سوپایێ پاسدارێن ئیرانێ دیار کر، بارەگەھەکێ مۆشەکان ل بن ئەردی ل بەراڤێن کەنداڤێ ل باشوورێ ئیرانێ ئاڤاکرنە.
ل گۆر فەرماندارێ گشتی یێ سوپایێ پاسداران حوسێن سەلامی د دەما ئاشکەراکرنا بارەگەھا مۆشەکان، دا زانین: “مەبەستا مە ئەڤە یە کو ئەم بەرگریێ ل یەکپارچەبوونا ئاخ و سەرخوەبوون و پشتەڤانیا ھێزێن خوە ل ئیرانێ بکن. دژمنێن مە ھێزا ئیرانێ رەد دکن.”
حوسێن سەلامی دەستنیشان کر: “ژ بلی بھێزکرنا شیانا بەرەڤانی و ئێریشکاری و رێلبەرگرتنا دژمنان، ئیرانێ هیچ بژاردەیەکا دی نینە، دا کو ھەژموون و پلانێن خوە ب سەر مە دا نەسەپینن.” ھەروھا ئاشکەرا کر: “ئەڤ بارەگەھە یەک ژ سازیێن مەیە کو مۆشەکێن دوورهاڤێژێن ھێزێن دەریایی تێدا نە.”
ھەروەھا سەلامی ئاشکەرا کر: “بارەگەھا مۆشەکان چەند کیلۆمەترا درێژە و ھەژمارەکا مەزنا ھێزێن مەیێن دەریایی ژی د ڤێ بنکەیێ دا ھەنە. مۆشەکێن وان ژی د شەرێ بەراڤێن دەریایی دا مۆشەکێن ھەری پێشکەتی نە.”
فەرماندارێ گشتی یێ سوپایێ پاسداران دیار کر: “شیانا ھێزێن مە یا رووبرووبوونا گەفێن دژمنان ھەیە، ھەر دەم ژ بۆ بەرەڤانیا ل ھەمبەر ئێریشکاران ئامادە نە، ژ بۆ بەرەڤانی کرنا ژ بەرژەوەندیێن ئاڤێن ئیرانێ ل کەنداڤی.”