین و گرێ سپی ل رۆژئاڤا کوردستانێ؟!! ب راستی ژی روویەک پڕ قاییم پێ دڤێت حەتا کو مرۆڤ ب ڤی رادە بێ ئەخلاق بیت و خەلکی ب ڤی ئاوا ب خەشیم و نەزان ببینیت کو راستیێن د رۆژەڤێ دا نەبینیت.

دەولەتا ترکیێ ژ بەر ئاخافتنێن بەرێز سەرۆکێ حکوومەتا باشوورێ کوردستانێ ئێریشی باشوور ناکەت، هەر کەس دزانیت سەبەبا ئێریشا دەولەتێ و داگیرکرنا باشوور کی یە، هەر کەس دزانیت کیژان لایەن ب کار و ئاخافتنێن خوە ڤە بوویە پرەک و بەهانەیەک ژ بۆ داگیرکرنا باشوور ژ لایێ ترکیێ ڤە.

کەجەکێ خواستیە د ڤێ داخویانیا خوە دا کارێن چەپەل یێن پەکەکێ ژ بۆ ئالۆزکرن و دروستکرنا نەئارامیێ ل باشوورێ کوردستانێ کو د بن ناڤێ خوەپێشاندانا دەمۆکراتیک دا ددەتە کرن بڤەشیریت، گەر پەکەکە راست دبێژیت بلا ژ بۆ گەلێ کورد دیار بکەت نها ئالیگرێن وێ ل باشوورێ کوردستانێ ل کو دەرێنە و رۆلا وان د روودانێن شەوتاندنا بارەگەهێن حزبی و حکوومی، گولەبەردانا هێزێن ئەمنی، شەهیدخستنا پێشمەرگەیەکێ و ب کوشتن دانا چەندین زارۆیان ئاشکەرا بکەت. گەر کەسێن ب کارێن تێکدەرانە وەکو شەوتاندن و زییان گەهاندن ب سازیێن حکومی سەر ب پەکەکێ نەبن چما کەجەکێ د داخویانیا خوە دا ئەڤ کارە شەرمەزار نەکریە و ب تەنێ گۆت کو ئەو کار نایێن قەبوولکرن! گەلۆ گەر پەکەکە ڤان کارا قەبوول ناکەت بۆچی شەرمەزار ناکەت؟!! بۆچی داخویانیەکا زەلال نادەت و نابێژیتە لایەنگرێن خوە ئەڤە کارەکێ قرێژ و دوور ژ کولتورا کوردایە؟! بۆچی توندیا هێزێن ئەولەهیێ ب ئاوایەک زەلال د داخویانیا خوە دا شەرمەزار دکەت، لێ بەلێ توندییا ب ناڤ خوەپێشاندەرا ب تەنێ قەبوول ناکەت!!؟ ب راستی ژی کەجەکە دڤێت یەکەم جار بەرسڤا ڤان پرسیاران بدەت.

پەکەکە دخوازیت “دز، حیز و بەحەشتی بیت”

تشتا هەری بالکێش د داخویانیا کەجەکێ دە باسکرن ل رێیێن دەمۆکراتیکە ژ بۆی چارەسەرکرنا پرسگرێکان! گەلۆ ما قای کەجەکە ب راستی ژی دزانیت دیمۆکرات بوون چییە؟! قای ب راستی ژی کەجەکێ باوەری ب دەمۆکراتیەتیێ هەیە؟! باس ل کیژان دەمۆکراتیەتێ دکەت، ئەو دەمۆکراتیەتا وێ یا کو تێدا یەک ژ ئەندامێن سەرکرداتیا پارتیەک کوردی ل رۆژئاڤا کوردستانێ ب جلێن خەوێ ڤە خستیە د ناڤا خەندەقەکا سەر سنۆری دا، یان ژی ئەو دەمۆکراسیەتا کو ناهێلیت نە کەسەک، نە ژی ئالیەک ب پەیڤەکێ ژی رەخنەیان ل وێ و شێوازێ رێڤەبرنا وێ یا رۆژئاڤا بگریت؟! باس ل وێ دەمۆکراسیێ دکەت یا کو ناهێلیت ئالا کوردستانێ ل رۆژئاڤا بهێتە بلندکرن و ناهێلیت د دەستێ چ کەسەکێ دا بیت، یانژی باس ل وێ دەمۆکراسیەتێ دکەت یاکو ب تەنێ سلۆگانا “بژی، بژی” تێدا دهێتە گۆتن؟! یەکەم جار دڤێت کەجەکە بزانیت دەمۆکراتیک بوون چییە پاشان بهێت و نسیحەتان ل خەلکی بکەت. ژ بۆ پارتیەک ئایدۆلۆژیک مینا پەکەکێ، باسکرن ل جڤاکەک دەمۆکراتیک و رێیێن ئاشتییانە وەکو وێ یەکێ یە کو کەسەک دز. حیز و مرۆڤ کوژ باس ل ئەخلاق و مرۆڤاتیێ بکەت.

ب کورتاسی پەکەکە نە پارتیەکا کوردستانیە و نە دزانیت کوردایەتی چیە، نە دزانیت رێیێن ئاشتییانە چنە و نە ژی دزانیت دۆمۆکراتیک بوون چەوایە، پەکەکە دخوازیت “دز، حیز و بەحەشتی بیت”، ئەڤ یەک ژی نە ل جەم خوەدێ و نە ژی ل جەم مرۆڤان ناهێتە قەبوولکرن، پێدڤیە پەکەکە و سازییێن سەر ب وێ ڤە و ئالیگرێن وێ ڤێ یەکێ باش بزانن.

پوستێن ھەمان بەش