پشتی پیلانا پەکەکێ یا کو ب هەڤبەشی د گەل هەر یەک ژ ئێکەتیێ و نەوەی نوێ و هندەک لایەنێن دی یێن باشوورێ کوردستانێ ژ بۆ تێکدانا باشوورێ کوردستانێ سەرکەفتن نەئانی، پشتی کو ل ژێر ناڤێ خوەپێشاندانا ڤان لایەنان دخواست رەوشا هەرێما باشوورێ کوردستانێ تێک بدن و ستاتۆیا هەرێما کوردستانێ ژ ناڤ ببەن لێ بەلێ سەرکەفتن نەئانی و ژ بۆ یەنەکێ و لاهۆر جەنگی ژی دیار بووی پەکەکێ فێل ل وی کریە و ئەو خاپاندیە لاهۆر جەنگی فەرمانا تەپەسەرکرنا خوەپیشاندەران دا و هەژمارەک زێدە یا لایەنگرێن پەکەکێ دەستەسەرکرن، پەکەکێ دەست ب دژبەریا هەڤسەرۆکێ یەنەکێ کو ب یەک ژ کەسێن گوهبدەستێن پەکەکێ دهێتە ناسکرن کر.
یەکەم جار ل رۆژا 13ەی مەها بەفرانبارا ئەڤ سالە دا، پەکەکێ ب رێیا یەک ژ پەیێجێن خوە یێن د مەدیایا جەڤاکی دا ب ناڤێ تەڤدا پرێس دەست ب گەفکرنا ل هەڤسەرۆکێن یەنەکێ کر، پەکەکێ د مەدیایا خوە یا سیبەر دا گەف ل هەڤسەرۆکێن یەنەکێ کرن و دیار کر، گەر ئێکەتی د دەما 24 دەمژمێرێن دی دا کەسێن هاتیە گرتن کو پرانیا وان لایەنگرێن پەکەکێ و ئەندامێن رێخستانا جوانێن باشوور یێن سەر ب پەکەکێ ڤە نە ئازاد نەکەت، پەکەکە دێ هەتکبەریەکا هەڤسەرۆکێن یەنەکێ کو ل 14ێ مژدارا 2020ێ دا قەومیە ل کۆمیسیۆنا ئەورۆپایێ بەلاڤ کەت. لێ وەکو دیار لاهۆر ژ دەست دانا هەتکا خوە باشتر دبینیت ژ ژدەستدانا باژێر، دەستهەگات و نفۆزا خوە یا سیاسی.
پەکەکێ و ئێکەتیێ دخواست مەرەمێن خوە یێن خیانەتا 16ێ ئۆکتۆبەرێ ب خوەپیشاندانا ب دوماهی بینن
پەکەکێ و یەنەکێ ب هەڤبەشی دخواست رەوشا ئابووری یا خراب ل باشوورێ کوردستانێ ژ بۆ خوە وەکو دەلیڤەیەک زێرین بکاربینن و ب ڤێ یەکێ دژاتیا حکوومەتا هەرێما کوردستانێ بکەن و ب تەمامی وێ نەخشایا کو ب خیانەتا 16ێ ئۆکتۆبەرێ دەست پێ کری ب ڤان خوەپێشاندانا ب داوی بینن، لێ بەلێ پەکەکێ ب رێیا رێخستنێن خوە یێن ل سلێمانیێ سەمتا خوەپێشاندانا گوهارت و بوونە سەدەمەک ژ بۆ خرابتر کرنا رەوشا سلێمانیێ و مەترسی ئێخستنە سەر دەستهلاتا یەنەکێ ب خوە ژی، یەکەم جار خوەپێشاندان ب رەنگەکێ دیمۆکراسیانە برێڤە چوون، لێ بەلێ پەکەکێ ب رێیا گرووپێن پارامیلیتەر سەمتا خوەپێشاندانا گوهارت و دەست ب شەوتاندنا بارەگەهێن پارتیان و سازیێن حکوومی یێن دکەڤنە سنۆرێ سلێمانیێ کر، رەوش گەلەک ب مەترسی بوو، لاهۆر جەنگی ژ نوو ڤە فام کر کو پەکەکێ ئەو خاپاندیە و فێل ل وی کریە، لاهۆر فام کر گەر رەوش ب ڤی رەنگی بەردەوام بیت دێ د زیانا وی و د بەرژەوەندیا پەکەکێ دا ب داوی هێت، ب ڤێ یەکێ کو لاهۆر جەنگی ژی ب کەسەک بەرژەوەندخواز وەکو بەرژەوەندخازێن گرووپا ئەنقەرێ یا پەکەکێ دهێتە ناسکرن، فەرمانا گرتن و لێدان و نەهێلانا خوەپێشاندەر و خوەپێشاندانان دا، هەر زوو هەژمارەک هەری زێدە یا خوەپیشاندەران هاتنە گرتن، پشتی هنگێ ئاشکەرا بوو کو پرانیا وان ئەندامێن پەکەکێ نە.
ل ڤێرە بوو کو پەکەکێ دەست ب گەف خوارنێ ل یەنەکێ کری داکو ئەندام و لایەنگرێن وێ کو ب فەرمانا لاهۆر جەنگی ڤە هاتبوون زیندانی کرن، بهێنە ئازادکرن، لێ بەلێ وەکو دیار لاهۆر جەنگی ئەڤ خواستەکا پەکەکێ بجیهـ نەئانیە و هەر ژ بەر ڤێ یەکێ پەکەکە نها ئێریشی سەر لاهۆرێ خوە دکەت، ئەو لاهۆرێ کو پەکەکێ ب خوە ب دەستێ خوە و ب فەرمانا ئیرانێ کری کەسێ یەکەم ل سلێمانیێ.
وسا دیار دبیت کو نە لاهۆر جەنگی پەکەکە ب تەمامی ناسکریە نە ژی پەکەکێ لاهۆر ب تەمامی ناسکریە.
پەکەکە نها د تەڤدا پرێسێ دا دژاتیا لاهۆر جەنگی دکەت و د نووترین نڤیسا خوە دا، ئەڤ پەیێجێ مەدیایا جڤاکی کو سەر ب پەکەکێ یە دنڤیسیت، “ل گۆر ئاگاهیێن مە لاهۆر جەنگی سێ ترۆمبێلێن تۆیۆتا لانداگروس (مۆنیکا) ل سەر سێ بەرپرسێن کو خوەپیشاندەر گرتینە و ئەو ئەشکەنجە دانە، ب ناڤێن وەستا حەسەن، لیوا عومەر و بەرپرسەکێ دی پارڤەکرینە”. د درێژیا نڤیسا خوە دا تەڤدا پرێس دنڤیسیت،”ئەڤ چەندە د دەمەکی دا یە کو دوهی لاهۆر جەنگی سەرەدانا مالباتێن شەهیدان کریە و داخوازا لهەڤهاتنا عەشایری کریە و سۆزا سزا دانێ ژی دایە”. پەکەکێ ب ڤێ نڤیسێ خواستیە کەسێ کو پێش نها وەکە کەسەک دەولەتمەدار، سیاسی و پر سەردەمیانە ددا نیشاندان ب کەسەکی عەشایری و دۆر ژ ئەتەکێتێن دبلۆماسی نیشان بدەت.
ئەڤ یەک ددەتە دیار کرن کو پەکەکە بۆ کەسێ نابیتە مال، هەر کەس چەند خزمەتێ ژ بۆ پەکەکێ بکەت، هەر دەما کو پێنگاڤەک بچووک ژی ل دژی وێ ئاڤێت دێ کەڤیتە بەر ئێریشێن پەکەکێ، ئەڤجا چ ئێریشا ب چەکێ بیت یان ژی ئێریشا ب سەرێن قەلەمێن تووژکری، وسا دیار دبیت کو نە لاهۆر جەنگی پەکەکە ب تەمامی ناسکریە نە ژی پەکەکێ لاهۆر ب تەمامی ناسکریە.
