ئەڤ بایێ نەرم کو د ناڤبەرا کوردێن رۆژئاڤا دا هەبوو دیارە کو دهێتە گوهارتن، ئەڤ بایە ژ بەر هندەک شەرت و مەرجا چێبوو. لێ بەلێ رێڤەبەریا رۆژئاڤا جارەکا دی ژ بۆ رێڤەبەریا پەکەکێ زڤری و مەزلووم عەبدی ژی وەک شاهین جیلۆ تەڤ دگەریت.

شەوتاندنا نڤیسینگەهێن ئەنەکەسێ، و ل سەر هەڤدیتنا نێرینێن نهێنی یێن رێڤەبەریا رۆژئاڤا، و هەلوەستا مەزلووم عەبدی ل همبەر شەهید کرنا پێشمەرگەیەکی ل ئامێدیێ و هەری داوی ژی پەڤچوونا ل پێشابیرێ روو دای تێبینیێن گرینگن.

پەڤچوونا پێشابیرێ ژ ئەنجامێ پلانا پەکەکێ یا هەلوەشاندنا هەرێما کوردستانێ چێبوو

بوویەرا پێشابیرێ یا شەڤا 16/12/2020 کو ئارمانج ژێ دەست دانانە سەر ناڤچەیا سحێلا بوو ژ ئەنجامێ تێنەگەهشتنێ چێبوویە، ئەڤ بوویەرە مەشهەدەک “سەحنەیەک” ژ پلانا پەکەکێ یە. سحێلا جهەکێ گەلەک گرنگە. ژ لایەکێ پلانا ئیراق، ژ لایەکێ دی پلانا ترکیا هەیە کو سحێلا بکەنە دەستێ خوە دا، سحێلا دهێتە وێ واتەیێ کو کەسێ دەستێ خوە دانە سەر سحێلا دێ ژ دەریێ ئیبراهیم خەلیل حەتا شەنگالێ دەستهلاتداریا سنۆری وەرگریت. جهەکی ب ڤی رادەی حەساس و د پێڤاژۆیەکا حەساس دا دەرکەفتنا پەڤچوونەکێ نە ژ نیشکەکێ ڤە یە. دهێتە وێ واتەیێ کو دبێژن مە ل ڤێ دەرێ ژی هێز هەیە.

پەکەکە وێ شەڤا کو ل ڤێ دەرێ پەڤچوون دەرکەفت، دشیا هێزێن خوە ژ جیهەکی دی دەرباس بکەت داکو چاڤدێریا پێشمەرگە ل سەر وان نەبیت. لێ بەلێ دیارە کو وان ب زانابوون خواست پێشمەرگە ئیستیفزاز بکەن، یان ژی خوەستن بێژن کو ئەم دێ وەکو خوە تەڤگەرین، هوون ژی نەشێن دەنگ بکەنە مە. یان ژی هەر دو ئارمانج ب هەڤرا مەشاندنە، ئانکو گۆتنە ئەم دێ بێ دەنگ دەرباس بین ئەگەر پێشمەرگا دەنگ نەکر، ئەم دێ ل ڤێ دەرێ ڤی تشتی دوبارە کەین.

هەگەر مرۆڤ جارا یەکێ ل دژی پەکەکێ هەلوەستێ وەرنەگریت، سۆئیستیفادێ دکەت و د ڤێ مژارێ دا پسپۆرە، هەگەر جارەکێ رێ دا و روودا هوون دەستێ خوە بدەنێ، ئەو دێ ملێ وە ژ وە ستینیت، هەگەر وێ شەڤێ پێشمەرگە هەلوەست ل همبەری وان وەرنەگرتبا وان چ قانوونا و چ پرەنسیبا گوهداری نەدکرن و ئەو دا ڤێ دەرێ ژ خوە را کنە کۆریدۆرا “ناڤبرا” خوە، گەلۆ ل وێ شەڤێ کیژان هێز بوو ل پێشابیرێ دەرباس بووی؟

یەپەگە دبێژیت، “ئەو هێزێن باکور کو ل شەرێ داعشێ دا هاریکاریا مە کربوو، ڤەدگەرین جیهێ خوە. کەسێن کو ژ وێ دەرێ دەرباس دبوون هێزەکا پەکەکێ بوو کو ل سەر چەکێن گران و تەقەمەنی پسپۆر بوون. پەکەکە ژبەرکو دخوازیت ل بهارێ ئێریشی پێشمەرگە بکەت، ڤان هێزێن پسپۆر هێدی هێدی ژ رۆژئاڤا تینیتە ناڤا باشوورێ کوردستانێ. و ئەڤ هێزە دخوازن حەتا بهارێ جوگرافیا ناڤچەیێ ناس بکەن و ئالیێ فکری ژی حازر بن داکو ل بهارێ ئێریشی هەرێما کوردستانێ بکەن.

دەما ڤێ گرووپێ خوەستی ب قاچاغی سنۆری دەرباس بکەن، پێشمەرگە هشیاری دا و رێگری کر، نە ژ لایێ رۆژئاڤا بەلکو ژ لایێ باشوور ل چیایێ سپی تەعلیمات بۆ وان چوون و گۆتە وان کو ئێریشی پێشمەرگە بکەن، واتە بریارا ئێریشکرنا پێشمەرگە راستە راست ژ لایێ پەکەکەێ ڤە هات دایین.

پەڤچوونا پێشابیرێ، یەپەگە و هەسەدە ژی د گەلەک لایەنان دا ئاستەنگ کرن. هەسەدێ خواست ئەو پەکەکەیێن رادیکال یێن د ناڤا خوە دا بێ دەنگ بکەت و ل لایەکێ ژی خواست کو ل گەل هێزێن سەر ب وەزارەتا پێشمەرگە ژی رێکەفتنەکێ چێکەت و مەسەلێ قەپات بکەت. ژ بەر ڤێ یەکێ ژی پشتی 24 دەمژمێر ل سەر بوویەرێ دەرباس بووی ژ نوو شییا داخویانیەکێ بدەت، لێ بەلێ د داخویانیا خوە دا ژی یەپەگێ خواست هەموو حەقیقەتا ئینکار بکەت و خوە مافدار دەربێخیت. بلا یەپەگە باش بزانیت کو داخویانی ژ بۆی خاپاندنا رایا گشتی بەلکە ب باندۆر بیت، لێ بەلێ ئەو هێزێن هەڤپەیمانیا ناڤدەولەتی کو هەموو بوویەرا ب هەیڤێن دەستکرد (سەتەلایێت) دشۆپینن ب داخویانیێ نایێن خاپاندن. ژ بەرکو هەڤپەیمانیێ دیت کو وێ شەڤێ تشتەک ل سەر سنۆری چێبوو تشتەکی ل دەرڤەی رێکەفتنێ یە هەلوەستەک توند ل دژی هەسەدێ دیار کر. و هشیاریا داوی دا هەسەدێ کو جارەکا دی بوویەرەکا ب ڤی ئاوا ل سەر سنۆری روو نەدەت. ژ بەر ڤێ یەکێ ژی هەسەدە مەجبوور ما پشتی یەپەگێ داخویانیەکێ بدەت و هەڤسەنگیەکێ چێکەت، هەسەدە ژ ڤێرە هێڤە مەجبوورە کو دو قات زێدەتر هشیار بیت ل سەر روودانا بوویەرەکا ب ڤی ئاوا نەخوازراو، ژبەرکو هێزێن هەڤپەیمانی پشتگریێ ددەنە هەسەدێ، لێ بەلێ تەڤگەرا هەسەدێ یا ل دەرڤە د بن کۆنترۆلا هەڤپەیمانیێ دا یە، حەتا کیژان سیلاح ل کو دەرێ بهێتە ئاڤێتن، ئەڤە ژی د بن کۆنترۆلا هەڤپەیمانیا ناڤدەولەتی دا چێدبیت.

سێ ئەنجامێن گرینگ

بوویەرا پێشابیرێ سێ ئەنجامێن گرینگ دەرخستن هۆلێ:

• حکوومەتا هەرێما کوردستانێ و پێشمەرگە گەلەک ئارام و ب سەبر بوویەرا دشۆپینن، ناهێنە ئیستیفزاز کرن، لێ بەلێ هەگەر هندەک ژ حەدێ خوە دەرباس بن ئەو دێ بەرسڤەکا توند دەنە خوەدیێ ڤێ هێزێ.

• رێڤەبەریا رۆژئاڤا مینا پەکەکێ یە، بێ حەدە، بێ حقووقە و بێ وەفا یە، ژ بۆی بەرژەوەندیا خوە دشێت هەر تشی بێژیت و بکەت، دێ سۆز و پەیمانان خوە کەنگی شکێنیت نەدیارە. هەر دەما کەسەکی پشتا خوە دا پەکەکێ دێ پەکەکە خەنجەرەکی ل پشتا وی دەت.

• پەکەکە ژ بۆی بەرژەوەندیا خوە دشیت مەشرووعیەتا رۆژئاڤا ژی بێخیتە بن مەترسیێ دا، پەکەکە رۆژئاڤا ژ بۆ خوە وەکو خەرجیەکێ د بەریکا خوە دا دبینیت.

ئۆپەراسیۆنا “کانیا ئاشتیێ” یا ترکا، هەلوەستا بارزانی یا کوردستانی، و گەلێ رۆژئاڤا

ئەو بایێ نەرمێ د ناڤبەرا رۆژئاڤا و باشوور دا هەبوو نە بەس تەنێ ژ بەر زۆری یا ئامەریکا چێبوو، رێڤەبەریا رۆژئاڤا دیت کو ژ حکوومەتا هەرێما کوردستانێ هیزێ وەردگریت، وان بەرژەوەندیا خوە تێدا دیت.

حەتا مەزلووم عەبدی گۆت کو (ئەز سوپاسیا سەرۆک مەسعوود بارزانی دکەم)، ب ڤی رادە گرینگی دا ڤێ پشتگیری یێ. تایبەت ژی پشتی داگیرکرنا سەرێ کانیێ و گرێ سپی یێ کو د لایێ مەعنەوی دا پشتگری دایە رۆژئاڤا هەرێما کوردستانێ بوو، گەلێ رۆژئاڤا دیت کو هەرێما باشوور ل پشت وانە، دژی هەولدانێن داگیرکرنێ یێن ترکیێ دەما هەرکەس بێ دەنگ، مەسعوود بارزانی دەرکەفت و گۆت: “ئەم ب رەوشا داویێ کو ل رۆژئاڤایێ کوردستانێ هەیە دلگرانین. مە ل گەل چەند کانالان پەیوەندی هەنە و ژبۆی کو فەلاکەتەکا دی نەهێتە سەرێ گەلێ رۆژئاڤا، چ ژ دەستێ مە بهێت، یا هەری باش ئەم دێ کەین. و هەمان دەمێ بارزانی راستەوخۆ خیتابا ترامپ کر و ل دژی داگیرکەریێ هەلوەست نیشاندا”. و پشتی بارزانی، هەرێما کوردستانێ ژی ژ لایێ ئابووری و تەندروستی… هتد دا پشتگری دا رۆژئاڤا.

هەرچەند پەکەکە هەبوونا حکوومەتا هەرێما کوردستانێ و باندۆرا وێ  یا ئەرێنی ل سەر کوردان ئینکار ژی بکەت، لێ بەلێ هەرێما کوردستانێ ژبۆی کوردان چاڤکانیەکا ئیلهام و هێڤیێ یە. ئەو کوردێ کو دهێت و ل هەڤلێرێ دمینیت، و دبینیت د مەدرەسەیان دا ئالایێ کوردستانێ بلندە، و پێشکەفتنێن باژێرڤانیێ دبینن و دبینن 20 سالێن داویێ هەرێما کوردستانێ روویێ خوە چەوا گوهارت، دبێژن هەگەر باشوور کر، ئەم ژی دشێین بکەین. هەگەر پەکەکە هەر چەند وان تشتا ئینکار ژی بکەت، لێ بەلێ مرۆڤێ کو هشمەندی هەبیت دبینیت کو کەڤنەشۆپا بارزانی و تەکۆشینا پێشمەرگە دەستکەفتیەکی مەزنە و کوردێن دین ژی دشین پشتا خوە بدەنە ڤی دەستکەفتی. رێڤەبەریا رۆژئاڤا ژی پشتی داگیرکرنا سەرێ کانیێ و گرێ سپی ژ هەبوونا باشوورێ کوردستان هەم پشتگریا ماددی هەم مەعنەوی وەردگریت، واتە ئەڤ بایێ کو د ناڤبەرا کوردێن باشوور و رۆژئاڤا دا هەبوو ژ بەر ڤێ سەدەمێ چێبوو. لێ بەلێ ئەو توویتا مەزلووم وەختا کو پێشمەرگەیەک ژ لایێ پەکەکێ ڤە ل ئامێدیێ هاتیە شەهید کرن ئاڤێتی، و د هەمان دەمێ دا شەوتاندنا نڤیسینگەهێن ئەنەکەسێ و پەدەکە سووریێ دا نیشاندان، کو ئەڤ بایێ نەرم دشیت بەرێ خوە بگوهریت و ببیتە رەشەبا.

پەکەکە نە مەزلووم عەبدی بەلکو شاهین جیلۆ دخوازیت

گەلۆ ئەم دکارین بێژین مەزلووم عەبدی تەسلیمی پەکەکێ بوو یان ژی جارەکا دی بەرێ خوە دا پەکەکێ و بوو شاهین جیلۆ؟ بەلێ ئەم دشێین بێژین.

شاهین عەبدی بەری دەمەکێ کورت بوویەرێن هەرێما کوردستانێ و ئالۆزیا کو پەکەکێ دروستکری، نرخاندبوون و گۆتبوو: “هەگەر شەرەک دروست بوو ئەم پشتا هیچ لایەنەکێ ناگرین”، باشە د دەما 15 رۆژان دا چ چێبوو کو مەزلووم عەبدی هەلوەستا خوە گوهارت؟ ژبەرکو پەکەکێ زەختەکا مەزن ل سەر مەزلووم و هەموو رێڤەبەریا رۆژئاڤا کر. مە بەریا نها گەلەک جاران دابوو دیار کرن کو مەزلووم عەبدی ژی شەربەتا دەستێ پەکەکێ ڤەخواریە. نەشێت ژ وان تایبەتمەندیێن پەکەکێ ب یەکجاری خوە قوت بکەت، لێ بەلێ دزانی هەگەر بەرێ خوە نەدەتە پەکەکێ ئەو دێ هێتە ژناڤبرن. بەرژەوەندیا خوە دیت کو جارەکا دی وەکو شاهین جیلۆ دیار ببیت. نە خوە مەزلووم عەبدی باش دزانیت ئامێدیێ ل کو دەرێ یە و باش دزانیت کو فیشەکا یەکێ پەکەکێ ئاڤێتیە و دزانیت کو ل ڤێ دەرێ پێشمەرگەیەک ب دەستێ گەریلایا هاتیە شەهیدکرن و باش دزانیت پەکەکە دخوازیت ئیستیفزازەکا شەر چێکرنێ چێکەت. پەکەکە ژ بۆی بەرژەوەندیا خوە دخوازیت مەزلووم عەبدی بکەتە شاهین جیلۆ و رۆژئاڤا کوردستانێ ژی بکەتە وارگەهەکێ پەکەکێ. پەکەکە دشێت ژ بۆی بەرژەوەندیا خوە یا حزبی هەر کەسەکێ خەرج بکەت، هەگەر کو مەزلووم عەبدی خوە بدەتە خەرجکرن و ببیتە شاهین جیلۆ، سەد مخابن بۆ وی و ژ بۆ رۆژئاڤا کوردستانێ.