په‌كه‌كه ل به‌رێ گاره و زنارا كێسته تێ هه‌ده‌ف كرن
باله‌فرێن جه‌نگێ یێن ده‌وله‌تا تركیێ ئیرۆ ئێریشی نوقته‌یێن رێخستنا په‌كه‌كێ ل باشوورێ كوردستانێ كر و هه‌ژماره‌كه رۆكه‌تان ل ده‌ڤه‌را به‌رێ گاره و زنارا كێسته خستنه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا چارشه‌می 30/12/2020ان، باله‌فرێن جه‌نگێ یێن ده‌وله‌تا تركیێ، دوو جاران ل چیایێ بێسمتی كو دكه‌ڤه ده‌ڤه‌را به‌رێ گاره‌ی ل سینۆرێ پارێزگه‌هییا دهۆكێ، لڤ و ته‌ڤگه‌رێن چه‌كدارێن په‌كه‌كێ هه‌ده‌ف كرن.
ده‌ست نیشان كر، ئێریش ل ب تایبه‌ت ل ملێ گاره‌ی پێكهاتییه ئه‌ڤ جیه دكه‌ڤه سینۆرێ قه‌زایا ئامێدیێ، ئاگاهی ل ده‌ربارا زرارێن په‌كه‌كێ نه‌هاتنه ب ده‌ست خستن، لێ به‌لێ ل گۆر دیمه‌نێن ڤێ ئێریشێ، دۆمانه‌كه مه‌زن ل جیێ كه‌تنا رۆكه‌تان به‌رز بوویه.
چاڤكانیێن پێگه‌ها داركا مازی ل باشوورێ كوردستانێ هه‌روه‌ها ئه‌شكه‌ره كر، د ئێریشه‌كه دن ده كو باله‌فرێن جه‌نگێ ئیرۆ ل ساعه‌ت 10:40ێ به‌ری نیڤرۆژێ، نوقته‌یێن چه‌كدارێن په‌كه‌كێ ل ده‌ڤه‌رێن ب ناڤێ گۆپكی كو دكه‌ڤه سه‌رێ زنارێ كێسته ل باكورێ گوندێ كێستا كه‌ڤن ل ده‌ڤه‌را به‌رواری بالا هه‌ده‌ف كرنه.
ئه‌شكه‌ره كر، د ڤێ ئێریشێ ده، باله‌فران دوو رۆكه‌ت ل نوقته‌یێن په‌كه‌كێ دانه و دیمه‌نێن ڤیدیۆیی یێن كو ژ بۆ پێگه‌ها مه هاتنه شاندن، دۆمانا جیێ بوویه‌رێ ب زه‌لالی ده‌رخستییه.
ئێریشێن ئیرۆ هه‌موه‌ختا ئێریشێن دوو رۆژێن ده‌رباسبوویی تێ كو باله‌فرێن بێ پیلۆت یێن ده‌وله‌تا تركیێ ل ئاڤاشین حه‌ره‌كه‌تا په‌كه‌كێ هه‌ده‌ف كربوو و 10 چه‌كدارێن رێخستنێ كوشتن.
